8 КӨШЕ ОРТАША ЖӨНДЕУДЕН ӨТЕДІ
Сәрсенбі, 5 маусым күні Ақпараттық орталықта Семей қаласының жолаушылар көлігі және автомобиль жолдары бөлімі басшысы Серікқали Жұманов пен сектор меңгерушісі Назым Жанболатованың қатысуымен баспасөз мәслихаты өтті. Баспасөз мәслихатында жол жөндеу, қоғамдық көлік мәселелері қарастырылды.
Бөлім басшысы мәлімдегендей, биылғы жылы орташа жол жөндеу жұмыстарымен 8 көше қамтылады. Ағымдағы және орташа жол жөндеу жұмыстарына бюджеттен 894 млн. теңге, жолдарды тегістеуге 80 млн. теңге, күтіп ұстауға, абаттандыруға, тазалауға 980 млн. теңге қаржы бөлінген. Жолдарды күтіп ұстаумен мердігер мекеме «Семей» көгалдандыру мен абаттандыру мемлекеттік мекемесі айналысады.
– Бүгінгі күні «Семей» көгалдандыру мен абаттандыру мекемесінде 125 адам жұмыс істеуде. Мекеме өткен жылы жаңа техникаларға қол жеткізді. Сондықтан аббаттандыру, көгалдандыру, тазалау жұмыстарымен айналысуға мүмкіндігі жеткілікті деп айтуға негіз бар. Айта кету керек, саябақ аумақтары мекеме қарауына кірмейді. Оған ТҮКШ бөлімі жауапты,- дейді С.Жұманов.
Бөлім басшысының айтуынша, Семейде жол жөндеу жұмыстары басталған. Қазір Бозтаев, Қаржаубайұлы көшелерінің орташа жөндеу жұмыстары аяқталуға жақын.
– Қаржаубайұлы көшесін жөндеуден өткізу бұрыннан жоспарланып келгенімен, сәті биыл түсті. Осы аптаның соңында екі көшенің де жөндеу жұмыстары тамамдалады,- дейді бөлім басшысы.
Айта кетейік, орташа жол жөндеу жұмыстарымен сол жағалаудағы айналмалы жолайрықтан Селевин көшесіне дейінгі аралықтағы Бозтаев, айналмалы жолдан Рысқұлова көшесіне дейінгі аралықтағы Глинка көшелері, ал оң жағалауда айналмалы жол, Мичурин көшесінен Қаржаубайұлы көшесіне дейінгі аралықтағы Параллельная көшесі, Қабылбаев көшесінен Трусов көшесіне дейінгі Дәстенов және Засядко мен Чехов көшелері аралығындағы Найманбаев көшелері қамтылмақ. Сонымен қатар Қ.Мұхамедханов көшесінен Морозов көшесіне дейінгі аралықтағы Найманбаев, Жангелдин көшесінен Мичурин көшесіне дейінгі аралықтағы Қаржаубайұлы көшелерінің жөндеу жұмыстары аяқталады. Глинка көшесі мен Параллельная көшесін жөндеуден өткізетін мердігер мекемеге конкурс жарияланған.
– Орталық көшелердің бірі саналатын Глинка көшесіне осыған дейін ағымдағы жөндеу жұмыстары ғана жүргізіліп келсе, биыл орташа жөндеуден өтеді. Сондай-ақ бұл көшеге
нөсер-дренаж жүйесін орнатамыз. Өздеріңізге белгілі, Спартак пен Глинка, Докучаев пен Глинка көшелері қиылысында нөсер-дренаж жүйесі бар. Ал халық көп жүретін «Рассвет», «Березка» дүкендерінің алды жаңбыр жауғанда суға толып, тұрғындарға қиындық туғызып келеді. Сондықтан алдымен Глинка көшесіне дренаж жүйесі орнатылып, содан кейін жол жөнделеді,- дейді С.Самарқанұлы.
Дәстенов көшесіндегі №8 мектеп маңында бірнеше жылдан бері жол жоқ. Биыл аталған көшеге қаржы бөлу қалалық мәслихатта шешімін тапқан.
– №8 мектеп маңында соңғы 20 жыл көлемінде жол салынбады. Оқушылар мен тұрғындардың қауіпсіздігін қамтамасыз ету үшін биыл қаржы бөлінді. Халық көп шағымданып келген «Жансая» базары аумағындағы Найманбаев көшесіне жөндеу жүргізу мәселесі де осы жылы шешімін тапты. Сонымен қатар Қаржаубайұлы көшесінен АвтоХҚКО-ға дейінгі аралыққа кірме жол салынды. Биыл тротуарларды қалыпқа келтіруге 40 млн. теңгеден астам қаржы бөлінді. Жеңіс саябағы алдындағы тротуар да жөндеуден өтеді,- деді Серікқали Жұманов.
Жиын барысында 1–ықшам аудандағы демалыс аймағын қалыпқа келтіру туралы да айтылды. Серікқали Самарқанұлы аталған аймаққа жөндеу жұмыстарын жүргізу үшін қаржы қажеттігін жеткізді.
– ТҮКШ бөлімімен бірге демалыс аймағын қалыпқа келтіруге қаржы бөлуді қарастырып жатырмыз. Алаңға кішігірім архитектуралық жоба қажет. Бұрындары онда концерттік бағдарламалар өтетін жазғы алаң болатын. Соның бәрі жобада көрсетілуі керек. Көпшілікті жұмылдырып, 1 тамызға дейін қаржы қарастыру мәселесін шешеміз,- деді С.Жұманов.
Семей қаласының жолаушылар көлігі және автомобиль жолдары бөлімінің сектор меңгерушісі Назым Жанболатова жыл соңына дейін қаладағы қоғамдық көліктерге электронды билет жүйесі енгізілетінін және әуежайға, №33 автобуспен қоса, №10 бағыттағы автобустың да қатынайтынын жеткізді.
– Нұр-Сұлтан, Алматы және еліміздің өзге де қалаларында электронды билет жүйесі енгізілген. Бұл жүйе тасымалдаушыларға да, тұрғындарға да және қалалық әкімдікке де тиімді,- деді Н.Жанболатова.
Бөлім басшысы журналистердің қаланы абаттандыру, жол жөндеу, қоғамдық көлік төңірегіндегі өзге де сұрақтарына нақты жауап берді.
Айтолқын САМАТОВА, «Семей таңы»{jcomments off}
