Бүгінде діни экстремизм мен терроризмнің алдын алу мемлекеттік деңгейдегі маңызды шаралар қатарында тұр. Әсіресе стратегиялық маңызға ие нысандар мен көпшілік орындардағы сақтық шаралары, лаңкестік қауіптің жолын кесу жұмыстары алғашқы кезекте қарастырылуда.
Жуырда ШҚО Семей өңірлік дін мәселелерін зерттеу орталығының мамандары жергілікті темір жол саласы қызметкерлері үшін танымдық-тағылымдық мәні зор кездесу жиынын өткізді. Басқосу барысында діни экстремизм мен радикализмнің алдын алу жайында кеңінен айтылып, дәстүрлі емес діни ағымдардың қоғамға төндірер қаупі туралы келелі әңгіме қозғалды. Көпшілік алдында теолог Мақсат Ботаханов сөз алып, адастырушы ағымдардың залалы жайында дәлел мен дәйектерге толы пікір өрбітті. Өз баяндамасында әлем діндерінің тарихына қысқаша тоқталып өткен теолог М.Дүйсенбекұлы жат діни ағымдардың пайда болуы мен олардың іріткі салуы жайлы мағлұмат берді. Сөз орайында шариғат пен салт-дәстүрді астастыра ұстану, ел бірлігі, конфессияаралық татулық, ұлттық таным, сонымен қатар жамағаттың бірлігі, ата-бабаларымыз үшін дәстүрлі саналатын Ханафи мәзхабы жайындағы толғамды ойларын білдірді. Теолог маман сол сияқты зайырлы қоғамның құндылықтарын қадірлеу, діни төзімділік мәселелерін де кеңінен сөз етті.
Жиында Астана қаласынан келген мейман — көліктегі полиция департаментінің экстремизмге қарсы іс-қимыл бөлімінің маманы Евгений Жураев та сөз алып, терроризм ұғымын кеңінен таратып түсіндіріп өтті. Сондай-ақ «жиһад» сөзіне түсініктеме беріп, жастардың шалыс қадам басуына көп жағдайда ғаламтордағы күмәнді сайттардың бүлдіргі ақпараты екендігін еске салды. Сөз орайында әлеуметтік желіні қолдануда да көп жағдайда заң бұзушылық тіркелетінін жеткізді. Яғни тыйым салынған ағымдардың бейнероликтерін өз парақшаларына білместікпен жүктеп алған кейбір діни сауаты жоқ азаматтардың әкімшілік құқық бұзушылық жауапқа тартылып жатқан жағдайлары да кездесетінін айтты. Жалпы, деструктивті діни ағымдар жетегінде кетудің басты себебі интернет желісіндегі белсенділікте болып тұр.
Жиынның соңында қатысушылар ШҚО Семей өңірлік дін мәселелерін зерттеу орталығының мамандарына көкейлерінде жүрген сауалдарын қойып, тиісті жауаптар алды
Әлібек КЕМЕЛХАН, «Семей таңы»{jcomments off}
