Апта сәрсенбісінде қалалық Достық үйінде Қарағайлы ықшам ауданындағы үйлердің құрылысы мен пайдалануға берілу барысы бойынша арнайы баспасөз мәслихаты болып өтті. Аталмыш басқосуға «Тұрғын үй құрылыс жинақ банкі» АҚ Семей филиалы мен құрылысты жүргізуші мердігер фирмалар өкілдері, қалалық сәулет және құрылыс бөлімінің мамандары қатысып, толыққанды мағлұмат беріп, журналистер тарапынан қойылған сауалдарға жауап қайырды.
Баспасөз мәслихатының беташарын «Тұрғын үй құрылыс жинақ банкі» АҚ Семей филиалының бизнесті дамыту бөлімінің басшысы Меруерт Ахметуллина алғы сөзбен ашып, аталмыш тақырып төңірегінде мәлімет беріп өтті.
— Қазіргі таңда семейлік банк салымшылары үшін мемлекеттік «Нұрлы жер» бағдарламасы бойынша пәтерлер сатып алу мүмкіндігі бар. Ал ол үшін банкке барып өтініш беріп немесе байқауға қатысып әуре болып жатудың қажеті жоқ. Банктің сайтына кіріп, ұнаған пәтерді таңдап алып, өтінім қалдырсаңыз жеткілікті,- деді ол өз сөзінде.
Бүгінгі күндері «Тұрғын үй құрылыс жинақ банкі» салымшылары үшін дәл Семей қаласында жылжымайтын мүлік иесі атану үшін мүмкіндік мол әрі жан-жақты. Атап айтсақ, аталмыш банк тарапынан жаңадан бой көтеріп жатқан Қарағайлы ықшам ауданындағы 8 нысаннан 368 пәтер ұсынылуда. Орманның жанында, ең әдемі жерде орналасқан үйлердің тұрғындары үшін таяу болашақта барлық жағдай жасалынатын болады. Балабақша, мектептер салынбақ. Сондай-ақ «Абай Арена» спорт кешені пайдаланылуға беріледі. Яғни, бұл аудандағы тұрғын үйлерден пәтер алудың тиімділігі арта түспек.
— Банк салымшылары үшін барлық пәтерлердің әр шаршы метрі 140 000 теңгеден беріледі. Дегенмен жаңа үйге қоныстанғысы келетіндерге қойылатын талаптар бар. Атап айтсақ, «Тұрғын үй құрылыс жинақ банкі» салымшысының есепшотында ең кемі 1,1 млн теңге жатуы тиіс. Немесе сатып алынатын алаңның 20 пайызының ақысы болуы керек. Бұл — «Нұрлы жер» бағдарламасына қатысудың негізгі талабы. Осыдан соң банк қолжетімді баспананы 5 пайыздық жылдық ставкамен сатып алуға көмектеседі. Бұл орайда несие беру бойынша әр айда төленетін сома көлемі 40 000 теңге болмақ. Жалпы құны 5,7 млн. теңгені құрайтын бір бөлмелі пәтердің алдын ала есебі шамамен осындай, — деді бөлім басшысы.
Тағы бір айта кетер жайт, баспана алу арнайы бағдарлама аясында жүргізілетіндіктен, өзіндік талаптары бар. Яғни, әр үміткер Қазақстан Республикасының азаматы болуға тиіс немесе оралман статусы болуы керек. Сонымен қатар ел аумағында жекеменшік жылжымайтын мүліктері болмауы міндетті. Бұл талап бойынша соңғы бес жыл есепке алынады екен. Бұл талаптың пәтер алғысы келетін азаматтың отбасының әр мүшесіне де қатысы бар. Сондай-ақ өтініш берушінің төлем жасай алу қабілеті де ескерілетін болады.
— Банктің мақсаты – өз салымшыларын қолжетімді баспанамен қамтамасыз ету. Біз бұл бағыттағы жұмыстарды үзіліссіз жүргіземіз. Әрі осы тарапта бізге жергілікті әкімдік пен құрылыс фирмалары көмекке келуде. Қазіргі күні өз клиенттерімізге 500 пәтер ұсынуға әзірміз. Оның 368-і мемлекеттік бағдарлама аясында беріледі. Сол тәрізді банктің «Өз үйім!» атты жеке бағдарламасы аясында бүгінгі күні 136 үй берілуге дайын. Барлық баспаналар құрылыс жұмыстары толық аяқталған, әрленіп, сырланған күйде беріледі.
Банк өкілі сонымен қатар жаңадан қолға алынған мемлекеттік «Бақытты отбасы» жобасы жайында да айтып өтті. Аталмыш жобаның жүзеге асуын қалалық әкімдік және жергілікті «Nur Otan» партиясы филиалы өз бақылауына алған. Жаңа жоба көпбалалы отбасыларға арналған.
Бөлім басшысы сонымен қатар банктің жеке бағдарламасы жайында да кеңірек түсінік беріп өтті. Яғни «Өз үйім!» бағдарламасы «Нұрлы жер» мемлекеттік бағдарламасына қатыса алмайтын салымшыларға арналған десе де болады.
«Өз үйім!» бағдарламасына Тұрғын үй құрылыс жинақ банкінің кез келген салымшысы қатыса алады. Оған ешқандай шектеулер жоқ. Жеке баспанасы барлар да үміткер бола алады. Бағдарламаның артықшылығы да сонда..
Қазіргі таңда әрбір жетінші семейлік Тұрғын үй құрылыс жинақ банкі салымшысы ретінде тіркеліпті. Филиалда барлығы 44 407 депозит бар екен. Банк есепшотында алғашқы төлем жасауға жетерлік қаржысы бар кез келген азамат өзінің баспана мәселесін дәл бүгін-ақ шеше алады.
Баспасөз мәслихаты барысында сонымен қатар «Азия» ЖШС өкілі Арлан Көзбаев, сәулет және құрылыс бөлімінің маманы Сәния Жұмабаева да сөз алып, Қарағайлы ықшам ауданы бойынша баспана беру мәселесінің оң шешім тауып жатқанына тоқталып өтті. Тұрғын үйлер салуға тапсырыс беруші қалалық әкімдіктің сәулет және құрылыс бөлімі жергілікті мердігер мекемелермен арадағы жасалған келісімшарт пен жүргізіліп жатқан жұмыстар барысы жайында кең көлемде мағлұмат берді.
Қ.ӘЛІМБЕК, «Семей таңы»{jcomments off}
