Апта сәрсенбісінде «Nur Otan» партиясының Семей қалалық филиалының үгіт-насиxат тобы Семей қаласы мәдениет саласындағы қызметкерлерінің басын қосып, партия бағдар-ламасы мен Елбасы тапсырмаларынан туындайтын мәселелер бойынша түсіндіру жұмыстарын жүргізді.
Басқосуға қаламыздағы мәдени мекемелер қызметкерлері мен партияның 20 жылдығына орай ақпан айында Нұр-Сұлтан қаласында өткен ХVIІІ съезд делегаттары жиналған болатын. Көпшілік алдында алғашқы болып сөз алған қалалық партия филиалының ұйымдастыру секторының меңгерушісі Айдос Төлеуханов осынау шараның мәні мен маңыздылығын атап өтті. Жиынның мақсаты ағымдағы жылдың 27-ші ақпаны күнгі «Nur Otan» партиясының кезекті ХVIІІ съезі барысында талқыланған маңызды мәселелер мен партияның 2030 жылға дейінгі бағдарламасының басымдықтарын талқылау және партияның қолданыстағы Жарғысына енгізілген өзгертулер мен толықтырулар туралы кең көлемде түсінік беру болатын.
Сектор меңгерушісі айтып өткендей, қазіргі таңда аталмыш бағыттағы түсіндіру шаралары қаламыз бойынша қызу қолға алынып, жоғары деңгейде жүргізіліп жатыр. Бүгінгі күнге дейін шаһардағы түрлі ұйымдар мен мекемелерде дәл осындай 25 кездесу өткізіліпті. Оның барлығында да саяси ұйымның жаңғыруына септігін тигізер игілікті шаралар қатары мен жоспарлар сөз етілгендігін айтты.
Сонымен қатар Нұр-Сұлтан қаласында өткен съезге қатысқан партия филиалының саяси кеңес мүшесі, Семей электротехникалық колледжінің директоры Азат Сарпеков осынау басқосудан алған әсерімен бөлісе келе, Елбасының халықтың әлеуметтік ахуалын көтеру тапсырмасы бойынша қолға алынған жұмыстар мен міндеттер туралы нақты айтып өтті. Ал қаламыздағы Құрылыс колледжінің директоры, партия филиалының үгіт-насихат тобының жетекшісі Қайрат Тастекеев партияның 2030 жылға дейінгі бағдарламасының басымдықтарын кең көлемде түсіндіріп берді.
Расында, «Nur Otan» партиясы қазіргі таңда мемлекеттік маңызы бар шешімдердің қабылдануына ықпал етіп, сайлаушылардың сенімін ақтап келеді. Сонымен қатар әр жылдардағы Елбасы Жолдауларынан туындайтын тапсырмалардың орындалуын да жіті назарда ұстап, ел игілігіне арналған шараларға елеулі түрде үлес қосуда. Әрі бұл жолда көптеген жаңашыл бастамаларға да мұрындық болуда. Әр қазақстандық отбасы реформаның шапағатын болашақта емес, бүгін сезінуі тиіс. Съезд барысында Тұңғыш Президент атап өткендей, республикалық бюджет шығындарының 45 пайызы әлеуметтік салаға бағытталады. Бұл салада шешімін табуы тиіс түйткілді мәселелер әлі де бар. Сондай-ақ Елбасы тапсырмасымен ел азаматтарының әл-ауқаты мен өмір сапасын жақсарту үшін ұлттық қордан қаржы бөлінеді. Бұл жайттардың барлығы мәдениет саласының қызметкерлеріне де тікелей қатысты. Сол тәрізді Ұлт Көшбасшысының тікелей тапсырмасы аясында алдағы уақытта ең төменгі жалақы алатын бюджеттік сала қызметкерлерінің еңбекақысы 30 пайызға өсетін болды.
Жиын барысында сонымен қатар еліміздің рухани-мәдени әлеуетін дамытуға бағытталған партия жұмыстары мен әлеуметтік сала бойынша партия мүшелерінің ықпалымен жүзеге асырылып жатқан шаралар да сөз болды. Бұл ретте қаламыздағы партия мүшелері қоғамдық-саяси өмірде мейлінше белсенді екендігін алға тартқан Айдос Төлеуханов жиынға қатысып отырған барлық мәдениет саласы қызметкерлерін партия бағдарламасын нақты іспен орындауда елеулі түрде үлес қосуға шақырды.
Қуаныш ЖОЛЫМБЕТ, «Семей таңы» {jcomments off}
