Сәрсенбі, 29 мамыр күні қалалық әкімдікте «Қазақстандағы адам құқықта-рын қорғаудың ұлттық және халықаралық тетіктері» атты оқыту семинар-тренингі өтті. Семинар-тренингті ҚР Президентінің жанындағы Адам құқықтары жөніндегі комиссия, ЕҚЫҰ-ның Нұр-Сұлтандағы Бағдарламалар офисі, Шығыс Қазақстан облысының әкімдігі бірлесіп ұйымдастырды. Семинарға Семей қаласы әкімінің орынбасары Айдар Садырбаев, ҚР Президенті жанындағы Адам құқықтары жөніндегі комиссияның хатшысы Тастемір Әбішев, сарапшысы Светлана Жаркенова, комиссия мүшесі Ольга Волкова және мемлекеттік қызметкерлер, қоғамдық ұйым өкілдері қатысты.
Еліміздің 15 аймағын аралап келе жатқан «Қазақстандағы адам құқықтарын қорғаудың ұлттық және халықаралық тетіктері» атты оқыту семинар-тренингінің модераторлары 29 мамыр күні Семей қалалық әкімдігінде аялдады. Шәкәрім университетінен соң семинар Абай, Бесқарағай аудандарында, әрі қарай Жезқазған, Арқалық қалаларында жалғасатын болады.
— Еліміздің өзге аймақтарына қарағанда, Алматы, Нұр-Сұлтан қалаларындағы халықтың құқықтық ақпарат алу деңгейі жоғары. Біздің мақсатымыз – Қазақстанның барлық өңірлеріндегі халыққа тегін құқықтық ақпарат беру. Семинар барысында құқықтық ақпарат алу, сотқа дейін және сотта өз құқығыңды қалай қорғауға болады, Қазақстанда құқығы қорғалмаған жағдайда не істеу керек, қайда жүгіну керек деген сынды сұрақтарға конституциялық құқықты ескере отырып жауап беретін боламыз. Еңбек қатынастарынан туындайтын дау-дамайлардың, әлеуметтік жанжалдардың алдын алуға байланысты да оқыту жүргізіледі. Журналистердің Қазақстанда ақпарат алу деңгейі қандай? Ол қандай заңмен жүзеге асады? Журналистердің құқықтары бұзылғанда не істеу керек? Мұның барлығы осы семинар барысында айтылады. Заңды, азаматтардың құқықтары мен бостандықтарын сақтап, оны қорғайтын болсақ, еліміздің дамыған 30 мемлекеттің қатарына қосылуға мүмкіндігі болады,- дейді Тастемір Дәуітұлы.
Семинар төрт бөлімнен тұрды. Алғашқы бөлімде модератор Тастемір Әбішев адам құқықтарының тұжырымдамасы; адам құқықтары және құқықтық мемлекет; құқықтық сана және құқықтық мәдениет; адамның азаматтық құқықтары мен бостандықтарын қолдану принциптері және басқа да тақырыптарды қозғады.
— Азаматтардың құқықтары мен бостандықтары мемлекет үшін ең жоғары құндылық болып табылады. Бұл туралы Ата Заңның 1-бабында тайға таңба басқандай атап көрсетілген. Ата-бабаларымыз білектің күшімен, найзаның ұшымен қорғаған осынау ұлан-ғайыр территорияда егемендік орнағанына 27 жылдан астам уақыт өтті. 1992 жылы 2 наурызда Қазақстан Республикасы БҰҰ-на мүше болып қабылданды. Қазіргі уақытта бұл ұйымға 193 мемлекет мүше. Өздеріңіз білесіздер, 2017-2018 жылдары Қазақстан БҰҰ-ның Қауіпсіздік кеңесінің тұрақты емес мүшесі болып сайланды. 2013 жылы Еуропадағы Қауіпсіздік және ынтымақтастық ұйымының төрағасы, 2013-2015 жылдары аралығында БҰҰ-ның Адам құқығы жөніндегі кеңесінің мүшесі болды. Мұның барлығы Қазақстандағы жалпы заңдылықтың, адамдардың азаматтық құқықтарының сақталу деңгейіне берілген жоғары баға,- дейді Т.Әбішев.
Семинардың екінші бөлімінде ҚР Президенті жанындағы Адам құқықтары жөніндегі комиссияның сарапшысы, Л.Н.Гумилев атындағы Еуразия ұлттық университетінің азаматтық, еңбек және экология пәндері кафедрасының профессоры Светлана Жаркенова ҚР-ның еңбек заңнамасына енгізілген жаңа нормалар мен өзгерістер, еңбек шартын жасасу, еңбек шартын жасаушы тараптардың құқықтары мен міндеттері, жұмыс уақыты мен тынығу уақыты, еңбек даулары және оларды шешу тәртібі туралы ақпарат берсе, үшінші бөлімде комиссия мүшесі, «MEDIALIFE» қоғамдық қорының президенті Ольга Волкова Қазақстандағы ақпаратқа қолжетімділік, ақпарат алу құқықтарын қамтамасыз етудің халықаралық стандарттары жайлы баяндады. Семинардың төртінші бөлімінде еңбек және әлеуметтік дау-дамайлардың, жанжалдардың алдын алу тетіктері және оларды шешу жолдары, адам құқықтарын сот арқылы және соттан тыс қорғау тетіктері, медиация, Қазақстандағы әйелдер мен балалардың құқықтарын қорғаудың өзекті проблемалары жөнінде айтылды.
Жадыра ТӨЛЕГЕНҚЫЗЫ, «Семей таңы»{jcomments off}
