Адамзат баласына өмір сыйлайтын аяулы да қымбатты жан- ана бейнесі ақындар жырларына арқау, жазушылар шығармаларына кейіпкер болған. Жүрсін Ермановтың «Қай жерде, мейлі, қай елде, Әлемнің мәні — әйелде. Мықтымын десең ойыңды, Әйелге барып дәлелде» деп жырлауының өзі нәзік жандылардың, сайып келгенде аналардың қоғамдағы рөлін аңғартатындай.
«…Ал, қазақ, мешел болып қалам демесең, тағылымыңды, бесігіңді түзе! Оны түзейін десең, әйелдің халін түзе!» – деп М.Әуезов халыққа ой тастаған. Иә, халықтың әл-ауқатының көрсеткіші ана мен баланың жағдайы іспетті. Бұл орайда мемлекет басшысы да ана мен балаға барынша жағдай жасап, жан-жақты қолдау көрсетуде. Елбасының үстіміздегі жылдың 21 қаңтарындағы №736 Жарлығымен өткен жұма күні қалалық әкімдікте бірқатар аналарға «Күміс алқа» төсбелгісі тапсырылды.
Бір қолымен әлемді, бір қолымен бесікті тербеткен аналарды марапаттау рәсіміне қала әкімінің орынбасары Зәуреш Исабаева, қалалық ардагерлер кеңесінің төрағасы Амантай Доғалақов, жұмыспен қамту және әлеуметтік бағдарламалар бөлімі басшысының орынбасары Қалиас Жұмабай қатысты. Қаламыздан Майраш Олжаева, Жанар Кұрманболатова, Гүлнар Тырнаханова, Абыралы ауылдық округінен Ләззат Акимова, Таңат ауылдық округінен Гүлжанат Мұқашева сынды аналарға Елбасының қолтаңбасы қойылған кітапша мен «Күміс алқа» төсбелгілерін табыстаған қала әкімінің орынбасары Зәуреш Исабаева аналар атына жылы лебізін білдіріп:
{jcomments on}- «Ең әдемі әйел – өмірге көп бала әкелген ана» деген халқымыз. Сіздер өмірге ұрпақ әкеліп, сұлулыққа бөленіп, олардың қызығын көріп отырсыздар. Халқымыз «Бір қозы туса, бір түп жусан артық шығады», «әр баланың өз ырызығы бар» деген. Балаларыңыздың қызығын көріңіздер. Отбасыларыңызға бақыт тілеймін. Қала әкімі Айбек Кәрімовтің атынан, өз атымнан сіздерді құттықтаймын! – дей келе, бүгінгі таңда қаламызда «Алтын алқа», «Күміс алқа» төсбелгілерімен марапатталған 2500-ден аса аналар бар екенін, өмірге көп бала әкеліп, еліміздің демографиялық дамуына атсалысып жатқан ана-ларға мемлекет тарапынан қолдау зор екендігін де айтып өтті.
Өз кезегінде жұмыспен қамту және әлеуметтік бағдарламалар бөлімі басшысының орынбасары Қалиас Жұмабай былтырғы жылы мемлекеттен аналарға ай сайын 10500 теңге көлемінде жәрдемақы беріліп келсе, Елбасы Жолдауына сәйкес, 7 пайыз үстемемен биыл 11 282 теңге берілетіндігін, зейнет жасындағы аналарға зейнетақыға үстеме қосылатынын, 8 наурыз — Халықаралық әйелдер күні және 1 маусым — Балаларды қорғау күніне орай қала әкімдігі тарапынан 5 мың теңге сыйақының берілетіндігін де атап өтті.
Марапатқа ие болып отырған 60-тың асқарына шыққан Майраш апа 6 құрсақ көтерген, тұла бойы тұңғышы орда бұзар отыздың бесеуіне, сүт кенжесі жиырманың үшеуіне толыпты. Ал, ең жас «Күміс алқа» иегері Гүлнар Тырнаханова 33 жаста. Ол да 6 балаға әлемнің жарығын сыйлаған. Балаларының үлкені алғашқы мүшел жаста болса, кенжесі 1 жастан асқан сәби. Аналар өздеріне көрсетілген құрметке ризашылықтарын білдіріп, қолдау танытып отырған мемлекет басшысына, қала әкіміне алғыстарын айтты.
«Сіздердің балаларыңыз «Мәңгілік Елде» өмір сүретін, сол елді гүлдендіретін болады», — деген қалалық ардагерлер кеңесінің төрағасы Амантай Доғалақов:
— Саналы ұрпақ тәрбиелеп, қатарынан қалдырмай, жеткізу оңай шаруа емес. Сіздердің сыртқы бейнелеріңізге қарап отырып, жолдас-тарыңыздың сіздерді сыйлап, күтетіндіктеріне көз жеткізгендей болып отырмыз. Әкелерге мың ал-ғыс, — дей келе, бүгін «Күміс алқа» иеленген аналар ертең «Алтын алқа» төсбелгілерімен марапатталсын, — деген тілегін жеткізді.
Жиын соңында З.Исабаева: «Бәсекеге қабілетті 30 елдің қатарына қосылуымыз үшін Елбасымыз «ұрпақтарымыз белсенді, білімді және денсаулығы мықты азаматтар болуы керек» деген болатын. Сол білімді, денсаулығы мықты азаматтарды бүгін сіздер тәрбиелеп отырсыздар. «Мәңгілік Елдің» ұрпақтары мәңгі жасасын», — деп жиынды қорытындылады.
Әйгерім СӘРСЕНҒАЛИ,
«Семей таңы»
