21-28 мамыр аралығында Шәкәрім университетінде «Дидактикалық көпір: Еуропа — Азия» атты ІІІ Халықаралық білім форумы өтті. Форумның ұйымдастырушылары – Шәкәрім университеті, Лешно қаласының Ян Амос Коменский атындағы мемлекеттік жоғары кәсіптік білім беру мектебі (Польша), Кьюнгдонг университеті (Оңтүстік Корея), Шэньчжэнь университеті (Қытай), Дүниежүзілік Ислам ғылым академиясы (Иордания), Экономика және менеджмент бойынша швейцариялық қолданбалы ғылымдар мектебі (Швейцария).
Форумға Ислам ғылым академиясының бас директоры, профессор Мониф Зоби (Иордания), Қазақстан Республикасы Тұңғыш Президенті – Елбасы кітапханасының директоры, саяси ғылымдар докторы, профессор Әмірхан Рахымжанов, шетелдік жоғары оқу орындары-ның басшылары – Кьюнгдонг университетінің президенті (Оңтүстік Корея), профессор Джон Ли, Шэньчжэнь университетінің вице-президенті (ҚХР), профессор Тао Итао, Лешно қаласының Ян Амос Коменский атындағы мемлекеттік жоғары кәсіптік білім беру мектебінің ректоры (Польша), профессор Мачей Пьетшак, экономика бойынша швейцариялық қолданбалы білім беру жоғары мектебінің ректоры, профессор Доминик Джордан, ҚР Мемлекеттік қызмет істері және сыбайлас жемқорлыққа қарсы іс-қимыл агенттігің ШҚО бойынша департаментінің басшысы Жанна Қабдолдақызы қатысты.
Форум барысында спикерлер университеттердің әлемдік білім беру кеңістігіне ықпалдасу, инновациялық қызметті ынталандыру, білім және ғылым арқылы мәдениетаралық диалогті дамыту, сыбайлас жемқорлыққа қарсы көзқарасты қалыптастырудағы тәжірибелерімен бөлісті.
Білім форумы аясында «Бір жол, бір белдеу» бағдарламасының негізгі қағидаттары таныстырылды. Болашақта бұл бағдарламаның басымдықтарын жүзеге асыратын орталық филиалдары Нұр-Сұлтан, Алматы қалаларында ашылмақ. Бағдарлама бүкіл әлемнің бір бағытта дамуын, экономикалық тұрғыдан әріптестік бірлікте болуын, сондай-ақ ұлттық кодтың қалыптасуын көздейді. Мұнымен қатар идеологиялық тұрғыдан ұлтаралық жеккөрушілікті ұлтаралық сыйластыққа, бақталастықты бәсекелестікке, араздықты достыққа айналдыруды ұсынады.
Форумның ашылуында Қытай Халық Республикасы Шэньчжэнь университетінің вице- президенті, профессор Тао Итаоның орыс тіліне аударылған «Развитие особых экономических зон Китая» кітабының тұсауы кесілді. Аталмыш туындыда автор Қытай елінің экономикалық жағдайы мен бүкіл әлемнің экономикалық ахуалын сөз ете келіп, жаһандық экономикалық дағдарыстан шығу жолдарын қарастырады.
Форум 25 мамыр күні Абай музейінде «Абай философиясының өркениетті феномені» атты зиялы қауым өкілдерімен кездесуден басталды. Кездесуді академик Ғарифолла Есім жүргізіп отырды. «Абай өркениет әлемінде» тақырыбында Ғарифолла Есім, «Хакім Абай және Алаш алыптары: еркіндік пәлсапасы» тақырыбында Алаштану ғылыми-зерттеу орталығының директоры Шаңбай Тұрдығұл, «Ұлы ақын мұрасы және Абай музейі» тақырыбында Абайдың «Жидебай-Бөрілі» мемлекеттік қорық-музейі директорының ғылыми-жұмыстар жөніндегі орынбасары Мейрамгүл Қайрамбаева баяндама оқыды.
— Өткен жылы университет ректоры Мейір Ескендіровтің бастамасымен дидактикалық көпір өткен болатын. Оған 5 мемлекеттің ғалымдары келіп қатысты. Биыл да сол үрдіс жалғасып, ауқымы кеңейіп отыр. Халықаралық білім форумы аясында бүгін Семей қаласындағы киелі қара шаңырақтың бірі Абай музейінде «Абай философиясының өркениетті феномені» тақырыбында басқосу өтуде. Абай философ па, философ емес пе деп дауласқандар болған. Шын мәнінде, Абайды философ деп қарайтын болсақ, трактат жазған, ғылыми еңбек қалдырған философияның адамы болуы керек еді. Бірақ Абайдың шығармаларында, әрбір өлеңінде, қара сөздерінде, поэмаларында сығымдалған жинақы ой бар. Ол ой қазақтың төңірегінен асып, әлемдік өркениетке қарай қарыштап көтеріліп кеткен. Сол ойларды теріп алып, өркениеттің маржандарымен салыстырып, сонымен бірге тоғыстыру – ұрпақтың, зерттеушілердің міндеті. Бүгінгі басқосудың мақсаты да осы деп ойлаймын, — дейді профессор Арап Еспенбетов.
Форумның келесі күні Шәкәрім университетінің жаңа білім беру бағдарламасының тұсаукесері өтіп, білім беру бағдарламаларының ұтқырлығының шетелдік тәжірибелері, жұмыс берушілердің сұранысы бойынша жаңа бағдарламаларды енгізу мәселелері зерделенді. Қазақстандық және шетелдік ғалымдар арасындағы пәнаралық ғылыми-зерттеу жұмыстарын дамыту бойынша өзара тиімді ынтымақтастықты нығайту жолдары талқыланды.
Форум барысында пленарлық сессия, «Педагогикалық старт – 2019» жас педагогтердің жыл сайынғы аймақтық форумы, «Рухани жаңғыру» бағдарламасы аясындағы «Акме» халықаралық ағартушылық клубының отырысы, өңір мектептерінің, колледждердің және ЖОО түлектері үшін «Жастар — жаңа биіктерге» фестивалі, сондай-ақ Семей қаласының жастары үшін бизнес-тренингтер, ғылыми семинарлар өтіп, білім беру платформаларының жұмысы көрсетілді.
«Көшбасшы феномені» атты панельдік дәрісте Қазақстан Республикасының Тұңғыш Президенті – Елбасы кітапханасының директоры Әмірхан Рақымжанов сөз сөйледі.
Форум қорытындысында Шәкәрім университеті, Ислам ғылым академиясы және Шэньчжень университеті арасында білім беру және ғылыми ынтымақтастық туралы меморандумдарға қол қойылды. Шэньжэнь университеті мен Шәкәрім университетінің бірлескен шешімімен халықаралық көзқарас пен инновацияны және достық қарым-қатынасты дамыту мақсатында елімізде алғаш рет Шәкәрім университетінде «Бір жол, бір белдеу» ғылыми-зерттеу институтының өкілдігі ашылатын болады.
Жадыра ТӨЛЕГЕНҚЫЗЫ, «Семей таңы»{jcomments off}
