м
Семейде, жылдағы дәстүрге сай, биыл да «Тіл мәртебесі — ел мәртебесі» атты қалалық тіл фестивалі кең көлемде аталып өтті. Қаламыздағы Жеңіс саябағында,
Әлихан Бөкейханұлының ескерткіші алдында ұйымдастырылған осынау шараға жастар қауымы, әсіресе өскелең буын -мектеп оқушылары көп жиналды.
Әлібек КЕМЕЛХАН,
«Семей таңы»
Бірінші кезекте айта кету керек, мемлекеттік тілдің мәртебесін арттыру, 2016-2019 жылдарға арналған «Тілдердің үштұғырлылығы» аймақтық бағдарламасын жүзеге асыру, мемлекеттік тілді оқып-үйренуді насихаттау және қазақ тілін үйретудегі интерактивті әдіс-тәсілдерді насихаттау және тарату мақсатындағы фестиваль Тілдерді қолдану мен дамытудың 2011-2020 жылдарға арналған мемлекеттік бағдарламасы шеңберінде, Семей қалалық мәдениет және тілдерді дамыту бөлімі және қалалық білім бөлімінің ұйымдастыруымен биылғы жылы 10-шы ретөткізіліп отыр.Айтулы шараға аталмыш бөлімдердің басшылары, мамандары, тіл жанашырлары мен қала мектептерінің қазақ тілі мен әдебиеті пәні мұғалімдері, зиялы қауым өкілдері қатысты, сонымен қатармен жалпы қала тұрғындары да фестивальдытамашалады. Сондай-ақ орыс тілі, ағылшын тілі пәндерінің мұғалімдері мен балабақша тәрбиеленушілері де келіпті.іл
Фестивальдың беташар рәсімінде жергілікті атқарушы билік өкілдері атынан қала әкімінің орынбасары Айдар Садырбаев сөз алып, қатысушы жастарға, мектеп оқушылары мен мұғалімдерге сәттілік пен табыс тіледі.
Айрықша шара барысында жасөспірімдерге арналып «Шығармашылық алаңдар», «Тілдік алаңдар», «Караоке алаңдары», түрлі интеллектуалдық ойындар және жас жеткіншектердің өнерін жарқырата көрсететін ерекше мазмұндағы концерттік бағдарлама ұйымдастырылды. Әсіресе тілді жақсы меңгерген балаларға арналып викториналық сұрақтардан тұратын ойындар өткізілді.
Тіл фестивалі барысында сонымен қатар Қазақстан халықтарының ұлттық ойындары да ойнатылып, оқушылар арасында командалық және жекелей сайыстар өткізілді. Қазақ күйлеріне қойылған флешмоб та халық назарына ұсынылды.
Сол тәрізді «Тілдік алаң» мен «Караоке алаңына» топтасқан оқушылар көп болды.№№ 3, 4, 11, 21, 22, 47, Шәкәрім атындағы үш тілде оқытатын көпбейінді гимназия, №№ 27, 31, 32, 33, 34, 36, 49 мектептердің оқушылары барлық зияткерлік ойындарға белсене қатысып, ұпай жинап, бағалы сыйлықтарға ие болды.
«Жұлдызды сәт», «Сөзмерген», «Мақалды толықтыр», «Жұмбақтар әлеміне саяхат», «Ойлан, тап!» сынды берер тағылымы мол ойындарға да мектеп оқушылары ерекше қызығушылық танытты. Ал балабақша жасындағы бүлдіршіндер үшін қазақ халқының дәстүрлі «Қыз қуу» ойыны ойнатылды.
— Аталмыш шараны ұйымдастырудағы басты мақсатымыз — оқушылардың мемлекеттік тілді меңгеруге деген қызығушылықтарын арттыра отырып, орыс, ағылшын тілдерін де үйренулеріне жағдай жасап, қолдау білдіру. Көріп отырғандарыңыздай, фестивальға қаламыздағы көптеген мектептердің оқушылары белсене қатысуда. Биыл біз зияткерлік ойындар ұйымдастырып, балалардың тілдер бойынша білім-дағдыларын көрсетулеріне жан-жақты мүмкіндіктер қарастырдық. Бұл шараның тағы бір мақсаты –бірнеше тілді меңгерген оқушыларды анықтап, қолдау көрсету, — дейді пікір білдірген ұйымдастырушылардың бірі, мәдениет және тілдерді дамыту бөлімінің сектор меңгерушісі Маржан Бахатова.
Фестиваль барысында тіл үйренуге деген ынталары жоғары жеткіншектерді көптеп кездестірдік. Оқушылардың бірқатары қазақ, орыс, ағылшын тілдерінде еркін сөйлеп, өлеңдер оқып, тіпті ән де шырқап жатты. Солардың бірі қаламыздағы №3 мектеп кешенінің 5-ші сынып оқушысы Фатима Шәкен Абай хакімнің өлеңдерін мәнерлеп оқып, ұстаздар қауымының, жалпы көпшіліктің көзайымына айналып, алғысқа кенелді. Қазіргі күні өлең де шығарып, тіпті шағын новеллалар жазумен де айналыса бастаған дарынды шәкіртін қазақ тілі мен әдебиеті пәні мұғалімі осы фестивальға арнайы қатыстырыпты.
Фетиваль аясында мектеп оқушылары әзірлеген әндер мен ұлттық билер келушілер назарына ұсынылды.
