«Мәңгілік ел жастары – индустрияға!». Елімізде осындай ұранмен «Серпін — 2050» мемлекеттік бағдарламасы бесінші жыл қатарынан жүзеге асып келеді. Жастардың сапалы білім алып, тұрақты жұмыспен қамтамасыз етілуіне зор мүмкіндік беріп отырған бағдарлама шеңберінде 29 сәуір күні Семейдегі құрылыс колледжінде бос жұмыс орындары жәрмеңкесі ұйымдастырылды. Облыстық білім басқармасының ұйытқы болуымен өткізілген шараға, бітіруші түлектермен қатар, Семей қаласы әкімінің орынбасары Айдар Садырбаев, ШҚО Білім басқармасының бас маманы Гүлмира Ілиясова, сондай-ақ аталған бағдарлама бойынша өткен жылы оқуын тамамдаған жас мамандар арнайы қатысты.{jcomments off}
Мұратбек Ізбасар мен Айсұлу Жанаева — «Серпін» бағдарламасы арқылы білім алған түлектер. Жәрмеңкеде сөз алған олар аталған бағдарламаның жастар үшін тиімді тұстарын айтып, оқуын аяқтағалы отырған студенттерге ақ жол тіледі.
Жәрмеңкеде жұмыс беруші 30 мекеме 131 студентпен жұмыспен қамту жөнінде келісімшартқа отырды. Солардың қатарында Innovative College (Инновациялық колледж) түлегі Жамал Төлегенова да бар. Шара барысында «Семей автобус паркі» мекемесінің директоры Асқар Зиядановпен жұмысқа орналасу туралы өзара келісімге келген бітіруші студент еңбек жолын Шығыс Қазақстан облысында бастап, мол тәжірибе жинақтауды мақсат етіп отыр.
Тағы бір айта кетерлігі, бос жұмыс орындары жәрмеңкесіне келген Көлік колледжінің директоры Айбек Нұғымаров, Innovative College басшысы Күміс Уразбаева және Құрылыс колледжінің директоры Қайрат Тастекеевтер үш жақты келісімшартқа қол қойды.
Осылайша, жүзден астам серпіндік түлек Шығыс Қазақстан облысынан жұмыс тапты. Жалпы, өңірімізде «Серпін — 2050» мемлекеттік бағдарламасы ерекше қарқынмен дамып келе жатқанын айту керек. Елдің оңтүстік өңірлерінен келген жүздеген студенттер кәсіби тұрғыда білім алып, біздің аймақта жұмысқа орналасты. Жыл сайын өткізіліп келе жатқан бос жұмыс орындары жәрмеңкесі арқылы осындай оң көрсеткіштерге қол жеткізілді. Мұндай шара келер жылы да жалғасын таппақ.
А.ХУАНАР,
Семей қаласы «Құрылыс колледжі» КМҚК
директорының тәрбие ісі жөніндегі орынбасары.
