Сенбі, 11 мамыр күні Абай театрында Семей қаласы әкімдігінің қолдауымен «ТED Global» халықаралық ұйымы лицензиялаған TedX конференциясы өтті.
TedX Semey конференциясының мақсаты — жастарды жаңашыл идеялармен байыту.
— TedX конференциясы биыл қаламызда үшінші мәрте ұйымдастырылып отыр. Бұл конференцияның ерекшелігі — штаб пәтері АҚШ-тың Калифорния штатында орналасқан «ТED Global» халықаралық ұйымының лицензиясын алған. Қазақстанда бұл лицензияланған конференцияны тек Алматы, Нұр-Сұлтан және Семей қалаларында ұйымдастыруға рұқсат бар,- дейді TedX конференциясын ұйымдастыру комитетінің мүшесі Азамат Азатов.
300-ден аса көрермен қатысқан конференция барысында еліміздің ең үздік спикерлері білім, медициналық қызмет алу, өзін-өзі дамыту және басқа да салалар бойынша өз ойларымен бөлісті.
Конференцияны Ұлыбритания Елшілігінің «WeAlmaty» бағдарламасының менторы, 50-ден астам халықаралық конкурстардың жеңімпазы Фарангиза Шукашева ашып, «Әлем елдеріне 50 грантты қалай жіберіп алмауға болады?» тақырыбында сөз қозғады.
Фарангиза Шукашева — Семей қаласындағы геологиялық барлау колледжінің түлегі. Бірнеше жыл Қазақстан, Ресей, Украинаның көмір мен уран шығатын елді мекендерінде геофизик болып жұмыс істеген ол кейінгі жылдары білім беру жобаларына қызығушылық танытады. 2016 жылы Ардақ Бердібековпен бірге білім беру, мансап, шығармашылық және кәсіпкерлік көкжиегін кеңейту туралы ақпарат беретін Neupusti платформасының негізін қалайды. Мұнда түрлі сала бойынша берілетін гранттар, стипендиялар, тәжірибе жинақтау, байқаулар, форумдар жайлы білуге болады. Neupusti сайтын ТМД бойынша ай сайын 100 000 нан астам жас оқиды.
Сонымен қатар «Comes» қоғамдық бірлестігінің жетекшісі Сергей Снегирев «Қараусыз қалған жануарлармен жұмыс істеу және олардың қоғамдағы рөлі», қоғам белсендісі, «Амирам» қайырымдылық қоының жетекшісі Марина Чейшвили «Қазақстанда ауыр науқасқа шалдыққандардың туыстарына жансақтау бөліміне кіруге рұқсат беру не үшін қажет», Қазақстанның барлық аудандары мен облыстарын, сондай-ақ әлемнің 21 елін аралаған саяхатшы Яков Федоров «Қазақстанға не үшін саяхаттамау керек», «KCG Investment Management Ltd» бас атқарушы директоры Аман Копесов «Ironman сайысы немесе спорт пен мансапта темірдей тәртіпті қалай қалыптастыруға болады» «Қазақстан» АҚ республикалық телерадиокорпорациясының интернет бөлімі басшысы Тимур Бектұр «Алаған қолым береген немесе үздіксіз даму дегеніміз не?», блогер Торғын Жолдасбекқызы «Сәтті күн», журналист Ақниет Аманжолқызы «Мүгедектік кемшілік пе әлде ерекшелік пе?», нейрохирург Мыңжылқы Бердіходжаев «Отандастарымызға әлемдік деңгейде нейрохирургиялық көмекті қалай көрсетуге болады?» деген тақырыптарда сөз қозғап, пайдалы ақпараттар мен қызықты мәліметтерді ортаға салды.{jcomments off}
