Сәрсенбі күні Семей қалалық мәслихатының кезектен тыс (жиырма бесінші) сессиясы болып өтті. Халық қалаулылары күн тәртібінде «Семей қаласының 2013 -2015 жылдарға арналған бюджеті туралы» шешімге өзгерістер мен толықтырулар енгізу мәселесін қарады.
Ерзат ЖАНАТҰЛЫ,
«Семей таңы»
Семей қалалық экономика және бюджеттік жоспарлау бөлімі басшысының орынбасары Сәулет Кенжебеков депутаттар алдында алдағы екі жылда бюджетте орын алатын өзгерістерді, әр түрлі салаларға жұмсалатын қаражаттардың көлемінен мағлұмат беріп өтті. Сәулет Мұратұлының сөзіне сүйенсек, әлеуметтік саланы әлдендіруге, құрылысқа қарқын қосуға, Семей өңіріне қарасты бірқатар ауылдарды сумен қамтамасыз ету, білім беру саласына бюджеттен айтарлықтай қаражат бөлінген.
Атап айтқанда, Смычка аралындағы су тоғанынан Энергетик кентіне дейінгі су жүйесін салу және 3 көтерім сорғы кешені құрылысына, Озерки және Бұлақ ауылдарының сумен қамту желілерін қайта жаңғырту да осы екі жылдық бюджет есебінен жүргізіледі.
Республикалық бюджеттен бөлінетін несиелер есебінен Байсалықов көшесіндегі көп пәтерлі тұрғын үй құрылысына, республикалық бюджеттен ағымдағы нысаналы трансферттер есебінен бастауыш, негізгі орта және жалпы орта білім беруді жан басына қаржыландыру бойынша саралауды өткізуге де қаржы қарастырылған.
Сонымен қатар, мамандардың әлеуметтік қолдау шараларын жүзеге асыру, үйде оқытылатын мүгедек балаларды жабдықпен, бағдарламалық қамтамасыз ету, жетім балаларды және ата – аналарының қамқорлығынсыз қалған балаларға қамқорлық жасау мақсатында күтіп ұстауға да ай сайынғы ақшалай қаражат төлеу жағы да бюджеттегі өзгертулер мен толықтыруларда қарастырылған.
Қалалық мәслихаттың депутаты, бюджеттік комиссияның төрағасы Әділжан Құдайбергенов әріптестерін сессияға ұсынылып отырған бюджеттегі толықтырулар мен өзгертулерге қолдау білдіруге шақырды. Әділжан Әкрәмұлы бюджет қаражатының орынды жұмсалуы мен тиісті салаларға бөліну мәселесі комиссия отырысында кең көлемде тал-қыланғандығын да атап өтті.
