Атаулы әлеуметтік көмек – бұл аз қамтылған азаматтарға және табыстары төмен деңгейдегі, оның ішінде көпбалалы отбасыларға берілетін ақшалай төлем. Елбасының аз қамтамасыз етілген азаматтарды мемлекет тарапынан қолдауды күшейту қажеттігі жайлы тапсырмасына орай, бұл бағыттағы жұмыстар Қазақстанда белсенді жүргізілуде.
Еңбек және әлеуметтік қорғау министрі Бердібек Сапарбаев: «Елбасының мемлекеттің көмегіне мұқтаж азаматтарға, отбасыларға жәрдем беру жөніндегі тапсырмасы бойынша біз әлеуметтік карта жасаймыз. Сол картаның көмегімен қандай отбасының, азаматтың шешілмеген мәселелері бар, соның бәрін дер кезінде біліп отырамыз»,- деген болатын. Бүгінгі таңда Қазақстанда тұратын әр отбасының жеке әлеуметтік картасы жасалады.
Осы аптада ШҚО әкімінің орынбасары Әсем Нүсіпова Семей қаласындағы Жұмыспен қамту орталығына барып, тұрғындарға атаулы әлеуметтік көмек тағайындау жұмыстарының қандай деңгейде атқарылып жатқандығын тексерді. АӘК-ке құжат тапсырған үміткерлермен кездесіп, оны тағайындаудың жаңа тәртібін түсіндірді.
— Елімізде 2019 жылдың 1 сәуірінен бастап атаулы әлеуметтік көмекті тағайындаудың жаңа тәртібінде адам басына шаққандағы күнкөріс деңгейі 50%-дан 70%-ғаөзгерді. Яғни 14 949-дан 20789 теңгеге дейін өсті. Демек, осыдан былай жанұяда жан басына шаққандағы орташа табыс 70%-дың шегінен аспайтын болса, онда әрбір балаға 20 789 теңгеден төленеді.
Сонымен қатар облыс әкімінің орынбасары қызмет көрсету сапасы жайлы сұрастырып, көптің көкейіндегі сұрақтарға жауап берді. Анықталғандай, Семей қаласындағы Жұмыспен қамту орталығына атаулы әлеуметтік көмек алу үшін күн сайын 60-тан астам адам жүгінеді. Тұрғындар кезекте көп күтіп қалмас үшін орталық қызметкерлерінің санын екі есеге көбейтуге тапсырма берілді. Бұдан бөлек, орталыққа кезекті бақылау және оны реттеу жүктелген. Жалпы облыста Семей қаласы бойынша АӘК тағайындаудың үлесі өте жоғары. Мұндағы әр маманның жүктемесі үлкен.
Ағымдағы жылдың сәуір айынан бастап қазіргі уақытқа дейін Семей қаласындағы Жұмыспен қамту орталығына 3 978 отбасы өтініш білдірген, оның ішінде 1930 жанұяның АӘК-ке өтініші қабылданса, 1 829 отбасыға 261,7 млн. теңгеге атаулы әлеуметтік көмек тағайындалған.
Біздің аймақта да көпбалалы отбасыларды қолдауға бағытталған ауқымды жұмыстардың белсенді түрде жүргізіліп жатқаны көпшілік назарында. Мемлекет тарапынан елдегі әлеуметтік мәселелерді шешу жолында көптеген шаралар қабылдануда. Әлеуметтік тұрғыдан көмекке зәру отбасылар жағдайы облыс басшылығының жіті бақылауында.
Роза ПҰШПАҚОВА,
«Семей таңы»
{jcomments off}
