Бейсенбі, 25 қазан күні Семейге ҚР Сыртқы істер министрінің орынбасары Роман Василенко және ШҚО Туризм және сыртқы байланыстар басқармасының басшысы Жасұлан Сәрсебаев келіп, Қазақ инновациялық гуманитарлық-заң университетінде студенттермен кездесу өткізді.
Қазақстанның Ресей, Қытай, АҚШ секілді алпауыт мемлекеттермен, Еуропалық одақпен және Орталық Азия елдерімен қарым-қатынасы мен сауда-саттық айналымына тоқталған Роман Василенко өткен жылмен салыстырғанда Еуразиялық экономикалық одақ елдерімен сауда айналымы 15 пайызға өскенін, Өзбекстанмен қарым-қатынастың жаңа көкжиекке көтерілгенін және Қытай елімен сауда-саттық байланыстың жанданып, 10 млрд. долларға жеткенін айтты. Сондай-ақ өз сөзінде Роман Василенко теңізден шалғай орналасқан Қазақстанның Қытаймен және өзге де елдермен сауда-саттық қарым-қатынасын ұлғайту мақсатында Ұлы Жібек жолын жандандыруға соңғы бес жылда 20 млрд. доллар инвестиция тартылғанын жеткізді.
— Әрине, Қазақстанның АҚШ-пен және Еуропалық одақпен қарым-қатынасы да өте маңызды. Еуропалық одақ — ең ірі сауда әріптестеріміздің бірі, сыртқы сауданың 50 пайызын құрайды. Сондай-ақ ТМД, Иран, Түркия, Араб елдерімен әріптестіктің де өзектілігін айтпай кетуге болмайды. Бүгінгі таңда әлемде ядролық қауіпсіздік пен террорлық мәселелердің ушығып тұрғанын білесіздер. 19 қазанда Елбасы Брюссельде өткен Ядролық қауіпсіздік жөніндегі «Азия — Еуропа» форумының саммитіне қатысып, ірі мемлекеттерді әлемдік қақтығыстарды шешуге шақырды. Және осындай саммитті Астанада өткізуге ұсыныс білдірді,- деді Р.Василенко.
Туризм және сыртқы байланыстар басқармасының басшысы Жасұлан Сәрсебаев ШҚО-да Елбасы Жолдауын жүзеге асыру барысында атқарылған істер туралы баяндады. Оның айтуынша, Елбасы Жолдауына сәйкес, ШҚО-да 380 мың адамның жалақысы 1,5 есеге көбейеді. Сондай-ақ «Бизнестің жол картасы — 2020» бағдарламасы аясында орта және кіші кәсіпкерлікті қолдау жалғаса бермек. Аталмыш бағдарлама бойынша осы күнге дейін ШҚО-да 13,6 млрд. теңгеге 700-ден астам жоба қаржыландырылған.
— Өңірлерді индустрияландыру жобасы бойынша Семейде «Агропортал» ЖШС ирандық компанияның қатысуымен ет өңдеу комбинаты салынады. Жыл соңына дейін Семей әуежайының ұшып-қону жолағының құрылысы аяқталып, қолданысқа беріледі. Жидебай мен Қоңыр әулиеге баратын туристерге қолайлы жағдай жасау мақсатында Семей — Қарауыл автомобиль жолы жөнделуде. Сондай-ақ Еуропалық қайта құру және даму банкімен, Қазақстан даму банкімен жүргізілген келісімшарттарға сәйкес, келесі жылдан бастап Өскемен және Семей қалаларында электрондық билет жүйесі енгізіледі,- деді Ж.Сәрсебаев.
ШҚО Туризм және сыртқы байланыстар басқармасы басшысының айтуынша, Алакөлде демалушылардың 40 пайызы — семейліктер. Алакөлге апаратын аудандық, облыстық маңыздағы жолдар толығымен жөндеуден өтсе, республикалық маңыздағы жолдарды жөндеу жұмыстары 2021 жылы тамамдалмақ. Соңғы екі жылда Алакөл жағалауын абаттандыруға 5,3 млрд. теңге бөлінген. Бұл бағыттағы жұмыстар келешекте де жалғасын тауып, жаңа нысандар бой көтермек.
Жадыра ТӨЛЕГЕНҚЫЗЫ, «Семей таңы»
