Қалалық орталық кітапханада Қазақстанның еңбек сіңірген қайраткері, Мемлекеттік сыйлықтың және Қазақстан Журналистер академиясының «Алтын жұлдыз» сыйлығының иегері, ҚР Жазушылар одағының төрағасы ақын, аудармашы, журналист Ұлықбек Есдәулетовтің 65 жылдық мерейтойына орай «Туған өлкесін жырлап жүрген ақын» атты кеш — поэзиялық лабиринт ұйымдастырылды. Кешке Шәкәрім атындағы мемлекеттік университеттің, ҚазИГЗУ, Семей көп салалы колледжі студенттері қатысты.
Мәдени шараның мақсаты — Ұ.Есдәулетовтің өмірімен, шығармашылығымен таныстыра отырып, азаматтық рухтағы өлеңдері арқылы жастардың Отанға деген сүйіспеншілік сезімдерін, поэзияға деген құштарлықтарын арттыру.
Ұлттық мүддені, ұлттық намыс пен ұлттық мінез, ұлттық рухты өлеңдеріне арқау еткен ақын туған өлкесінің тамаша табиғатын да жырға қосқан. Ақын өлеңдері өмір туралы толғаныстарға толы. Оның шығармаларының ішінде «Қара пима» поэмасы ерекше орын алады. Қоғамымызда белең алып бара жатқан маскүнемдік, ішімдікке құмарлық, сонымен қатар әке мен бала проблемасы, әлеуметтік мәселелермен қоса, көптеген өмір шындығына куә боламыз. Сан қырлы әлеуметтік-қоғамдық тіршіліктің құбылыстары өзгеше өрнектеліп, өнеге аларлық, сабақ боларлық сарында жазылған Ұлықбектің өлеңдерін оқи отырып, оның азаматтық бекзат бейнесін көресің, өмірге, қоғамға көзқарасын танисың, көңіліңе тоқисың.
Кештің шымылдығын кітапхана қызметкері ақынның туған жеріне арнаған «Зайсаным менің» атты өлеңімен ашты. Студенттер кітапхана әдіскері Рыскен Бидахметқызы Ұ.Есдәулетовтің өлеңдері бойынша арнайы дайындаған «Жылқылар мен бұлттар» атты видеослайдты тамашалап, ақынның өмірімен, шығармашылығымен тереңірек танысты.
Поэзиялық лабиринтке қатысқан студенттер ақынның «Қара пима» поэмасын, «Махаббат деген немене?», «Ақ махаббат, аппақ қыс», «Мен ғашықпын», «Мұңлы өлең», «Біз түркілерміз», «Түркістан», «Қазақстаным» атты өлеңдерін мәнерлеп оқыды. Бозбала мен бойжеткендер бір сәт поэзия патшалығына еніп, сілтідей тынып өлең тыңдады. Қара өлеңнің құдіретіне тәнті болды.
Кеш барысында сондай-ақ ақынның сөзіне жазылған «Семей-Невада» қозғалысының әнұраны болған «Заман-ай», «Көздеріңе ғашықпын» әндері шырқалды.
Жастар ақынның жауһар жырларына қанығып, поэзиясындағы поэтикалық ізденістерді, қаламгердің шеберлігін танып білді.
Шара соңында оқырмандар «Заманның заңғар зергері» атты кітап көрмесімен танысты.{jcomments off}
