Биыл 16 сәуірде досымыз, мемлекеттік қызмет ардагері Виктор Николаевич Гладков 75 жасқа толады. Оның өмірі қаншама адамдарға үлгі болатын, «болмаса да, ұқсап бағуға» жетелейтін ғибратты ғұмыр болып табылады. Мен өз басым осы досымызды сонау өткен ғасырдың сексенінші жылдарынан бері білемін.
Ол менің Абай мұражайындағы әріптесім Айтжамал Сағатбекқызы Арықбаева мен оның жұбайы Аманның жан жолдасы болатын. «Досыңның досы – сенің де досың» дегендей, сол достарымыз арқылы танитынмын. Және де ол кісінің зайыбы Людмила Гладкова қаламыздағы майталман журналистің бірі еді. Абай мұражайы ежелден шығармашылықтың, ғылымның, мәдениеттің ордасы болғандықтан, біздер, мұражай қызметкерлері, өнер адамдарын, ақын-жазушыларды, баспасөз саңлақтарын жақын тұтып, өзімізде өткізілетін мәдени іс-шараларымызға шақырып, бірлесіп өткізіп, пікір бөлісетінбіз.
1989 жылы мен Семей облыстық атқару комитетіне қызметке ауыстым. Мүлдем жаңа орта, мемлекеттік қызмет саласы, мен болсам мәдениет саласынан келіп отырмын. Атқару комитетінің жұмысына бірден араласып кетуіме, ешқандай жаттық көрмеуіме өзімді қызметке қабылдаған А.С.Еременко, өзімді қызметке шақырған П.А.Пуреев, осында бұрыннан жұмыс істеп келе жатқан жолдастар Т.М.Кенжебаев, А.Қ.Бектемісов, өзім сөз қозғап отырған Виктор Николаевичтер жақсы ықпал етті. Олардың жылы көзқарасы, ақыл-кеңестері, ықыласы маған қанат бітіргендей болушы еді. Содан бері отыз жыл уақыт өтіпті. Бірақ бәрі де күні кеше ғана болғандай, көз алдыда.
В.Н.Гладков Ұлы Отан соғысы жүріп жатқан 1944 жылғы 16 сәуірде ұстаздар отбасында дүниеге келген. Ол да ата-анасының жолын қуып, өскелең ұрпаққа тәрбие-білім беру үшін Барнауыл педагогикалық институтының физика-математика факультетіне оқуға түседі. Институттың үшінші курсында оқып жүрген кезінде ол Алтай комсомолы шефтік ететін Балтық флотының «Свердлов» крейсеріне әскери қызметке шақырылады. В.Гладков институтты 1969 жылы бітіреді.
Флоттағы қызмет Виктор Николаевичтің өміріне ерекше із қалдырған кезең болады. Ол 8 алыс жорыққа қатысып, сұлу Жер-анамыздың қаншама қиырларын шарлайды. Жерорта теңізі, Атлант мұхитында, Англия, Шотландия, Дания, Гренландия елдерінде, екі рет поляр шеңберін айналып, Норвег теңізінде, тағы да басқа жерлерде болады.
Виктор Николаевич өзінің теңіздегі қызметі, теңізшілердің жауынгерлік бауыр-ластығы, әскери қызмет барысындағы бастан кешкен түрлі қызықты оқиғаларын сағаттар бойы талмай әңгімелеуге бар. «Свердлов» крейсерінің ұзындығы 210 метр, көлденеңі 22 метр, ватерлиниядан клотикке дейінгі биіктігі 57 метр болатын осы алып кеме Алтай өлкесінің Виктор сияқты 250 өреніне төрт жыл бойы баспана, екінші ұя болды. 1965 жылдың өзінде ғана Виктор Николаевич теңізде 5 ай жүріп, 20 мың миль жол жүріп, екі алыс жорыққа қатысады. Сол жылы ол «Ұлы Отан соғысы Жеңісінің 20 жылдығы» медалімен және «Алыс жорықта болғаны үшін» жетонымен марапатталады.
Институтты бітіргеннен кейін В.Гладков Алтай өлкесі Пролетар орта мектебіне жұмысқа орналасып, мектеп директорының оқу ісі жөніндегі орынбасарлығына дейін жоғарылайды. Жас ұстаз В.Гладков өзінің белсенді өмірлік көзқарасымен көзге түсіп, Алтай аудандық партия комитетінің нұсқаушысы қызметіне шақырылады.
1971 жылы Семей қаласына қоныс аударады. В.Н.Гладков Семей облысы Жаңасемей аудандық атқару комитетінде де өзінің бастамашылдығымен, шығармашылық белсенділігімен көзге түсіп, аудандық партия комитетіне жұмысқа ауысып, біраз уақыттан кейін облыстық атқару комитеті төрағасының бірінші орынбасарының көмекшісі қызметіне тағайындалады.
В.Н.Гладковты облыстық атқару комитетінің басшылары А.С.Еременко, Е.Қ.Қашағанов, облыстық атқару комитеті төрағасының бірінші орынбасары Н.Қ.Қабышев, Жаңасемей аудандық партия комитетінің бірінші хатшысы В.Н.Дүкембаев, облыстық атқару комитетінің хатшысы Х.У.Дәуітовтер жас маман ретінде баулып, үлкен қамқорлық жасап, білікті маман болып қалыптасуына зор еңбек сіңірді.
Жас мемлекетіміздің егемендігін алып, құрылып, қалыптаса бастаған кезінде В.Н.Гладковтың алғырлық, шұғыл шешім қабылдай білу қасиеттері ерекше сұранысқа ие болып, ол қала әкімінің № 6 муниципалдық округтегі өкілі міндетін 10 жылдан астам уақыт бойы атқарып, осы округтің құрамына кіретін Қызыл Кордон, Солтүстік, Темір жол, Березовск, Аксаринск кенттерінде өзіндік із қалдырып, 20 өнеркәсіп кәсіпорны, жекеменшік фирмалар, 4 мектеп, 7 ПИК жұмыс істейтін осы аумақта қыруар жұмыс жүргізіп, қаланың шет аймақтарын әкімдікпен байланыстыратын буынның бірі болды. Ол округ тұрмысының түрлі мәселелері бойынша тұрғындарды қабылдап, мектептерде болып, учаскелік тәртіп сақшыларымен бірлесіп түрлі күрделі мәселелерді шешіп, округті абаттандыру жұмыстарын білек сыбанып атқарды. Фестивальная көшесі мен Березовск кентіне асфальт төсетуге көп еңбек сіңірді. Сондай-ақ ол округтегі тұрмысы төмен отбасыларға атаулы әлеуметтік көмек көрсетуге де зор үлес қосты. Округ халқының құрметі мен ықыласына бөленді.
Қазірде зейнет демалысында жүрсе де, В.Н.Гладков әкімдіктің ардагерлер ұйымы кеңесінің мүшесі ретінде қоғам өміріне белсене араласып, қоғамдық жұмыстар атқаруда. Өзі спортқа баулыған немерелері Виталий мен Павел Гладковтар — екеуі де спорт шебері, Қазақстан чемпиондары атағын иеленген.
Мерейтойы күні біз өзіміздің теңіз жанды досымызды шын жүректен құттықтап, бақыт, денсаулық, табыс тілейміз.
Зере ОРАЗАЛИНА, әдебиетші, журналист.{jcomments off}
