Семей қаласында «Шығыс ақпарат» медиахолдингінің Өңірлік коммуникациялар қызметінің филиалы ашылды. Ақпараттық орталықтың ашылу рәсімі сейсенбі, 30 сәуір күні орталық кітап-ханада өтті. Шараға медиахолдинг төрағасы Нұрбек Бекенов, қала әкімі Ермак Сәлімов және жергілікті БАҚ өкілдері қатысты.
Бүгінде Семей қаласында 30-ға жуық баспа және электрондық бұқаралық ақпарат құралдары тіркелген. Екі телеарна, бірнеше газет, радио жұмыс істейді.
— Ақпараттық орталық өз жұмысын бастағанына біраз уақыт болса да, ресми ашылуы бүгінгі күнге дөп келді,- деді Н.Бекенов. — Семейде республикалық және халықаралық деңгейдегі шаралар үнемі өтіп тұрады. Еліміздің рухани-мәдени орталығында осындай ақпараттық орталықтың ашылуы өңірдің барлық маңызды оқиғаларын жариялауға, жедел ақпарат таратуға, халыққа дұрыс, тексерілген мәліметтерді жеткізуге үлкен үлесін қосады. Мұнда апта сайын жергілікті атқарушы билік пен жақын маңдағы аудандар, ауылдық округтер әкімдерінің қатысуымен баспасөз конференциялары ұйымдастырылатын болады. Бүгін сол үрдісті бірінші болып қала әкімі Ермак Бидахметұлы бастағалы отыр,- деді Н.Бекенов.
Нұрбек Бекеновтің айтуынша, өңірде 7 жыл қатарынан ШҚО Ақпараттық орталығы жұмыс істеп келеді. Осы уақыт ішінде республикалық, облыстық және қалалық БАҚ өкілдерімен, интернет-сайттармен тұрақты байланыс орнатылған.
Шаһар басшысы Ермак Сәлімов журналистерге қаланың әлеуметтік-экономикалық дамуы туралы айтып, БАҚ өкілдерінің сұрақтарына жауап берді.
— Биыл айтарлықтай маңызды үш жобаны қолға алдық. Бұл — қалаға кәсіпкерлерден тартылған инвестиция. Біріншісі – «Динамо» стадионының аумағына салынатын бес қабатты «SemeyМаll» атты ойын-сауық орталығының құрылысы. Біз жобаны көрдік. Ғимарат жертөлесінде көлік тұрағы, бірінші қабатта бутиктер мен тамақ өнімдерін қайта өңдеуге арналған арнайы орын, екінші-үшінші қабаттарда балаларға арналған алаңдар, 5 кинотеатр орналасатын болады. Ал бесінші қабаты тұрғындардың спортпен шұғылдануларына, церебралды сал ауруына шалдыққандарды оңалтуға арналмақ. Құрылыс жұмыстары 1 жыл 7 ай көлемінде аяқталады деп күтілуде. Компания 25 мамырға дейін жұмысқа кіріседі. Құрылыс жұмыстары біздің бақылауымызда болады. Жоба құны 6 млрд. теңгені құрап отыр,- деді қала әкімі Ермак Сәлімов. – Екінші жоба «Семей су» деп аталады. Бұл жоба кезінде қала бюджетінің 70 пайызын қалыптастырған болатын. Қазір инвестор кешенді толығымен сатып алды. Біз де бұл жұмыстарға белсене араластық. Осы жобаның арқасында қаладағы «Восход» шағын ауданы сумен қамтылмақ. Аталған ауданда сумен қамту мәселесі шешілмегенін білесіздер. Қазір жобалық-сметалық құжаттары әзірленуде. Мекеменің негізгі қызметі майлы дақылдарды өңдеу болғанымен, сусын және сыра өнімдерін құюмен де айналысады. Қазір мекеме 70-ке жуық адамды жұмыспен қамтып отыр. Келешекте жұмысшылар саны 240-қа, сосын 400-ге жететін болады. Жоба құны 4 млрд. 200 млн. теңге, — деді Ермак Бидахметұлы.
Үшінші жоба — мемлекеттік-жекеменшік әріптестігі аясында Қарағайлы ықшам ауданынан бой көтеретін «Мұз сарайы» жобасы. Жоба құны 6 млрд. теңгені құрап отыр.
— Мамыр айының соңында Мұз сарайы құрылыс жұмыстары басталады. Жер телімі бөлінген. 400 метрді құрайтын екі хоккей корты салынатын болады, — деді Е.Сәлімов.
Ермак Бидахметұлы тамыз айында Еуропалық қайта құру және даму банкі арқылы 4,1 млрд. теңгеге 170 жаңа қоғамдық көлік сатылып алынатынын айтты. Бұл көліктер қыркүйек айында жолға шықпақ. Айта кету керек, жаңа автобустарда электронды билет жүйесі іске қосылады.
— Қазір 450 қоғамдық көлік бар, олардың санын 318-ге қысқартамыз. Шағын автобустар қолданыстан шығады. Электрондық билет жүйесі бойынша алматылық компаниямен жұмыс жүргізудеміз. Электрондық жүйеге көшу арқылы шығындар мен кірістерді бақылауға мүмкіндік туады. Бірақ тариф төмендемейді. Несие шығындары тариф арқылы қайтарылады,- деді Ермак Бидахметұлы.
Брифинг барысында қала әкімі шаһарды абаттандыру, жылумен қамту, қатты-тұрмыстық қалдықтарды шығару және өзге де мәселелер бойынша қойылған сұрақтарға толыққанды жауап берді. Ермак Бидахметұлы Бейбітшілік аралынан Мирный кентіне дейінгі аралықтағы Ертіс жағалауын бекіту, Бейбітшілік аралын абаттандыру, биологиялық орталық қызметін дамыту жобалары қолға алынатынын да тілге тиек кетті.
Жадыра ТӨЛЕГЕНҚЫЗЫ, «Семей таңы»{jcomments off}
