Жуырда «Атамекен» ұлттық кәсіпкерлер палатасының Семейдегі филиалында бизнесті жаңадан бастаушылар үшін арнайы семинар-тренинг болып өтті. Оған Семей, Бесқарағай және Жарма аудандарынан кәсіпкерлік салаға жаңадан қадам басқан жандар қатысты.
Семинар-тренинг барысында мамандар дәріс алушыларға кәсіпкерлік әліппесін үйретіп, оларға мемлекет тарапынан көрсетілер көмек түрлері жайында жан-жақты мағлұматтар берді. Сонымен қатар ҚР Үкіметінің кәсіпкерлікті дамыту бағытындағы 2017-2021 жылдарға арналған бағдарламасы аясында, негізінен, ауылдық елді мекендердегі кәсіпкерлікке дем беру көзделген болатын. Сондықтан да аталмыш шараға аудандардан бизнес өкілдері шақырылған еді. Семинардың негізгі мақсаттарының бірі кәсіпкерлікке бет бұрған азаматтарға қаржылық емес тұрғыда қолдау көрсету, кеңес беру болатын.
ҚР Үкіметінің 2016 жылғы 29 желтоқсандағы №919 Қаулысымен бекітілген 2017-2021 жылдарға арналған Нәтижелі жұмыспен қамтуды және жаппай кәсіпкерлікті дамыту бағдарламасына сәйкес, Қазақстан Республикасының «Атамекен» ұлттық кәсіпкерлер палатасы екінші бағыттың қаржылай емес қолдау операторы болып саналады. Аталмыш семинар-тренингті ұйымдастырушылардың айтуынша, бағдарламаның «Жаппай кәсіпкерлік» атты екінші бағыты ауыл-аймақта кәсіпкерлікпен айналысуды ынталандырудың нақты құралы және халықты жұмыспен қамтудың негізгі құраушы бөлігі ретінде жүзеге асырылады.
«Бастау» кәсіпкерлік негіздеріне оқыту жобасының мақсаты – өзін-өзі жұмыспен қамтыған және жұмыссыз халықты кәсіпкерлікпен айналысуға тарту арқылы ауыл тұрғындарының экономикалық белсенділігін арттыру.
Кәсіпкерлік негіздерін оқуға қатысушылар – ауылдық елді мекендерде, аудан орталықтарында тұратын, жұмыспен қамту орталықтарында тіркелген/тіркелмеген жұмыссыздар мен өзін-өзі жұмыспен қамтығандар, сондай-ақ бизнесін кеңейткісі келетін іс жүргізіп отырған кәсіпкерлер екен. Бұл ретте басты талап біреу ғана: бизнесінің тіркелгеніне үш жылдан аспауы керек.
— Осы семинарға келмес бұрын өзіме бірқатар талаптар қойдым. Соның ішінде кәсіпкерлікті жаңадан бастағандарға мемлекет тарапынан көрсетілер көмектер қатарын білу қажеттілігі туындады. Сондай-ақ грант немесе несие алу туралы да толығырақ мағлұмат алғым келеді, — дейді аталмыш шараға қатысушы, кәсіпкерлікті жаңадан бастаушы Әсел Оспанова.
Қ.ӘЛІМБЕК, «Семей таңы»
{jcomments off}
