Өткен аптада қалалық әкімдікте қала әкімі Ермак Сәлімовтің, салалық бөлім, ведомстволық бағынысты ұйымдардың, мемлекеттік мекемелердің, құқық қорғау органдары басшыларының қатысуымен кеңейтілген аппарат отырысы өтті.
Отырыстың күн тәртібінде бірқатар маңызды сұрақтар қаралды. Оның ішінде қаланы абаттандыру мәселесі ерекше айтылды. Қаланы аббаттандыру жұмыстары жайлы Тұрғын үй-коммуналдық шаруашылығы және тұрғын үй инспекциясы бөлімінің басшысы Амантай Өтелбаев баяндады. Өз сөзінде Амантай Хайроллаұлы қаланың санитарлық тазалығын сақтау, көшелердің қауіпсіздігі мен жайлылығын қамтамасыз ету бағытындағы жұмыстармен таныстырды.
— Маусымдық сенбіліктерден бөлек, қалада санитарлық тазалық жұмыстары ұдайы жүргізіліп тұрады. Семейде қатты-тұрмыстық қалдықтарды шығарумен 8 мекеме айналысады. Олар жеке және заңды тұлғалармен де жұмыс істейді. Ағымдағы жылы біраз жұмыстар атқарылды. Дегенмен мәселелер де жоқ емес. Азаматтардың барлығы қалдықтарды төгу туралы арнайы мекемемен келісімшартқа отырмайды. Нәтижесінде қалада бейберекет төгілген қоқыстар пайда болуда. Сондықтан біз өзге аумақтардағы шығындарды қысқартуға мәжбүрміз. Мәселен, көшені жарықтандыруға кететін қаржыны осындай жиналған қоқыстарды тазартуға жұмсауға тура келеді,- дейді А.Өтелбаев.
Кәріз қақпақтарының ашық қалуы, абаттандыру, ескірген ағаштарды кесу сияқты көптеген маңызды проблемалар әлі де күн тәртібінде тұр. Тұрғын үй — коммуналдық шаруашылығы және тұрғын үй инспекциясы бөлімі басшысының есебін тыңдаған Ермак Бидахметұлы бөлім жұмысына көңілінің толмайтынын білдірді және Орталық саябақтың жөндеу жұмыстарын жандандыруды тапсырды.
— Орталық саябақты жөндеу жұмыстарын жеделдетуді тапсырамын. Қажет болған жағдайда, бірнеше ауысымда жұмыс істеу керек. Қала тұрғындары үшін жайлы демалыс орындары қажет,- деді қала әкімі.
«Семей тазалық» ЖШС Семей халқының 70 пайызына қызмет көрсетеді. Тазалық айлығы аяқталуға жақын болса да, қаланың шет аймақтары қоқыстан тазармаған. Ермак Бидахметұлы мекеме басшысын сынға алды.
— Дұрыс жұмыс істемейсіздер. Тұрғындар неге қоқысты бейберекет төгеді?- деді Е.Сәлімов. — Өйткені қоқысты лақтыратын басқа орын жоқ. Халықтан шағым көп түседі. Сіздер халықтың 70 пайызына қызмет көрсетесіздер. Сондықтан қала тазалығына сіздер жауаптысыздар. Жергілікті полиция қызметімен бірлесіп жұмыс істеңіздер. Тұрғындар риза емес. Әлеуметтік желі мүмкіндіктерін де пайдалану керек,- деді Е.Бидахметұлы.
Отырыс барысында жергілікті полиция қызметінің жұмысы, материалдық-техникалық базасын жақсарту, құқық бұзушылық пен қылмыс оқиғаларын азайту шаралары да сөз болды. ІІБ өкілінің кезекті есебін тыңдаған қала әкімі учаскелік полиция қызметін жақсартып, қоқыс төгу мекемесімен келісімшартқа отырмаған тұрғындармен жұмысты жандандыруды, сондай-ақ ІІБ басшысы Дулат Қазақбаевтың қатысуымен баспасөз мәжілісін ұйымдастыруды тапсырды.
Отырыста қаралған екінші мәселе оқушылар мектепке баратын жолдардың қауіпсіздігі жайлы болды. Қалалық білім бөлімі басшысы Наталия Фесенконың айтуынша, бүгінде Семейде оқушылар үшін қауіпті деп саналатын 200-ден астам жол бар.
— Әрбір оқушыға жекелей мектепке келуге қауіпсіз деп саналатын маршруттарды анықтадық. Жол ережесін түсіндіру жұмыстары күшейтілді,- деді Н.Фесенко.
Отырыста айтылған мәселелер бойынша қала басшысы тиісті бөлімдерге тапсырмалар жүктеді.
{jcomments off}
