Семей мен Өскемен қалаларында жыл сайын ұйымдастырылып, дәстүрге айналған аудандардың ауылшаруашылығы өнімдерінің жәрмеңкесі биыл да жалғасын тапты. Қыстың қытымыр ауа райына қарамастан өткен сенбі күні Өр Алтайдың төрінде Үржар ауданы өскемендіктерге өз өнімдерін ұсынса, Семейде Бородулиха ауданының ауылшаруашылығы өнімдерін өндірушілері төмендетілген бағамен ет, сүт, көкөніс сияқты халық көп тұтынатын тауарларын саудалады.
Новопокровка ауылдық округінің әкімі Талғат Жаймұхамедовтың айтуынша, ауылдағы шаруа қожалықтары осы жәрмеңкеде 250 келідей ет, 160 литрге жуық өсімдік майын семейлік тұтынушыларға ұсынған.
Жәрмеңке жыл сайын өтсе де, биылғы жылдың өзіндік орыны бар. Аймақтағы бағаның тұрақтылығын сақтап тұру үшін атқарылып жатқан жұмыстардың бәрі де жәрмеңкемен байланысты. Айта кету керек, жәрмеңкеге Бородулиха ауданынан сегіз ауылдық округтің шаруа қожалықтары азық – түліктің он бір түрін саудаға салған екен.
{jcomments on}-Жәрмеңкеге сиыр, қой және шошқа еті әкелінді. Сонымен қатар сүт, ірімшік, қаймақ, жұмыртқа тәрізді өнімдер де бар. Өнімдер базар бағасынан анағұрлым арзан. Мысалы, сиыр еті 900 теңгеден, қой еті 950 теңгеден саудаланды, — дейді Бородулиха аудандық ауылшаруашылығы бөлімінің бастығы Мәжит Жақсылықов.
«Жәрмеңке өтеді» дегенді естіген қала тұрғындары да ертемен «Турист» қонақ үйінің маңына жиналып, арзандатылған өнімдерді керегінше қамтып алып жатты. Керегін осындай жәрмеңкеден алатындардың қатарында қала тұрғыны Жадыра Райымбекова да бар. Жадыра Ерлан-қызы әр апта сайын мұндай жәрмеңке ұйымдастырылып тұрса, халық та қалыптасып, тұрақты түрде тұтынар еді дегенді айтады.
«СТ — ақпарат»
