Көп ұзамай Семейде жол жөндеу жұмыстары басталады. Қалалық жолаушылар көлігі және автомобиль жолдары бөлімі негізгі міндеттерді нақтылады. Дайындық жұмыстары аяқталуда.
Биылғы жылға жоспарланған жол жөндеу жұмыстарында орташа жөндеуге басымдық берілген. Бұл мақсатқа 1 миллиард 47 миллион теңге қаражат бөлінді және 8 көше қамтылмақ. Қаланың сол жақ жағалауында Бозтаев көшесі айналмалы жолынан Селевин көшесіне дейін, Глинка көшесі айналмалы жолынан Рысқұлов көшесіне дейін орташа жөндеуден өтпек. Ал оң жақ жағалауда айналмалы жолдың өзіне жөндеу жұмыстарын жүргізу жоспарланып отыр (өткен жылы қаланың сол жағалауындағы айналмалы жол жөнделген), сонымен қатар Мичурин және Қаржаубайұлы көшелерін байланыстырушы Параллельная көшесі және Жангелдин көшесінен Мичурин көшесіне дейінгі аралықтағы Қаржаубайұлы көшелері жөндеуден өтеді. Дәстенов көшесінің Қабылбаев көшесінен №8 орта мектебіне дейінгі аралығын және Зайсанов көшесінен Чехов көшесіне дейінгі аралықтағы Найманбаев көшесін қайта жаңарту жоспарланып отыр.
— Сәуірдің ортасында елімізде асфальт өндіретін зауыттар іске қосылады. Біз де жұмысымызды сол уақытта бастамақпыз. Қазіргі уақытта екі көшені жөндеу жұмыстарының құжаттамасы дайын. Ал қалған алты учаскені жөндеу үшін конкурс жалғасуда. Олар дайын болғаннан кейін орташа жөндеу жұмыстарын бастаймыз,- дейді жолаушылар көлігі және автомобиль жолдары бөлімінің басшысы Серікқали Жұманов.
Биылғы жылы жөндеу жұмыстары ұзаққа созылған Мичурин көшесін тамамдау жоспарланып отыр. Көшені жөндеу жұмыстары 2013 жылы басталғанымен, қаржының жетіспеуіне байланысты кейінге шегерілген еді. Облыс әкімі Д.Ахметовтің тапсырмасымен биыл қаржы бөлініп, жұмыс одан әрі жалғаспақшы. Семейдегі Мичурин көшесі — қаладағы басты күре жолдардың бірі. Бұл жол Жедел медициналық жәрдем ауруханасы, туберкулезге қарсы диспансер сияқты маңызды медициналық нысандарға апарады. Айта кету керек, 2019 жылы күрделі жөндеулер жүргізілетін жалғыз көше – осы Мичурин көшесі.
— Мичурин көшесіне күрделі жөндеу жұмыстары жүргізіледі. Яғни, жол жабындысын жаңартудан бөлек, тротуарлар мен бордюрлер төселіп, көшелер жарықтандырылады, инфрақұрылымдар ауыстырылады. Сонымен қатар біз Мичурин көшесінің бұған дейін жөндеуден өткен бөлігінің кемшіліктерін анықтадық. Енді мердігермен жұмыс жүргізіп, осы олқылықтарды түзетеміз. Мичурин көшесіне жоспарланған жұмыс көлемін жылдың бірінші жартысының соңына дейін аяқтауды көздеп отырмыз. Бұл бағытта 51 млн. теңгеден астам қаржы бөлінді,- деп түсіндірді С.Жұманов.
Ал ағымдағы жөндеу жұмыстарына 150 миллион теңге жұмсалмақ және оның аясында 32,84 мың шаршы метрді құрайтын жол шұңқырларын жабу жоспарлануда. Қалалық жолаушылар көлігі және автомобиль жолдары бөлімі жол желілеріне талдау жасаған соң, ағымдағы жөндеу жұмыстары жүргізілетін көшелер анықталатын болады.
— Өкінішке орай, қыстың соңында көптеген қала көшелері мен аудандарында жол жабындыларының бүлінгені белгілі болады. Қазір біз ағымдағы жөндеу жұмыстары жүргізілетін үш көшені анықтадық. Алдағы уақытта олардың саны артады. Соған қарамастан, 2017-2018 жылдары орташа жөндеу жұмыстары жүргізілген жолдар қалыпты жағдайда тұрғанын байқап отырмыз. Сондықтан біз орташа жөндеу жұмыстарының көлемін арттыруға тырысамыз. Ал сәуір — мамыр айларында шұңқырларды жамау жұмыстарын аяқтаймыз,- дейді С.Жұманов.
Жоғарыда аталған жол жөндеу жұмыстарынан бөлек, грейдерлеу немесе құм себу жұмыстары да жоспарлануда. Жол учаскелерін таңдағанда, алдымен әлеуметтік нысандарға апаратын жолдар басымдыққа ие болады. Қалалық билік бұл мақсатқа 80 миллионнан астам теңге қаржы бөлмек.
— Құм себу жұмыстры жүргізілетін жол желілері әлі толық бекітілген жоқ. Дегенмен №№38, 49, 44 мектептеріне, Мирный, Шығыс және Суық бастау кенттеріне апаратын жолдар алдымен назарға алынады,- деді С.Жұманов.
Соңғы жылдары Семейде жолдарды ұстауға және жөндеуге бөлінетін қаржы айтарлықтай өскенін байқауға болады. Сәйкесінше, орташа жөндеу жұмыстарымен қамтылған көшелердің саны да артты. Дегенмен шешімін күткен мәселе әлі де көп.
— Қала жолдарының ағымдағы жай-күйін ескерсек, бөлінген қаражат жеткіліксіз. Жөндеу жұмыстарын қажет ететін көшелер көп. Мысалы, би Боранбай көшесін толығымен асфальттау қажет, Әуезов даңғылы жайлы да тұрғындар көп шағымданады. Біз 2017 жылы Еуропалық қайта құру және даму банкі арқылы жолдарды қалыпқа келтіруді жоспарлағанбыз, бірақ жоба бойынша алдымен жылу желілерін төсеу жұмыстары жүргізілуде. Ал жоғарыда айтылған көшелерді ағымдағы жөндеу жұмыстарымен қамтуға тырысамыз. Бірақ автомобильдер мен жаяу жүргіншілерге жайлылық туғызу үшін бұл жеткіліксіз,- дейді жолаушылар көлігі және автомобиль жолдары бөлімінің басшысы.
Айта кету керек, биыл Шығыс кентінің тұрғындары үшін жақсы жаңалық бар. Аталған кенттегі кептеліс мәселесі шешілмек. Естеріңізге сала кетсек, Шығыс кентінде таңертең және кешкі уақытта ұзаққа созылатын кептелістер орын алып, көлік қозғалысы едәуір қиындайды. Бұл мәселені шешу үшін қала әкімі Саудагерлер көпірінен Өскемен мен 6-Линия көшелерінің қиылысына дейінгі жолды кеңейтуді көздеп отыр. Қазіргі уақытта жобалық -сметалық құжаттама әзірленуде.
Нөсер-дренажды кәріз жүйелерін қалпына келтіру жұмыстары да қолға алынды. Белгілі бір кезең аралығында нөсер-дренажды кәріз жүйесі істен шыққан болатын. Соңғы жылдарда бұл кәріз жүйесі қайта қалпына келтіріле бастады. Ал биылғы жылы бұл жұмыс толық көлемде жалғасады. Кәріз жүйесі қалпына келсе, жауын-шашын кезінде көшелерді су басу жағдайы азаяды және жолдардың сапасын сақтап қалуға болады.
— Біз нөсер-дренажды кәріз жүйесін жабдықтауға және тазалауға 200 млн. теңгеге жуық қаржы бөліп отырмыз. Қаланың бірқатар аудандарында кәріз жүйесін тазалап, қалыпты жағдайға келтірдік. Жақын арада Дальняя, Глинка, Шәкәрім даңғылы көшелерінің бойындағы нөсер-дренажды кәріз жүйесін қалпына келтіруді жоспарлап отырмыз. Су қабылдайтын құдықтар мен резервуарлар орнатылады,- деді С.Жұманов.
Соңғы уақыттарда шаһарда бірнеше автобус аялдамалары жаңартылып, жаңа қоғамдық көліктер пайдалануға берілді. Ал биылғы жылы бұл бағытқа 20 миллион теңгеге жуық қаржы бөлініпті.
— Қаржылық мүмкіндіктерімізге қарай біз ескі автобус аялдамаларын жаңартуға тырысамыз. Бірқатар бағыттағы ескі автобустар жаңаланды. Ал биылғы жылы 20 миллион теңгеге жуық қаржы бөлінді. Жобалар дайын. Енді конкурс жариялап, жұмысқа кірісеміз,- дейді С.Жұманов.
Семейдегі жер асты өткелдерін жөндеу де біртіндеп қолға алына бастады. Жарықтандырылып, қар мен жаңбырдан қорғайтын шатырлар орнатылды. Жөл жөндеу жұмыстары осы қарқында жалғаса бермек. Естеріңізге сала кетейік, өткен жылы да 8 көшеге орташа жөндеу жұмыстары жүргізілген болатын.
Жадыра ТӨЛЕГЕНҚЫЗЫ, «Семей таңы»{jcomments off}
