{jcomments off}Жуырда ШҚО ішкі саясат басқармасының Жастар ресурстық орталығының ұйымдастыруымен қаламызда VII облыстық дәстүрлі «Студенттік көктем — 2019» фестивалі болып өтті. Жыл сайын дәстүрлі түрде өтетін ауқымды шараға облысымыздың әр өңірінен түрлі оқу орындарының өкілдері келіп, өз мүмкіндіктері мен жетістіктерін көрсетіп, аталымдарға ие болады. Жылдағыдай, Орталық алаңда өткен фестивальға қала халқы, студент жастар көп жиналды.
Бұл жолы да арнайы ұйымдастырылған қызықты бағдарламалар халықтың көңіл-күйін көтерді. Мәселен, «Үздік кәсіби алаң» аталымы бойынша әр оқу орны өз ерекшеліктерін ортаға салып, білім ордасындағы мамандықтармен таныстырды.
Сонымен қатар кәсіби алаңда ән-би, шығармашылық бағдарламалар, суреттер көрмесі көпшілік назарына ұсынылды. Өнерлі жастар көрерменді әнімен, биімен қызықтырса, аспаздар тәтті торттарын әзірлеп, шаштараздар шаш үлгісін жасады, болашақ ақ халатты абзал жандар алғашқы медициналық көмек көрсетіп, көпшілік көңілін аударды.
Осы күні әлеуметтік желіде онлайн дауыс беру арқылы «Жастар таңдауы» аталымы бойынша үздік жоғары оқу орны анықталды.
Фестиваль кешкілік Абай театрында өткен концертпен жалғасты. Онда да түрлі оқу орындарының өкілдері өз өнерлерін паш етті. Дәстүрлі әннен бастау алып, ұлттық және заманауи билермен өрнектелген кеш барысында қоғамдағы проблемаларды қозғаған қойылымдар да көрермен назарына ұсынылды.
Концерт соңында фестиваль қорытындысы жарияланып, жеңімпаздарға сыйлықтар мен номинациялар табысталды. Соңғы нәтиже бойынша «Студенттік көктем ханшайымы» атағын Қазақ инновациялық-заң университетінің студенті Аида Махметжанова, ал «Студенттік көктем ханзадасы» атағын Семей медицина университетінің студенті Әлихан Құмаров иеленді.
Сондай-ақ арнаулы орта білім беретін оқу орындары арасында «Үздік кәсіби алаң» аталымымен Семей көлік колледжі марапатталды. «Үздік шығармашылық бағдарлама» номинациясы М.Әуезов атындағы педагогикалық колледжге бұйырды. Сонымен қатар жоғары оқу орындары арасында «Үздік кәсіби алаң» аталымын Семей қаласының Шәкәрім атындағы мемлекеттік университеті мен Қазақ инновациялық-заң университеті жеңіп алды. Ал Сәрсен Аманжолов атындағы Шығыс Қазақстан мемлекеттік университеті, «Жастар таңдауы» номинациясымен қоса, жоғары оқу орындары арасындағы «Үздік шығармашылық бағдарлама» аталымын иеленді.
Фестиваль соңында студенттер мен олардың жетекшілері лебіздерін білдіріп, құттықтау тілектері мен алғыстарын жеткізді.
Айта кетейік, бүгінгі күні облыста 14 пен 29 жас аралығындағы 265 мың жас бар. Оның 166 мыңы қалада, 99 мыңы ауылда тұрады. Бұл аймақтағы тұрғындар санының 19 пайызын құрап отыр. Жастардың 25 пайызы — студенттер. Ал өңірдегі 8 ЖОО мен 86 колледжде 66 548 студент оқиды екен.
Б.НҰРБЕКОВА,
Шәкәрім атындағы университеттің студенті.
