Сейсенбі, 16 қыркүйек күні Шәкәрім атындағы мемлекеттік университетінің ғимаратында «Нұр Отан» партиясы Семей қалалық филиалының кезекті, ХХV есеп беру — сайлау конференциясы болып өтті. Жиынға «Нұр Отан» партиясы ШҚО филиалы төрағасының бірінші орынбасары Әнуарбек Мұхтарханов, қала әкімі Ермак Сәлімов, қалалық филиалдың саяси кеңес мүшелері, облыстық және қалалық мәслихат депутаттары, партиялық бақылау комиссиясы және жемқорлықтың алдын алу жөніндегі қоғамдық кеңес мүшелері, мемлекеттік және құқық қорғау органдарының басшылары, бастауыш партия ұйымдарының, қоғамдық және жастар ұйымдарының жетекшілері қатысты.
Күн тәртібі бойынша «Нұр Отан» партиясы Семей қалалық филиалы саяси кеңесінің жылдық есебі тыңдалып, партияның қалалық саяси кеңесін және облыстық конференцияға қатысатын делегаттар сайланды.
«Нұр Отан» партиясы Семей қалалық филиалы төрағасының бірінші орынбасары Зульфия Жамалтдинова партия саяси кеңесінің бір жылда атқарған жұмысы туралы есебін баяндады.
«Нұр Отан» партиясы Семей қалалық филиалы саяси кеңесі «Рухани жаңғыру» бағдарламасын, Елбасы Н.Назарбаевтың жыл сайынғы халыққа Жолдауларын насихаттау мен түсіндіруде, партия басшылығы қойған мақсаттар мен міндеттерді жүзеге асыруда жоспарлы түрде жұмыстар атқарып келеді. Партия қаланың әлеуметтік-экономикалық тұрғыдан дамуына белсене араласуда. Білім беру саласын дамыту мәселесін үнемі бақылауда ұстап, жағдайын жақсартуға ықпал етіп отыр.
— Биыл Семей қаласының экономикасында өткен жылмен салыстырғанда оң өзгерістер байқалады. Атап айтар болсақ, әлеуметтік саланы дамыту үшін Бобровка кенті мен Ұшақтар ықшам ауданында 1800 орындық екі білім ошағы пайдалануға берілді. Келесі кезекте Степной және Шығыс кенттерінде 1500 орындық мектеп салу жоспарда тұр. «Менің мектебім» жобасы аясында қалалық демеушілердің көмегімен 30-ға жуық «Мәңгілік Ел» оқу бөлмелері ашылып, 75 млн. теңгеге 20-ға жуық кабинет заманауи робототехникалық құрылғылармен жабдықталды. 2018 жылы Қарағайлы шағын ауданында 320 орындық балабақша салынды. Ұшақтар ықшам ауданында 280 орындық балабақшаның құрылысы аяқталуға жақын. Биыл қалалық университеттерге 118 грант бөлінді, бұл жоғары білімнің сапалы және қолжетімді болуын қамтамасыз етеді. Алдағы уақытта 988 колледж студенттері жаңа жатақханалармен қамтылатын болады,- деді «Нұр Отан» партиясы Семей қалалық филиалы төрағасының бірінші орынбасары Зульфия Жамалтдинова.
Халықтың өмір сүру сапасын жақсарту мақсатында «Нұрлы жер» бағдарламасы шеңберінде іс-шаралар атқарылуда. Әлеуметтік маңызы бар жобаларды жүзеге асыру да партияның басты назарында.
— Қаланың инфрақұрылымын дамыту үшін Еуропалық қайта құру және даму банкімен 13 миллиард теңгеге несиелік келісімшарт жасалды. Бұл қаражат қаланы жылумен, сумен қамтуға және жарықтандыруға бағытталған жобаларды жүзеге асыру мақсатында жұмсалмақ. Яғни 2021 жылы шаһарамызда 26 шақырым жылу, 12 шақырым су, 52 шақырым кәріз желілері мен 7 мың шақырым жарықтандыру желілері ауыстырылады,- деді «Нұр Отан» партиясы Семей қалалық филиалы төрағасының бірінші орынбасары Зульфия Жамалтдинова.
Семей қалалық «Нұр Отан» партиясының депутаттық фракциясының жұмысы мен қала экономикасының дамуы туралы Дариға Даирова баяндады.
— Жылдық және есептік кезеңнің көрсеткіштері Семей қаласы экономикасының тұрақты өскендігін көрсетеді. Жыл басынан бастап қала-ның өнеркәсіп мекемелері 130 млрд. теңгенің өнімін өндіріп, өсу қарқыны 110 пайызды көрсетті. Ауыл шаруашылығы өнімдерін өндіру 22,5 млрд. теңгені құрады. Бұл көрсеткіш өткен жылмен салыстырғанда 1,8 пайызға жоғары. Құрылыс жұмыстарының көлемі 24,8 млрд. теңге, ал өсу қарқыны 72,2 пайыз болды. Сауда айналымы 151,6 млрд. теңгені құрады. Бұл көрсеткіш өткен жыл-мен салыстырғанда 7,2 млрд. теңгеге артты. Негізгі капиталға салынған инвес-тиция 58 пайызға өсіп, 44 млрд. теңгеге жетті. Биылғы жылдың 9 айында 54 мың шаршы метр тұрғын үйдің құрылысы аяқталды. Ағымдағы жылы қаланың бюджет жиынтығы, қаржыландырудың барлық көздерін қосқанда, 57,2 млрд. теңгені құрады,- деді Семей қалалық мәслихатының депутаты, «Нұр Отан» партиясы депутаттық фракциясы төрағасының орынбасары Дариға Даирова.
— Елбасының бес әлеуметтік бастамасы мен «Қазақстандықтардың әл-ауқатының өсуі: табыс пен тұрмыс сапасын арттыру» атты Жолдауы халықтың тұрмыс сапасын арттыруға бағытталған. Осы Жолдау негізінде арнайы Қоғамдық кеңес құрылды. Кеңестің құрамына барлық саяси партиялар, мемлекеттік емес мекемелер, қоғамдық ұйымдар кіреді. Бұл қоғамдық бақылау жүргізу арқылы Елбасының тапсырмасын жүзеге асыруға мүмкіндік береді,- деді «Нұр Отан» партиясы ШҚО филиалы төрағасының бірінші орынбасары Әнуарбек Мұхтарханов.
Есеп беру баяндамаларынан кейін дауыс беру арқылы партияның қалалық саяси кеңесі және облыстық конференцияға қатысатын делегаттар сайланды.
Конференция соңында «Нұр Отан» партиясы ШҚО филиалы төрағасының бірінші орынбасары Әнуарбек Мұхтарханов пен қала әкімі Ермак Сәлімов партия белсенділеріне алғыс хаттар табыс етті.
Құралай ҚАЙЫРЖАНҚЫЗЫ, «Семей таңы»
