Осымен тоғызыншы мәрте қазақ күресінен ұйымдастырылған «Қазақстан Барысы – 2019» республикалық турнирінде Айбек Нұғымаров топ жарып, жеңімпаз атанды. Байрақты бәсекеден жеңіспен оралған апайтөс балуанды кеше, апта дүйсенбісінде жерлестері салтанатты түрде қарсы алды.
Жеңімпазды салтанатты түрде қарсы алу рәсіміне қала әкімі Ермак Сәлімов те қатысып, жерлестерінің атынан құттықтау лебізін білдірді. Палуанды қарсы алуға сонымен қатар қазақ күресінің ардагерлері, Айбектің туыстары мен спортты серік еткен қала жастары, жергілікті тұрғындар да келген болатын.
Салтанатты шара барысында сөз алған Айбек Нұғымаровтың өзі де барша жанкүйерлеріне алғысын білдіріп, тілеулестік танытқандарға ризашылығын жеткізді.
Жалпы, осы жолы Тұңғыш Президент Нұрсұлтан Назарбаевтың жүлдесі үшін өткізілген жалпыұлттық жобаның ақтық мәресінде 33 балуан бақ сынаған болатын. Еліміздің 17 аймағында және үш қаласында өткен іріктеу турнирлерінде жеңімпаз болған палуандар өзара жүлде қорын сарапқа салды.
Бәсекенің қорытындысы бойынша, бас бәйгенің биылғы финалдық кезеңіне ең ауыр салмақтағы палуандар, Шығыс Қазақстан облысынан қатысқан қос қыран — Айбек Нұғымаров пен Ерасыл Қажыбаев екеуі шыққан болатын.
Финалдық белдесулердің қарсаңында ресми түрде өткен салмақ өлшеу рәсімінде Айбектің салмағы 144 келі болса, Ерасыл 151 келі тартқан еді. Шешуші сында дәл осы екеуі белдесті. Екеуі алма-кезек ұпай алып, таразы басы 5 минутқа жуық уақыт бойы теңселіп тұрғанымен, белдесу соңында Нұғымаровтың бағы жанды. Тәжірибесі басым болды. Қайсарлықтың үлгісін көрсеткен Қажыбаевқа екінші орын бұйырды.
Осылайша, Айбек Нұғымаров 2019 жылғы «Қазақстан Барысы» атанды. Оған Алтын белбеу мен алтыннан құйылған ауыспалы «тайтұяқ» табыс етілді. Былтыр 3-орынға ие болған жерлесіміз Ерасыл Қажыбаев биыл күміс белбеуге қол жеткізді. Осы бетінен таймаса, келесі жылы басты мақсатына жетуі де ықтимал.
Осымен екінші мәрте «Қазақстан барысы» атағын жеңіп алған Айбекті жеңісімен құттықтаймыз!
«СТ»-ақпарат{jcomments off}
