Жеңіс күні мерекесі қарсаңында қа-ла әкім Ермак Сәлімов шаһарымызда тұратын бірқатар соғыс ардагерлері мен Ленинград блокадасында болған жерлестеріміздің үйлеріне барып, арнайы құттықтады.
Қала басшысы Ермак Бидахметұлы алғашқы кезекте Раиса Денисованың үйінде болып, соғыс ардагеріне Жеңістің 74 жылдық мерекесіне орай құттықтау лебізін білдірді. Раиса Александровна 1926 жылы 8 мамыр күні Семей қаласында өмірге келген. 1941 жылы өрімдей жас әскер қатарына алынып, Ленинград қаласында борышын өтейді. Жау қоршауында қалған қаһарман қалада қиындық пен азапты күндерді өз көзімен көріп, басынан өткерген.
Қала әкімі майдангер әжейді Жеңіс мерекесімен бірге келіп жеткен туған күнімен де құттықтады. Раиса Александровна бүгінде 93 жасқа аяқ басса да әлі тың екен. Өткен-кеткеннен қозғап естелік әңгімелер де айтты. Қаншама уақыт өтсе де көңіл түкпірінде жүрген сол бір сұрапыл жылдар туралы естен кетпес оқиғалармен бөлісті. Өзінің майдан даласындағы көргендері жайында сөз өрбіткен қария:
— Ленинград қаласындағы бомбалаулар кезінде көптеген қаруластарымды жоғалттым. Лениградтықтар аштықтан өліп жатты. Әйтсе де бейбіт күнге, жеңіске деген зор сенім бізді алға жетеледі. Осының бәрін көзбен көрген біз үшін бұл күннің мәні ерекше, — деді.
Раиса Денисова 1947 жылы өмірлік серігін майдан даласынан кезіктіріп, елге оралады. Көптеген орден-медальдардың иегері. Үш перзент тәрбиелеп өсіріп, олардан 9 немере, 9 шөбере сүйіп, бүгінде бақытты әже атанып отыр.
Ермак Бидахметұлы бұл күні соғыс ардагері Кәмкетай Баировтың да шаңырағында болып қайтты. 1943 жылы өз еркімен майдан даласына аттанған ол Балтық теңізінде борышын өтеп, қаһарман теңізші атанады. 1944 жылдың күзі, яғни жау қоршауындағы Ленинградты қайтару үшін болған ұрыстар жас теңізшінің ерекше есінде қалыпты. Артиллерист Кәмкетай Байыровтың кемесіне жүктелген міндет теңіз айлағына фашистер мен олардың одақтасы фин кемелерін жібермеу, қаланы теңіз артиллериясы шабуылынан қорғау еді. Бұл міндетті жауынгерлер мүлтіксіз орындайды. Нәтижесінде жау шеңгелінен босаған қалаға құрлық әскерлерімен қатар алғашқы болып кіріпті.
Осылайша, Балтық аймағы жаудан тазартылған соң, ақсақал мінген кеме майдан шебіндегі Рига мен Таллин қалалары жағалауларын күзетіпті. Ұзақ күттірген Жеңіс мерекесін ақсақал осылай қарсы алған. Бүгінде жаужүрек теңізшінің кеудесі орден-медальға толы. ІІ дәрежелі ұлы Отан соғысы ордені мен Адмирал Кузнецов, Маршал Жуков медальдарының иегері.
Алайда қаһарман үйіне тек 1950 жылы ғана қайтып оралыпты. Бейбіт өмірдегі елеулі жылдарын темір жолға арнайды. Ақсақал 1951 жылдың 15 мамырынан 1986 жылдың 23 мамырына дейін Семей темір жолының Семей белгі беру және байланыс дистанциясында электромеханик болып абыройлы қызмет атқарады. Болашақ жары, темір жол кассирі болып еңбек етіп жүрген Ғалия апамызбен көңіл жарастырып, шаңырақ көтеріпті. Бүгінде ұрпақ қызығына кенеліп, үлкен әулеттің ақылшысы болып отыр.
Қала әкімі сонымен қатар Ошақбай Сәкеновтің шаңырағында да болып, қарт майдангерден амандық сұрасты. Белорусь, Украина майданында әскери борышын өтеген ардагердің де өңірі орден-медальдарға толы. Соғыс аяқталған соң елге оралған жауынгер қаламыздағы ет комбинаты мен шифер зауытында ұзақ жылдар бойы еңбек етіпті.
Барлық соғыс ардагерлері қала басшысына зор алғыстарын білдіріп, елге амандық, халқымызға тыныштық болсын деген баталы тілектерін білдірді.
К.НҰРБЕРГЕН, «Семей таңы» {jcomments off}
