Өткен аптаның бейсенбісі, 18 сәуір күні Семейдің облыстық тарихи-өлкетану музейінің «Ерлік пен Еңбек даңқы» бөлімі Семей қаласының Қорғаныс істері жөніндегі басқармасымен бірлесе отырып, жылдағы дәстүр бойынша, Қалалық Мәдениет сарайында Қазақстан Республикасының Қарулы Күштері қатарына шақырылушыларға арналған «Әскерге шақырылушылар күні» атты кеш өткізді.
Өткен аптаның бейсенбісі, 18 сәуір күні Семейдің облыстық тарихи-өлкетану музейінің «Ерлік пен Еңбек даңқы» бөлімі Семей қаласының Қорғаныс істері жөніндегі басқармасымен бірлесе отырып, жылдағы дәстүр бойынша, Қалалық Мәдениет сарайында Қазақстан Республикасының Қарулы Күштері қатарына шақырылушыларға арналған «Әскерге шақырылушылар күні» атты кеш өткізді.
Шараның мақсаты – болашақ сарбаздарға құрмет көрсетіп, жасөспірімдерді қазақстандық патриотизмге тәрбиелеу.
— Семей қаласының Қорғаныс істер жөніндегі басқармасыСемейдің облыстық тарихи-өлкетану музейінің қызметкерлерімен бірлесе отырып жылына екі мәрте, көктемгі және күзгі әскерге шақыру маусымында, Әскерге шақырылушылар күнін салтанатты түрде атап өтеді. Мұндағы мақсатымыз — әскери қызметті насихаттау және әскерге шақырылушылардың патриоттық сезімдерін арттыру. Қаламызда әскерге баруға өтініш білдіруші жастар саны артып келеді. Теңіз флотына, шекараға, әуе қорғаныс істеріне сұранатын жігіттер көп. Қазір елімізде әскери салада қызмет етушілерге барынша қолдау көрсетіліп жатқанын жақсы білесіздер. Сол себепті әскери қызметке деген қызығушылық та жоғары. Екінші жағынан, әскерге барып, Отан алдындағы борышын өтеп қайту – кез келген азамат үшін үлкен абырой,- дейді Семей қаласының Қорғаныс істері жөніндегі басқармасының әскери-патриоттық жұмыс жөніндегі инспекторы Кенжебай Бердікенов.
Көктемгі әскерге шақыру наурыз-маусым, ал күзгі әскерге шақыру қазан-желтоқсан айлары аралығында жүзеге асады. Әскерге отбасын құрған, оқу оқып жүрген жастарды қоспағанда, 18-27 жас аралығындағы азаматтар шақырылады. Солардың бірі – Әлихан Несипбаев. Ол зымыран әскері және артиллерия саласында борышын өтеуді құп көрген екен.
— Отанын қорғау – әрбір ер жігіттің міндеті, киелі парызы. Отан алдындағы борышымды өтеп, әскери қызметте істеуді көптен бері армандайтынмын. Әр солдаттың арманы генерал атану десек, мен де сол күнге жеткім келеді. Отаныма ақтық деміміз қалғанша қызмет етуге дайынмын. Ер жігіттің басына нелер келіп, не кетпейді. Біз бәріне дайын болып, сынақтарды көтере білуіміз керек,- дейді Әлихан.
Республикамызда әскери саланы жастар арасында насихаттау жұмыстары кең көлемде жүргізілуде. Солардың бірі «Айбын» әскери-патриоттық жастар жиыны биыл қаламызда бесінші мәрте ұйымдастырылды. Елімізде әскери қызметкерлерді баспанамен қамту, тегін медициналық тексеру сынды бірқатар әлеуметтік жеңілдіктер қарастырылған.
Салтанатты кеш барысында әскерге шақырылушылар мен қала мектептерінің оқушылары және колледж студенттері Ұлы Отан соғысының ардагерлерімен, интернационалист жауынгерлермен, ҚР Қарулы Күштерінің ардагерлерімен кездесіп, ақыл-кеңестерін тыңдады.
Кеш Қалалық Мәдениет сарайы өнерпаздарының концертіне ұласты.
Айта кетейік, қаламыздан жылына 500-ге жуық жас әскер қатарына алынады.
Ж.ТӨЛЕГЕН, «Семей таңы»{jcomments off}
