Дүйсенбі, 3 маусым күні қала әкімі Ермак Сәлімов «Қаражыра» АҚ бас директоры Марғұлан Макишевпен кездесіп, қалаға көмір жеткізу туралы меморандумға қол қойды.
Жиынды ашқан «Қаражыра» АҚ бас директоры Марғұлан Макишев кен орны биылғы жылы 9 млн. тонна көмір өндіруді межелеп отырғанын айтты.
— Аталған көрсеткішке қол жеткізу үшін қосымша техника мен құрал-жабдықтар алуға 40 млн. доллар инвестиция салынды. Көмір сапасын арттыру мақсатында сағатына 1000 тонна көмірді игеруге қуатты уатып-сұрыптағыш кешен пайдалануға берілді. Келер жылы 10 млн. тонна көмір өндіруді жоспарлап отырмыз,- дейді М.Макишев.
Қала әкімі Ермак Сәлімовтің айтуынша, аталған келісімшарт көмір жетіспеушілігін шешуге мүмкіндік береді.
— Семейде ыстық су беріле бастады, жаңа тұрғын үйлер пайдалануға берілді. Сондықтан меморандумға барлық шарттарымызды енгіздік. Біріншіден, қаланы қажетті көмір қорымен қамтамасыз ету, екіншіден, біздің кәсіпорын барлық соманы бірден төлей алмайтындықтан, белгілі бір кесте бойынша төлем жасауды қарастырдық. Өздеріңіз білесіздер, қатты отынға сұраныс жоғары болғандықтан, көмірге қатысты дау-дамайлар орын алып тұрады. Меморандумда жеке сектор тұрғындарына көмір жеткізу мәселесі нақтыланды. Бұл келісімшарт көмірді халыққа уақтылы жеткізуге мүмкіндік беретіні сөзсіз, — деді қала әкімі.
«Қаражыра» АҚ бас директоры Марғұлан Макишев Қаражырада қатты отын қоры жеткілікті екенін, бірақ Семейден өзге аймақтардағы кәсіпкерлер де көмір тасымалдайтындықтан, қоймаларда белгілі бір уақытта көмір тапшылығы байқалатынын айтып өтті. Жиында белгілі болғандай, енді көмір алушы коммуналдық кәсіпорындардың тізімі жасалып, «Жігер» ЖШС-не жіберілмек. Көмір осы тізім бойынша босатылады. Қатты отын алу тәртібі осылай реттелмек.
Қала әкімінің тапсырмасымен жыл сайын көктемде алдағы жылу маусымына дайындық жұмыстарына жауапты арнайы штаб құрылады. Штабқа қала әкімінің орынбасары Николай Ушаков басшылық жасаса, штаб мүшелері ретінде қалалық білім бөлімі, денсаулық сақтау, жұмыспен қамту, әлеуметтік бағдарламалар және азаматтық хал актілерін тіркеу бағдарламалары бөлімдерінің басшылары бекітілген. Штабтың атқарушы мүшелері – ТҮКШ бөлімі, қаржы бөлімі, жолаушылар көлігі және автомобиль жолдары бөлімі, «Нұр Отан» партиясының өкілдері, жол — патрульдік полициясы қызметкерлері, мемлекеттік қызмет істері жөніндегі агенттік және «Қаражыра» АҚ өкілдері. Штабтың негізгі қызметі – көмірдің қалаға тұрақты түрде келуін, әлеуметтік мекемелер мен бюджеттік мекемелердің қамтамасыз етілуін және тұрғын үй — коммуналдық нысандардың жылу маусымына дайындығын тексеру.
Жылу маусымы басталғанда Семейге ең алдымен коммуналдық – тұрмыстық мақсаттағы көмірдің жеткізілуі өзекті. Семей қаласына қажетті көмір қоры 250 мың тоннаны құрайды. Көмірді жеткізу үш темір жол қоймалары арқылы жүзеге асырылады. (Знаменка тас жолы, 72-квартал және Шығыс кентіндегі қоймалар).
Қаражыра кен орны басындағы №1 қоймада көмір арзан бағамен босатылады. Мұнда жылына 350 мың тоннаға жуық көмір тиеледі.
Сондай-ақ жыл сайын Семей қалалық әкімдігімен «Жазғы уақытта көмір тасымалдау» туралы меморандумға қол қойылады. Келісімшарт аясында кен орны Семейге маусым — қыркүйек айлары аралығында 80 мың тонна көмір жөнелтеді.
Жиын барысында «Қаражыра» АҚ өкілдері кен орнында маман тапшылығы байқалатынын да айтып өтті.
— Біздің компанияға БелАЗ автомобиль жүргізушісі, токарь, электромонтер, электр жабдықтарын жөндеу мамандары қажет. Бұл мәселені шешу үшін Көлік колледжі, «Керем Еквипмент ЛТД» ЖШС-мен келісімшартқа отырдық. Қазір жұмысшы мамандықтарына сұраныс артып келеді. Сондықтан түлектерді осындай мамандықтарды да игеруге шақырамыз. Жуықта Семейдің Орталық алаңында үгіт-насихат жұмыстарын жүргізбекпіз, — дейді М.Макишев.
Айта кетейік, Семей қаласындағы қоймаларда көмір бағасы бұрынғыдай 7400 теңге болып қала бермек. Қатты отын әзірге былтырғы бағамен сатылады.
Кездесу соңында кен орны өкілдері тұрғындарға көмірді жазғы уақытта сатып алуға кеңес берді.
Жадыра ТӨЛЕГЕНҚЫЗЫ,
«Семей таңы»{jcomments off}
