Еділ патшаның: «Егілген ерді көрдім. Бірақ елім жыламасыншы!» деген сөзін естіген боларсыздар. Ел мен жер, билік пен бұқара, ұлт мүддесі жайлы мәселе біздің басылымның тұрақты түрде жариялап жүрген тақырыбы екендігі өздеріңізге белгілі деп ойлаймыз, ардақты оқырман.

Бүгінгі тақырыбымыз тағы да сол, аналарын «ақ үйден» сүйреп шығартып жіберген ауданның жаңа басшылығына арналғалы отыр. «Әкім жаңадан тағайындалды, қандай сын айтуға болады?» деп таң қалуларыңыз да мүмкін. Иә, осыдан тура бір ай уақыт бұрын Зайсанға жаңа әкім тағайындалған болатын.

Зайсан жері – небір талантты ақын мен әншілер туған өнері өріс, талай батырды дүниеге әкелген, тектіліктің тамырын тереңге жіберген ғажап мекен. Бұл жердің халқы жайлы пікір де әр алуан. Бұрын әкім болған азаматтардың бірі: «Зайсанда қатты ұйықтау түгілі қалғып кетуге болмайды…»- десе, ал енді бірінің: «Зайсанда әкім болған бір жыл үш жылға пара — пар»,- дегенін естігенім бар еді… Бұл әзіл болса да жергілікті халықтың билікке талап қойғыштығын меңзесе керек.

Зайсанға басшылық жасаған әкімдер де әртүрлі болды. Туған жерді түлету жолында тер төккен, бұрын мал жайылып жүрген қараусыз көшелерді гүлге толтырып, ауылдарды мәуелі Иран бағына айналдырған әкім де болды. Халыққа талап қойды. Елдіктің ісін бірлесе атқаруға жұмылдырды. Елім деген ердің ісі біреуге жақса, енді біреуге жақпады… Бүгін сол перзенттерінің қадірін білмегендеріне өкінетіндер аз емес сияқты.

Мінезі салмақты, үндемей жүріп үйдей іс тындыратын, жалаң мақтау мен жарнаманы жаны сүймейтін азамат та басшылық жасады. Ел арасындағы өсек-аяңға, біреудің сыртынан ғайбат сөз айта келетіндерге құлақ аспаған сырбаз азамат таяуда бақилық болғанда осы жақсы қасиеттерін айтып егіліп алғандар да аз болмады. «Жоғалған пышақтың сабы алтын» деген осы шығар деген ой түйдік.

Ал енді бір әкім аудан тарихында аналарын «ақ үйден» күзетшілеріне сүйретіп шығартып жібергенімен ұзақ сақталып қалатын сияқты… (Шенеуніктерге халықтың жүйкесін жүн еткені үшін, жанына жара салғаны үшін, өтірік уәде бергені үшін айып салынса ғой…)

Сонымен, Серік Ақтановтың Зайсан ауданына әкім болып келгеніне тура бір ай болды. Жасыратыны жоқ, Шығыс Қазақстан облысында бүкіл саналы ғұмырымызды өткізіп келе жатқандардың қатарынанбыз. Осыдан бірнеше жыл бұрын облыс әкімінің орынбасары қызметіне Серік Ақтанов деген адам тағайындалды дегенде аңтарылып қалғандардың бірі болдым. Облыс, республика көлемінде есімі бұрын-соңды естілмеген азамат. Өмірбаян деректеріне үңілдік. Енді ғана есейіп, іске араласқан жас та емес, алпысқа аяқ басқан адам екен. Туған жылы жазылғанымен, туған жері көрсетілмепті… Облыстық деңгейдегі билікке ғайыптан қалай пайда болды деген сауал талайдың көкейінде болған еді. Мейлі, не орайы келген, не орайын келтірген шығар дедік те қойдық… Аймағымызда жылу беру, жол жөндеу сияқты мәселелерге байланысты жиындарда бірді–екілі сөйлегенін естідім… Жалпы, өзім харизмасы жоқ басшыны жылуы жоқ пешпен тең көремін… Айтпақшы, өткен жылдың көктем айында облыс бойынша су тасқыны қаупі жиі қайталанғаны көпшілікке белгілі. Осы тасқын су кезінде аяғына резеңке етігін киіп алып қанша белсенді болып көрінгісі келгенімен, апаттан Ақтанов алып шықты дегенді естімедік. Керісінше, аймақ басшысының талай наразылығы бүгінгі кейіпкерімізге арналғанын ұмыта қойған жоқпыз.

Сонымен, Зайсанға бір ай бұрын тағайындалған Серік Ақтанов осы уақыт ішінде не тындырды? Бір ай — аз уақыт, жұмыс істеп өзін көрсетуге ерте десеңіздер, қателесесіздер, ардақты оқырман!

Бір ай бойы Facebook әлеуметтік желісін ашып қалсақ, ауыл аралап жүрген Ахтановтың бейнесі жарқ ете қалады. Соған қарағанда, жарнаманы да жанына жат көрмейтіндердің қатарынан сияқты. Халықтың ортасында жымиып күліп тұрған шенеунік не іс тындырды деп желідегі жазбаға дереу үңілеміз: «Аудан әкімі Серік Қасымбекұлы Ақтанов 10 мамыр күнгі қызметтік сапары барысында Жамбыл ауылында болды. Өңірдің тыныс-тіршілігімен танысу мақсатында бірқатар маңызды нысандарды аралады. Мамандармен жүздесіп, атқарылып жатқан жұмыстармен танысты…», «Қызметтік сапары барысында Серік Қасымбекұлы Ақтанов 10 мамыр күні Шалқар, Көгедай ауылдарын аралады. Атқарылып жатқан жұмыстармен танысты. Өңірдің тыныс-тіршілігін көзбен көріп, мамандармен тілдесті», «Бүгін аудан әкімі Серік Қасымбекұлы Ақтанов өңірдің тыныс-тіршілігімен танысу мақсатында Сартерек ауылдық округіне барды. Қызметтік сапары барысында бірқатар маңызды нысандарды аралап, жұмыс барысымен танысты. Өңірдің тыныс-тіршілігін көзбен көріп, сала мамандарымен тілдесіп қайтты», «Бүгін Зайсан ауданының әкімі Серік Қасымбекұлы Ақтанов жұмыс сапарымен Айнабұлақ ауылдық округінде болды. Бірқатар маңызды нысандарды аралап, жұмыс барысымен танысты. Сала мамандарымен тілдесіп, өңірдің тыныс-тіршілігін көзбен көріп қайтты» …

Ардақты оқырман, желідегі жазбаларды назарларыңызға еш өзгеріссіз ұсынып отырмыз. Байқап отырған боларсыздар, жұртты жалықтыратын бір сарынды есеп. Жасыратыны жоқ, алғашқыда не жаңалық болар екен деген әуесқойлықпен үңілсек, соңғы кездері тіпті оқығымыз келмейтін болды… Өз басым ашамын да, қайта жаба саламын.

Бір ай болды, Ақтановтың алақандай ауданмен танысу рәсімі бітер емес. Жергілікті халықтың айтуынша, салмақты жоспар, салиқалы әңгімеден ада, мән мағынасы жоқ жай ғана келіп-кету… Айтпақшы, Facebook парақшасындағы Ақтановтың ел аралағандағы есебінің астына Рауан Шабалов есімді желі қолданушы: «Зайсанға Серік Зайнулдин сияқты жұмыс істейтін әкім келді ме, әлде жоқ па?»- деген жазба қалдырыпты. Менің ойымша, бұл көптің көкейіндегі сауал…

Ұзын сөздің қысқасы, бір ай болды, Серік Ақтанов уәзірлерін тіркемеге алып, ауыл арасында шенеуніктердің шеруін өткізіп жүр. Бұрын жол жөндеу, тасқын суға тосқын болу, жылу сияқты жұмыстармен ғана айналысқан Ақтанов мырза рухани дүниеге, тарихқа, ұлттық құндылықтар жайлы тақырыптарға бас қатырар ма екен? Жайсаң мекен Зайсанның халқы жуас емес, мінезді… Жайлы жер іздеп, жан тыныштығын ойлаған басшыға шығатын есікті жедел көрсететінін де естен шығармассыз, Ақтанов мырза!

Ардақты оқырман, әзірше осы. Қалғанын әліптің артын бағып, алдағы уақыттың еншісіне қалдыра тұралық. Бізбен бірге болыңыздар!{jcomments off}