Өткен апта соңында жылдағы дәстүрге сай қала мектептерінде соңғы қоңырау салтанаты болып өтті. Жүрек толқытар осынау шарадан кейін оқушылар өз мектептерінің аумағында ағаш отырғызуға қатысты. Жалпы, бұл күні бүкіл қала бойынша 1000-нан аса көшет егіліпті. Мектеп түлектері туған қалаларын көркейтуге осылайша үлес қоспақ.
Түлектердің атсалысуымен шаһар шырайы тіптен арта түспек. Халықаралық әуежай маңайында тұтастай аллея пайда болды. Нақтырақ айтсақ, қала әкімі Ермак Сәлімовтің қатысуымен жаңадан Түлектер аллеясы ашылды. Жас талдар жаңа өмірге қанат қаққан түлектермен бірге өркен жаймақ.
— Бұл акцияны өте маңызды күні өт-кізіп жатырмыз, — деді өз сөзінде Ермак Бидахметұлы. — Алғашқыда аталмыш акцияны Қарағайлы шағын ауданында өткізгіміз келген, алайда ойлана келе әуежай аумағы дұрыс деп ұйғардық. Өйткені алыс және жақын жерлерге оқуға барып, туған қалаға оралғанда: «Бұл ағашты мен отырғызғам!» — деп айтып жүретін боласыздар. Баршаңызға бақыт, барлық бастамаларыңызға сәттілік тілеймін!- деді қала басшысы түлектерге алғысын білдіріп.
Игілікті шараны ұйымдастырушылар Шығыс Қазақстанда жасыл желек отырғызу бойынша экологиялық акция қолға алынғанын, оған облыс әкімі Даниал Ахметовтің өзі бастамашы болғанын айтады.
Сөз орайында айта кету ләзім, биылғы жылы Семей қаласында 1071 түлек үшін соңғы қоңырау соғылды. Олардың 60-қа жуығы «Алтын белгіге», тағы 55 түлек — үздік аттестатқа үміткер.
Барша түлектерді алда ұлттық бірыңғай тестілеу күтіп тұрса, кіші буын оқушылары жазғы демалысқа дайындалуда. Семей қалалық білім бөлімінің мәліметтеріне сүйенсек, осы жазда қала сыртындағы лагерьлерде 2 мыңнан астам оқушы демалып, 1746 бала мектеп жанындағы лагерьде тынығуға мүмкіндік алады екен.
«СТ» — ақпарат
{jcomments off}
