Өткен дүйсенбі, 6 мамыр күні Қалалық Мәдениет сарайында Жастар жылы аясында және 7 мамыр Отан қорғаушылар күніне орай, «Жігіт сұлтаны – 2019» байқауы өтті. Қалалық ішкі саясат бөлімінің қолдауымен, «Семей жастар ассамблеясы» қоғамдық бірлесітігінің ұйымдастыруымен өткен байқауда жоғары оқу орындары мен колледж студенттері, мектеп мұғалімдері өнер көрсетті.
2007 жылдан бері дәстүрлі түрде ұйымдастырылып келе жатқан байқаудың мақсаты – қазақтың салт-дәстүрлерін насихаттап, жастарды патриоттық рухта тәрбиелеу, салауатты өмір салтына баулу, жігіттердің өнерін халық арасында дәріптеу.
Бұл жолғы сайыста 16-29 жас аралығындағы қазақ күресі мен ат спортын меңгерген, ұлттық дәстүрді бойына сіңірген 7 жігіт бақ сынады. Атап айтсақ, Семей қаласының Шәкәрім атындағы мемлекеттік университетінің, Мұқан Төлебаев атындағы музыка колледжі, Жоғары агротехникалық колледжі, Электротехникалық колледж, Индустрия колледжі, М.Әуезов атындағы педагогикалық колледж студенттері және №15 мектептің дене шынықтыру пәні мұғалімі қатысты.
— Байқауға қатысуға өтініш білдірген қаламыздың 14 оқу орнынан 7 жігіт іріктеліп алынды. Сайыс сыртқы және ішкі кезеңдерден тұрады. «Ер қанаты — ат», «Күш атасын танымас» атты сыртқы кезеңдерде жігіттерміз ат ерттеу, аударыспақ, құрық салу, теңге ілу және қол күресі, қазақша күрес турларынан өтті. «Мен Алаштың ұлымын», «Білімді мыңды жығар», «Өнерлі өрге жүзер» атты ішкі кезеңдерде жігіттердің сахнада өзін-өзі ұстау, сөйлеу мәдениетін, білім деңгейін сарапқа саламыз. Мақсатымыз – қоғамға қазақ жігітінің болмысын көрсету,- дейді «Жас Отан» жастар қанатының Семей қалалық филиалының төрағасы Алмас Айтмұқаш.
Байқауға Халықтық «Ой-сана» жазба ақындар мектебінің жетекшісі, республикалық
«Жігіт сұлтаны» байқауының үш мәрте жеңімпазы Серік Молдабеков, Жастар ресурстық орталығының директоры Олжас Соғымбай, ҚР Мәдениет саласының үздігі, Қалалық Мәдениет сарайының көркемдік жетекшісі Гүлжан Жақсыбаева, Жазушылар одағының Семей қалалық филиалының төрағасы Мерей Қарт, «Алаштың нар жігіті» қалалық байқауының жеңімпазы, кәсіпкер Ерлан Жақып қазылық етті.
Байқау қорытындысында әділ қазылар алқасының шешімімен Электротехникалық колледж студенті Қуаныш Ерасыл басым ұпаймен жеңіске жетті. Сайысқа қатысқан жігіттердің барлығы бағалы сыйлықтармен жəне түрлі аталымдармен марапатталды.{jcomments off}
