Жуырда қаламыздағы Экономикалық лицейдің спорт залында Қазақстан Республикасы мәслихаттарының 25 жылдығына орай ұйымдастырылып, 16 ақпанда басталған «Аула футболы лигасы» атты шағын футболдан қалалық біріншіліктің қорытынды сайысы болып өтті. Тұңғыш рет өткізілген сайысқа қаладағы аула клубтары мен жалпы білім беретін мектептерден 49 команда, атап айтсақ 2007, 2008, 2009 жылдары туған 650-ден аса оқушы қатысты.
Сөз орайында айта кетсек, байрақты біріншілікті Семей қалалық мәслихаты, Семей қаласының білім бөлімі және «Vostok Semey» футбол мектебі ұйымдастырып, демеушілік көрсетті. Ал чемпионатты білім бөлімінің «Аула клубтары қауымдастығы» ҚМКМ өз мәнінде өткізді.
Жалпы, чемпионат барысында командалар арасындағы кездесулер тартымды әрі шиеленісті өрбіді. Жас футболшылар жоғары даярлықпен келгендерін ойын барысында көрсете білді. Біріншілікті тамашалауға жанкүйерлер де көп жиналды.
Бұл спорт бәсекесінде барлық қатысушылар тәжірибелерін толықтырып, ойын шеберліктерін арттыруға үлкен мүмкіндік алды. Тартысты өткен сайыстар жас спортшыларға ұмытылмас әсер сыйлағаны анық. Өрнекті өрбіген ойын барысында мықты командалар суырылып алға шығып, ақтық финалда жеңімпаздар анықталды.
Тоқтала кетсек, 2007 жылы туған өрендер арасында І орынды «Жемчужина» аула клубы жеңіп алса, ІІ орынды «Кристалл» командасы, ІІІ орынды №23 орта мектебі иеленді.
Ал 2008 жылы туған балалар арасындағы сайыста бас жүлдені «Ертіс» аула клубы, ІІ орынды №3 мектеп, ІІІ орынды «Кристалл» командасы жеңіп алды.
2009 жылғы балалардың жарысы бойынша жүлделі І орынды «Кристалл» командасы, ІІ орынды №3 мектеп оқушылары иеленсе, ІІІ орынды «Квадрат» командасының өрендері қанжығаларына байлады.
Жас футболшылардың барлығы да естелік сертификаттарға ие болды. Жеңімпаз командаларға футбол доптары тарту етіліп, кубоктармен, дипломдармен, жеке куәліктермен және осы чемпионат үшін арнайы әзірленген медальдармен марапатталды.
Чемпионаттың жабылу салтанатында қалалық мәслихат хатшысы Бейсенбек Ақжалов, білім бөлімінің басшысы Наталия Фесенко, қалалық мәслихаттың депутаттары Әсетқан Досқожанов, Андрей Алтайбаев, Дариға Дайрова, «Vostok Semey» футбол мектебінің құрылтайшысы Арман Мәшімов, «Аула клубтары қауымдастығының» директоры Тимур Мұрсәлімов жас спортшыларға ізгі тілектерін білдірді, жеңімпаздарды құттықтап, лайықты марапаттарын табыс етті.
Семей қаласы мәслихаты.{jcomments off}
