Жуырда семейлік жедел жәрдем қызметкерлері қала көшелері мен сауда үйлерінде алғашқы медициналық көмек көрсету бойынша шеберлік сыныбын өткізді. Басты мақсат – тұрғындардың алғашқы медициналық жәрдем бойынша сауаттылықтарын арттырып, өзіндік дағды қалыптастыру.
Мамандардың айтуынша, оқыс жағдай орын алғанда бірінші кезекте байсалдылық сақтау қажет. Асығуға, айналада дүрбелең туғызуға болмайды. Жедел жәрдем қызметкерлері бұл жайында сауда-ойын сауық орталықтарындағы өздері өткізген шеберлік сағатында кеңінен түсіндіріп берді.
Өмір болған соң әркім де тосын жағдайларға тап болып жатады.
— Мәселен, сауда орталығында сіздің жаныңызда тұрған адам жүрек тұсын ұстап, тұрған орнында құлап түсті делік. Мұндай жағдайда жедел жәрдем қызметкерлері келіп жеткенше қарап тұруға болмайды. Мүмкіндігінше алғашқы медициналық көмек көрсету керек,- дейді діріс беруші мамандар.
Семейдегі «Жедел медициналық жәрдем станциясы» МКК шұғыл қызмет бөлімінің меңгерушісі Армангүл Смағұлованың айтуынша, аталмыш мекеме қызметкерлері бұл шараны қалалық әкімдікпен және жол полициясымен бірлесіп өткізіпті.
— Бұл акцияны өткізудегі мақсат — адамдарға түрлі жағдайларға тап болған жандарға көмек көрсету тәртібін үйрету. Соның ішінде жол апаты кезіндегі алғашқы көмек беру де бар. Жедел жәрдем қызметкерлеріне қолайлы жағдай туғызу қажеттігі де түсіндірілді. Мәселен, жыл басынан бері науқастарға асыққан екі экипаждың өздері де зардап шеккен болатын. Бүгінде олардың хал-жағдайлары жақсы. Жұмыстарына кірісті. Сол себептен де біз сауда орталықтарынан соң көлік қозғалысы жиі көшелер қиылысына барып, көлік жүргізушілермен әңгімелесетін боламыз,- деді Армангүл Смағұлова.
Акция аясында жүргізушілерге қала көшесінде жедел жәрдем көлігі пайда болса, қандай әрекет жасаулары керектігі кеңінен түсіндірілмек.
Шеберлік сағаты барысында қалалықтарға жүрекке массаж жасау, қан қысымын өлшеу, жүрек соғысын тыңдау және зембілді қалай дұрыс жатқызып, жедел жәрдем қызметкерлеріне қалай көмек көрсету керектігі жөнінде кеңестер айтылды. Сондай-ақ тұрғындарға сынық жарақатын алғанда қандай әрекет жасау қажеттігі туралы да нұсқаулықтар берілді.
Өз тілшіміз{jcomments off}