«Әдеби өлкетану». Бұл – Қазақстан Жазушылар одағының ауқымды жобаларының бірі. Елбасының «Рухани жаңғыру» бағдарламасы шеңберінде ҚР Президенті Әкімшілігінің қолдауымен жүзеге асырылып отырған жоба негізінде әр өңірден арнайы шығармашылық топтар құрылып, белгіленген жоспар бойынша облыстар мен қалаларға, аудандарға әдеби экспедициялар ұйымдастырылуда. Ақмола облысынан бастау алып, Тараз, Қызылорда, Алматы, Түркістан, Маңғыстау, Павлодар, Атырау облыстарында, елордамыз Нұр-Сұлтан қаласында жалғасын тапқан жоба бүгінде Семейдегі әдеби-мәдени экскурсияға ұласты.
«Әдеби өлкетану» жобасын Қазақстан Жазушылары одағы мен ШҚО әкімдігі бірлесіп жүзеге асыру үстінде. Аталмыш жаңа жоба аясында Семейдегі облыстық тарихи-өлкетану музейі мен Жазушылар одағының Семей филиалы бірлескен түрде шығармашылық жұмыстар жүргізуде. Мақсат – облыстағы киелі орындар туралы кітап шығару. «Әдеби өлкетану» шығармашылық тобы Семей, Аягөз, Қалбатау, Көкпекті, Үржар, Тарбағатай, Бесқарағай, Бородулиха, Абай аудандарындағы бірқатар қастерлі орындарды қамтымақ.
Сәуірдің 19-ы күні Семейдегі облыстық тарихи-өлкетану музейінде танымал қаламгерлер белгілі ақын Әбубәкір Қайран, әдебиет сыншысы Бағашар Тұрсынбайұлы және жазушы Айгүл Сейілова қаладағы облыстық тарихи-өлкетану музейі мен Абай атындағы кітапханада болды. Олар Қазақстан Жазушылар одағының Семей қаласындағы филиалы мен өлкетану мұражайының бірлесе ұйымдастырған кездесу жиынына қатысып, зиялы қауым өкілдерімен, ұстаздармен және студент жастармен тілдесті. Семейдің тарихымен, өлке тынысымен терең таныстыруға арналған басқосуда жиналған жұртшылыққа тың деректер ұсынылды.
Әбубәкір Қайран Семей қаласының тарихы жайында сыр шертетін еңбек жазған. Жүз беттен тұратын кітапта қаланың өткені мен бүгіні бүге-шігесіне дейін талданған. Ақын еңбегінде өңір неліктен Семей деп аталды, «Жеті шатыр» ұғымының мән-маңызы, Семейден 30-40 шақырымдық жерде Семейтау деген өңірдің бар екені, «Семей» сөзі «кең мекен» деген мағынаны білдіретіні жөнінде нақты деректерге сүйене отырып жазылған мәліметтер келтірілген.
Бұл ретте Әбубәкір Қайран Алаштың рухани астанасы киелі Семей туралы тырнақалды туынды жазу кез келген қаламгер үшін зор құрмет екенін тілге тиек етсе, Бағашар Тұрсынбайұлы Абайдың табаны тиген өңірге келіп зерттеу жұмыстарын жүргізу үлкен абырой екенін айтты.
Кездесу соңында қаланың зиялы қауым өкілдері өлке тарихына қатысты өздерін толғандырған мәселелерге тоқталып, ұсыныстарын ортаға салды.
Жиын өнер иелерінің орындауындағы Абайдың әндерімен әдемі қорытындыланды.
Республикамыздың әр аймағындағы әдебиет пен мәдениетті тереңінен танып біліп, өлке тарихын зерттеп-зерделеп, оны көркем тілмен жеткізу ұлттық мұрамызға қосылатын сүбелі үлес, қазақ әдебиетінің өркендеуіне жол ашу деп білемін. Бүгінгі күн — ертеңгі тарих. Сондықтан ел өмірінің өткені мен бүгінгі күнін үндестіріп, келешекке мұра ретінде қалдыратын әдеби туындылардың болғаны абзал. Бұл тұрғыда «Рухани жаңғыру» бағдарламасының аясында жүзеге асып жатқан игі істердің септігі мол болмақ.
Наргиз АЙМҰХАМЕТОВА,
Шәкәрім атындағы университеттің студенті. {jcomments off}
