Семейде Жастар жылы аясында «Рухты Шығыс» тақы-рыбымен Аrt-фестиваль болып өтті. Аймақтық деңгейдегі айтулы шара аптаның сенбісінде Бейбітшілік аралында жастардың қатысуымен өткен эко-сенбілік шараларымен бастау алды.
Әйтсе де Аrt-фестивальдың ресми түрдегі салтанатты ашылу рәсімі дүйсенбі күні Абай ескерткішіне гүл шоқтарын қоюмен басталды. Бұл шараға қаланың белсенді жастары, «Жас Отан» жастар қанатының өкілдері, әр салада жетістікке жеткен облыс жастары қатысты. Жиынның беташарында қалалық ардагерлер кеңесінің төрағасы Амантай Доғалақов құттықтау сөз сөйлеп, ізгі тілек білдірді.
Осыдан соң сағат 11.00-12.30 аралығында қаладағы бірқатар мұражайлар мен оқу орындарында «Қазақ күресі» палуаны, ауыр салмақ дәрежесіндегі халықаралық санаттағы спорт шебері, «Әлем Барысы» чемпионатының жеңімпазы, Қазақстан Республикасы Тұңғыш Президентінің «Қазақстан Барысы», «Еуразия Барысы» турнирлерінің жеңімпазы Айбек Нұғымаровпен, «Қазақстанның 100 жаңа есімі» жобасының жеңімпазы ақын Ержан Жұмабекпен, физик-ғалым Серік Нұркеновпен, режиссер Валентин Алифановпен, сонымен қатар жоба финалисі, әнші Евгений Выбловпен диалогтік алаңдар ұйымдастырылды.
Сондай-ақ жас суретшілер үшін шеберлік сыныбы мен көрме ұйымдастырылып, қалалық Мәдениет сарайында ұлттық ойындар, Freestyle, Домбыра party, ұлттық караоке, ұмыт қалған қазақ тағамдарының байқауы сынды тақырыптық алаңдар жұмыс істеді.
Аймақ жастарының басын қосқан Аrt-фестиваль аясындағы мазмұнды шаралар жайында толығырақ газетіміздің келесі санынан оқи аласыздар.
«СТ» ақпарат
{jcomments off}
