Мемлекет басшысы Шығыс Қазақстан облысына сапары барысында қасиетті де киелі мекен Жидебайда болып, Абай мен Шәкәрімнің рухына тағзым етіп, Құран бағыштады.
Қазақстан Президенті Қасым-Жомарт Тоқаев пен облыс әкімі Даниал Ахметовті Абай ауданының әкімі Жарқынбек Байсабыров, еңбек ардагерлері, зиялы қауым өкілдері қарсы алды.
Мемлекет басшысын Семейдегі Абайдың «Жидебай-Бөрілі» мемлекеттік тарихи-мәдени және әдеби-мемориалдық қорық-музейінің директоры Болат Жүнісбеков кесене басында, Абайдың 175 жылдық торқалы тойы қарсаңында атқарылып жатқан жұмыстармен таныстырды.
— Абай қазақта жалғыз,-деді Қазақстан Президенті Қасым-Жомарт Тоқаев. -Ұлы Абай дүниеге келген Жидебайға ерекше мәртебе беру керек. Ресейде Пушкинге, Ұлыбританияда Шекспирге, Германияда Гетеге тағзым ететін секілді, Жидебай ең танымал, халық рухани азық алатын орынға айналуы тиіс. Осы ретте Мәдениет және спорт министрлігіне, облыс әкімдігіне тиісті шараларды қабылдауды тапсырамын. Абайдың 175 жылдық торқалы тойы ЮНЕСКО көлемінде аталып өтетін болады.
Еңбек ардагері, 93 жастағы Әбдеш Имаханов ақсақал Қазақстан Президенті Қасым-Жомарт Тоқаевқа ел атынан ризашылығын білдіріп, ақ батасын берді.
Совет МАХМЕТОВ, «Семей таңы»{jcomments off}
