Ономастика
ЖАҢА АТАУЛАР БЕРІЛЕДІ
Қаладағы ақпарат орталығында Мәдениет және тілдерді дамыту бөлімінің мамандары Семей шаһарындағы онамастика саласындағы ағымдағы жағдай мен бүгінгі күндері атқарылып жатқан шаралар жайында кең көлемде түсінік беріп, баспасөз мәслихатын өткізді.
Азамат ЕРСАЙЫН,
«Семей таңы»
Көпшілік алдында сөз алған аталмыш бөлімнің тілдерді дамыту секторының меңгерушісі Маржан Бахатова Семей қаласы бойынша көшелер атауларын өзгертуге байланысты атқарылып жатқан шаралар қатарымен таныстырды. 1991 жылдан бері қаламызда 87 көшенің атауы жаңарғанын жеткізіп, бұл бағыттағы жұмыстардың алдағы уақыттарда да жалғаса беретінін айтып өтті. Көше атауларын ауыстыру бойынша жемісті жұмыс жүргізілуде. Атап айтсақ, Строительная көшесі Тұрсынғазы Рахимов, Комсомольская көшесі Жібек жолы, Декабристер көшесі Нұрсая, Социалистическая көшесі Самал, Кутузов көшесі Ардагерлер болып ауысқан. Жалпы, қазіргі таңда көше атауын ауыстыруда ұлттық таным-түсінікке сай атаулар қою ұсынылуда. Ал идеологиялық тұрғыдан мүлде қажетсіз атаулар сол көшенің тұрғындарының өтінішімен біртіндеп өзгертіле беретін болады. Осыған дейінгі ауысқан көшелерге қаладағы зиялы қауым өкілдерінің өтініші ықпал етіпті.
Десек те қала бойынша көше және нысандар атауларын өзгертуге байланысты әлі де атқарылар шаруалар өте көп.
Жиын барысында сонымен қатар қала іргесіндегі жаңадан бой көтеріп жатқан Қарағайлы ықшам ауданының болашақтағы көшелері қалай аталатыны және жаңа көшелердің қашан ашылатыны жайлы да сауалдар қойылды.
– Былтыр Қарағайлының орталық көшелерін үш бидің атымен атау жайында ұсыныстар айтылған болатын. Бұл ұсыныс қаладағы ұжымдар тарапынан бір ауыздан қолдау тапқан. Енді көшелерге ат беру басталғанда біз осы ұсынысты облыстық ономастикалық комиссияға жеткіземіз,– деді Маржан Бахатова.
Айта кетейік, 21 мамыр күнібірқатар көшелердің ашылуы болады. Бұл шараның мәдени-қоғамдық тұрғыдан маңыздылығы зор.
Мамандар сөзіне сүйенсек, жеті көшенің тақтайшаларын ауыстыруға 1 миллиондай қаражат кетеді.
Бұл ретте пікір білдірген мамандар тақтайшаларды ауыстыруға тұрғындар қалтасынан ешқандай ақша шықпайтынын айтады.
Тағы бір айта кетер жайт, көше атауын ауыстыруға байланысты кез келген адам ұсыныс жасай алады. Әйтсе де ұсыныстар көше атауын өзгертуге қатысты мораторий алынғаннан кейін қарастырылады.
Жиында БАҚ өкілдері тарапынан: «Қалада Елбасы Нұрсұлтан Назарбаевтың атына көше беріле ме?» деген сұрақ та қойылды.
– Бұл мәселе республикалық деңгейде көтерілгенде Нұрсұлтан Назарбаевтың атына көше облыс орталықтарында ғана берілетіндігі айтылған болатын. Сол себептен де Өскемендегі Тәуелсіздік даңғылының атауы өзгертілген еді. Ал Семейдің бір көшесін Елбасының атымен атау туралы нақты ұсыныс болған жоқ,- деді баяндамашы.
Ономастикаға қатысты тағы бір жаңалық — қаламыздағы бірқатар орта білім беретін мектептерге ресми түрде ат берілмек. Атап айтсақ, шаһардағы №49 мектепке Абай Құнанбайұлының, №37 мектеп-гимназиясына Ыбырай Алтынсариннің, №3 мектеп кешеніне М.Әуезовтің, №2 мектепке Қаныш Сәтбаевтың, №39 мектепке Әлихан Бөкейханның, №47 мектепке Ахмет Байтұрсыновтың, №29 «Пальмира» мектебіне Ташпық Құтжановтың атын беру, ал балалардың музыка мектебіне Теміржан Базарбаевтың атын беру бойынша арнайы құжаттамалар әзірлену үстінде. Бұл құжаттардың барлығы да облыстық ономастикалық комиссияның қарауына жіберілетін болады.
