Дүйсенбі, 15 сәуір күні Электротех-никалық колледждің WorldSkills алаңында «Nur Otan» партиясы жанындағы «Жас Отан» жастар қанатының «Digital tаlks» партиялық жобасы аясында студенттер мен оқушылар өзара тәжірибе алмасты. Кездесуге «Жас Отан» жастар қанатының белсенді мүшелері, оқушылар және студенттер қатысты.
Елбасының «Цифрлық Қазақстан» жобасын өңірлерде жүзеге асыру мақсатында «Жас Отан» жастар қанатының «Digital tаlks» атты партиялық жобасы іске асырылуда. Жобаның мақсаты – Елбасы бастамасына қолдау білдіріп, оның маңыздылығын насихаттау, жастар арасында 3D модельдеу, робототехника, ІТ-технология салаларын дамыту.
— Цифрлық Қазақстан» бағдарламасы халықтың өмір сүру деңгейін жоғары сатыға көтеріп, көптеген әлеуметтік мәселелердің оң шешімін табуға заманауи тұрғыдан мүмкіншіліктер жасайды. Алдымызда дамыған отыз елдің қатарына ену мақсаты тұр. Сондықтан уақыттың үдесінен шығу үшін ІТ-технологияны дамытып, жаңа талаптарға сай біліммен қарулануымыз керек. Жастар бұл жауапкершілікті жақсы түсінеді. Облыс әкімі Даниал Кенжетайұлының бастамасымен әр мектепте робототехника кабинеттері ашылып, оқушылардың жаңа технологияларды меңгеруіне жол ашылды. Ал «Цифрлық Қазақстан» бағдарламасын жүзеге асыруда Электротехникалық колледж жанынан ашылған ІТ орталықтың маңызы ерекше. Мұнда кез келген қала тұрғынына есік ашық, — дейді «Жас Отан» жастар қанатының Семей қалалық филиалы жетекшісі Алмас Айтмұқаш.
ҚР Тұңғыш Президенті — Елбасы Нұрсұлтан Әбішұлы «Қазақстанның Үшінші жаңғыруы: жаһандық бәсекеге қабілеттілік» атты Қазақстан халқына Жолдауында: «Біз цифрлы технологияны қолдану арқылы құрылатын жаңа индустрияларды өркендетуге тиіспіз. Бұл – маңызды кешенді міндет. Елде 3D-принтинг, онлайн-сауда, мобильді банкинг, цифрлы қызмет көрсету секілді денсаулық сақтау, білім беру ісінде қолданылатын және басқа да перспективалы салаларды дамыту керек. Бұл индустриялар қазірдің өзінде дамыған елдердің экономикаларының құрылымын өзгертіп, дәстүрлі салаларға жаңа сапа дарытты»,- деп бағдар берген болатын. Осы міндеттерді жүзеге асыру аясында оқу орны директоры Азат Сарпековтің бастамасымен және «Nur Otan» партиясының қолдауымен Электротехникалық колледж базасында Wordskilles алаңы мен ІТ-орталық құрылып, қала тұрғындары мен жастарға, мұғалімдерге тегін білім берілуде.
— «Nur Otan» партиясы мен аймақ басшысы Даниал Ахметовтің қолдауымен қаламыздағы әр мектепте ІТ-кабинеттер ашылды. Мұнда біз F3 жинағындағы Lego құрылғылары арқылы роботтар құрастырамыз. Облыстық жарыстарға да қатысып, жақсы жетістіктерге жетіп жүрміз. Бүгінгі тәжірибе алмасу алаңына «Гонка по линий» деген роботтарды алып келдік. «Гонка по линий» роботы қара түсті жолақпен жүреді. Ол ультрадыбыс арқылы қарсыласын көріп, оны алаңнан итеріп тастауы керек. Робот алаңнан шықпас үшін қара түс қойылады. Қара түсті көргенде қайтадан алаңға оралады. Қарсыласын бірінші болып алаңнан шығарған робот жеңіске жетеді. Тағы бір жарысымыз «Кегл-ринг» деп аталады. Мұнда да робот кеглдарды көріп, алаңнан шығарып тастауы керек,- дейді Семей қаласындағы жалпы орта білім беретін №22 мектептің 7 сынып оқушысы Заңғар Берікханов.
Диалогтік алаң барысында №15, 22, 26 жалпы орта білім беретін мектептердің оқушылары роботтарын таныстырып, олардың қозғалыс және жұмыс істеу тәртібін түсіндірді. WorldSkills аудиториясындағы 3D модельдеу, робототехника жəне бағдарламалау құрылғыларымен, колледж студенттерінің еңбектерімен танысты.
Кездесу соңында оқушыларға «Жас Отан» жастар қанатының алғыс хаттары табысталды.
Жадыра ТӨЛЕГЕНҚЫЗЫ, «Семей таңы»{jcomments off}
