Алдағы дүйсенбі, 6-шы мамыр — күллі әлем мұсылмандары үшін қасиетті Рамазан айының алғашқы жұлдызы. Қазіргі күні ҚМДБ төрағасы, бас мүфти Серікбай қажы Ораздың тапсырмасымен жер-жерлердегі мешіттерде оразаға даярлық жұмыстары пысықталып жатыр. Осы және де дініміздегі бес парыздың бірі — ауыз бекітудің шарттары мен мешіттердегі атқарылар шаралар туралы апта бейсенбісінде діни басқарманың Семей өңіріндегі өкіл имамы Мақсат қажы Алтыбайдың қатысуымен арнайы брифинг болып өтті.
БАҚ өкілдері алдында Мақсат Қуанышұлы бұл ерекше айдың ата дініміздегі алар орны жайында кең көлемде түсінік беріп өтті. Сонымен қатар ауыз бекітіп, өзін рухани тұрғыдан тәрбиелеуге ниеттенген жұртшылық үшін ескерер бірқатар жайтқа тоқталды.
— Ең бірінші, сіздерді бас мүфти Серікбай қажы Ораз хазіреттің атынан және өз атымнан, Семей қалалық мешіттерінің имамдары атынан келе жатқан Рамазан айымен шын жүректен құттықтаймын. Оразаның алғашқы күні мамырдың 6-шы жұлдызы болып бекітілді. Ал 5-і күні кешкісін барлық мешіттерде тарауих намазы жамағатпен бірге оқылады. Биылғы ораза 30 күн. Ал алдағы маусым айының 5–ші жұлдызында айт намазы оқылады, — деп түсінік берді. — Мамырдың 31-нен маусымның 1-не қараған түн – қасиетті Қадір түні. Бұл түнді дұға-тілекпен өткізген абзал. Ерлер мешітке келіп тарауих намазына тұрса, әйелдер мен қыздар үйлерінде отырып, ізгі тілекте болғаны абзал. Қадір түніне орай телеарналардан арнайы танымдық-тағылымдық бағдарламалар беріледі. Жалпы, діни түсінігіңізді арттырудың өзі білім алу тәрізді сауабы мол ғибадатқа жатады, — деді бұл ретте өкіл имам.
Сонымен қатар Мақсат қажы биылғы жылғы пітір садақасының көлемі әр адам үшін 300 теңге болып бекітілгенін жеткізді. Сондай-ақ ораза ұстау кімдерге парыз деген сауал төңірегінде бұл ғибадат жолаушы емес, денсаулығы көтере алатын, балиғат жасына толған әрбір адамға міндет болатынын айтып өтті.
Өңіріміздің бас имамы сондай-ақ Рамазан айында күндізгі болатын қатым — астарды кешкі мезгілге, ауызашар уақытына ауыстыру керектігі жайында семейлік көпшілікке өтініш жасады. Мұнымен қоса мейірім мен кешірім айы саналатын осы айда көбірек жақсы амалдар жасап, қайырымдылық шараларын жиі ұйымдастыру ләзім екенін де жеткізді. Себебі, хадисте айтылғандай, Жаратушының рақымы ерекше төгілетін осынау қастерлі айдағы әр жасалған жақсылық 70-тен жеті жүз есеге дейін арттырылады.
Бас имам сонымен қатар алдағы уақыттарда жергілікті мешіттер тарапынан іргелі бастамалар қолға алынып жатқанын айтып өтіп, ол туралы өз уақытында ақпарат берілетінін жеткізді.
«СТ» ақпарат.{jcomments off}
