Қазақстан Республикасы президентінің кезектен тыс сайлауын өткізуге дайындық басталып та кетті. Жеті үміткер ұсынылып, олардың барлығы өздерінің сайлауалды бағдарламаларын елдің алдына жайып салып айтып та жатыр. Менің ойымша, президенттік лауазымға лайықты адам өмірдің де, қызметтің де барлық сынынан өткен, тамаша әрі терең білімі, биік мәдениеті, өзінің қалыптасқан көзқарасы бар аса үлкен қайраткер тұлға болуы тиіс.
Расында, президенттікке өз кандидатурасын беруге кез келген адамның құқығы бар шығар, бәлкім, лайықтылар да кездесер. Әйтсе де солардың арасынан ең лайық тұлғаны таңдауымыз керек.
Алғаш рет президент өкілеттігін уақытша қолға алған күннен бастап Қасым-Жомарт Тоқаев әділетті қоғам орнатуға және оны қазіргі күннен бастап қалыптастыруға ерекше мән бергенін білеміз. Әрбір сөзінен, қадамынан да біз осыны аңғарамыз.
Жасыратыны жоқ, ашық айтатын бір жағдай бар. Бүгінде біздің елімізді жемқорлық жайлап кетті десек, артық айтқандық болар. Алайда жең ұшынан жалғасқан сыбайластық елімізге дендеп енген дерт екені белгілі. Қасым-Жомарт Кемелұлы осы жемқорлықпен күресті батыл жүргізуге ден қойып отыр. Осындай жағдайда ғана біздің саяси өмірімізде де, экономикамызда да, әлеуметтік сала мен мәдени салада да шын мәнінде ірі өзгерістер орын алар еді. Яғни жемқорлықты түпкілікті жоюмен ел дамуына қатысты көп жайтты айқындауға болады. Бұл өзі ауылдан асып, биік-биік лауазымды орындарға дейін кіріп кеткен, емі болмай тұрған дерт екенін білеміз. Бір аса қауіпті жағдай — ол біздің ұлттық қауіпсіздігімізге де қатер төндіреді. Жақында өткен жиында Қ.Кемелұлы жемқорлыққа байланысты бірқатар жайтқа тоқтала келіп, ендігі аралықта жоғары лауазымдағы кімде-кімнің қарамағындағы адамы жемқорлықпен байланысты болып табылса, онда оның басшысы өз еркімен жұмыстан кетуі тиіс деген пікірді айтты.
Президент халықтың мұң-мұқтажын, әлеуметтік саланың әр қырын, жастар өмірін жақсы білуі тиіс. Сондықтан да жастар да, тұтас халқымыз да еліміздің болашақ президенті ретінде осындай тұлғаны таңдайды деп сенемін.
Арап ЕСПЕНБЕТОВ, профессор, ҚР еңбек сіңірген қайраткері.{jcomments off}
