Елімізде «Nur Otan» партиясы филиалдары жанынан көпбалалы және аз қамтылған отбасылардан шыққан балалардың құқығын қорғайтын кеңес құрылып, жұмысын бастады. «Nur Otan» партиясы Семей қалалық филиалы жанынан құрылған осындай кеңестің алғашқы отырысы 4 сәуір күні өтті.
Кеңес құрамына, жергілікті атқарушы билікпен қатар, қалалық мәслихат депутаттары, кәсіпкерлер, қоғамдық ұй-ым мүшелері, БАҚ өкілдері — жалпы саны 20 адам енген. Жиынды ашқан «Nur Otan» партиясы Семей қалалық филиалы төрағасының орынбасары, қалалық мәслихат депутаты Айнұр Арғын-бекованың айтуынша, кеңес тұрғын үй, еңбекпен қамту, материалдық көмек, ақпараттық-түсіндіру жұмыстары атты төрт бағытта жұмыс істейтін болады.
— «Nur Otan» партиясының 20 жылдағына орай 28 ақпанда өткен XVIII съезде партияның 2030 жылға дейінгі даму бағдарламасы бекітіліп, партия төрағасы «Ауыл – Ел бесігі», «Құтты мекен», «Халыққа көмек», «Бақытты отбасы» атты 4 жоба ұсынған болатын. «Бақытты отбасы» жобасы аясында республика көлемінде көпбалалы және аз қамтылған отбасылардан шыққан балалардың құқығын қорғайтын кеңестер құрылды. Мақсатымыз – балаларға әлеуметтік-материалдық көмек көрсетіп, құқықтық кеңес беру,- деп түсіндіріп өтті А.Арғынбекова.
Баяндама жасаған қаланың бас педиаторы Мәдениет Дайрабаеваның айтуынша, облыс әкімі Даниал Ахметовтің тапсырмасымен «Саламатты ана мен бала» акциясы аясында қаладағы төрт және одан да көп баласы бар отбасыларға медициналық тексеру жұмыстары кең көлемде жүргізілуде.
— Семейде кәмелет жасына толмаған төрт және одан да көп баласы бар отбасылардың саны 1229-ды құрайды. Осы санатқа жататын отбасының барлық мүшелері, яғни анасы, әкесі және балалары, тұрғылықты мекенжайына қарайтын емханаларда диагностикалық тексеруден өткізілуде. Акция аясында 1229 отбасының барлығы, оның ішінде 1228 ана, әке және 5316 бала қамтылды. Сондай-ақ учаскелік дәрігерлер, психологтер және әлеуметтік қызметкерлер үй аралау жұмыстарын жүргізіп, 525 бала медициналық тексеруден өтті, — деді М.Дайрабаева.
Бас педиатордың сөзіне сүйенсек, медициналық тексеруден өткен көп-балалы аналардың 613-не әртүрлі диагноздар қойылып, тыныс жолдары, гинекологиялық, қан, бүйрек және қан айналымы аурулары кең таралғаны анықталған.
Көпбалалы отбасынан шыққан балалардың балабақшамен, білім беру мекемелерімен, санаторий және лагерьлермен қамтылуы жөнінде қалалық білім бөлімі басшысының орынбасары Валентина Шипилова айтып берді.
Білім бөлімі өкілі мен бас педиатордың баяндамасын тыңдаған кеңес мүшелері көпбалалы отбасылармен жұмысты одан әрі жандандыруға тапсырма берді.
— Бәрі сіздер айтқандай жақсы болса, партияға келіп, қоғамдық қабылдаудан көмек сұрайтындар саны неге көп? Бір отбасының балалары әртүрлі мектептерде оқиды. Мұның бәрі халықтың осал тобына қиындық туғызып отыр. Осы мәселелерді шешуіміз керек,- дейді қалалық мәслихат депутаты Зүльфия Жамалтдинова.
Жиында айтылғандай, «Nur Otan» партиясының Семей қалалық филиалына баспана беру туралы өтінішпен келетін көпбалалы аналар саны артқан. Айнұр Арғынбекова айтып өткендей, алдымен соңғы бес жылда пәтерсіз жүргендердің қатарында есепке тұру керек. Содан кейін ғана тұрғын үй кезегіне алынуға мүмкіндік бар.
— Халықтың көпшілігі жеке кәсіпкерлікті дамыту үшін берілетін 252 мың теңге көлеміндегі қайтарымсыз грант жөнінде біле бермейді. Грант көлемін 500 мың теңгеге дейін ұлғайту туралы ұсыныс та қаралып жатыр. Көпбалалы аналар өз жобаларын қорғап, осындай жеңілдіктерді пайдалана алады,- деді Айнұр Арғынбекова.
Отырыс соңында қатысушылар кеңес отырысын екі айда бір өткізуге уағдаласты.
Жадыра Төлегенқызы «Семей таңы»{jcomments off}
