Өткен жұма, 14 маусым күні қалалық әкімдікте шаһар басшысы Ермак Сәлімов пен «Семей медицина университеті» коммерциялық емес акционерлік қоғамының ректоры Ерсін Жүнісов өзара ынтымақтастық жөніндегі меморандумға қол қойды.
Алдымен шаһар басшысы ақ халатты абзал жандарды Медицина қызметкерлері күнімен құттықтады.
— Дәрігер – ең ізгі мамандықтардың бірі. Сіздерді кәсіби мерекелеріңізбен құттықтаймын! Денсаулық, бақыт және қызметтеріңізге табыс тілеймін,- деді Ермак Бидахметұлы.
Әріптестік жөніндегі меморандумға сәйкес, қаладағы Абай алаңы Семей медицина университетінің иелігіне беріледі.
— Медициналық университет ұжымы Абай алаңын оқу орны қарамағына алу туралы өтініш білдірген еді. Университет аталған территорияға сапалы абаттандыру жұмыстарын жүргізіп, әртүрлі шаралар ұйымдастыруды жоспарлауда. Бұл игі бастама өзге оқу орындарына үлгі болсын деген ниетпен қолдау білдіріп отырмыз. Үнемделген қаржы қаланың шет аймақтарын абаттандыруға жұмсалады,- деді Ермак Сәлімов.
Меморандум аясында Мелькомбинат көшесінде орналасқан ғимарат та оқу орнының меншігіне берілді. Қала әкімі нысанның халық игілігіне пайдаланылатынына сенім білдірді. Меморандумда қарастырылған үшінші келісім – медицина қызметкерлерін тұрғын үймен қамтамасыз ету.
— Қарағайлы ықшам ауданында тұрғын үй құрылысы қарқынды жүріп жатыр. Дәрігерлер «Тұрғын үй құрылыс жинақ банкі» АҚ-ның мемлекеттік бағдарламалары арқылы тұрғын үйге қол жеткізе алады, — деді қала әкімі.
Шара барысында қала әкімі медицина қызметкерлерін алғыс хаттармен, төсбелгілермен марапаттады. Атап айтсақ, «Денсаулық сақтау ісіне қосқан үлесі үшін» төсбелгісімен Елена Матыцина (№2 қалалық аурухана), Светлана Вакуленко (ШҚО Денсаулық сақтау басқармасы), Гузяль Нығматуллина (№1 емхана), Гүлраушан Сатиева (Жеңіс мекемесі) марапатталса, мамандандырылған балалар үйінің медбикесі Назгүл Икишева ҚР Денсаулық сақтау министрлігінің Құрмет грамотасына ие болды. Сондай-ақ Шыңғыс Әділғазыұлы (Ядролық медицина орталығы), Солмаз Гамзаева (перинаталдық орталық) Олег Горлов (Қалматаев атындағы медколледж оқытушысы), Ләйлә Батырбаева (№3 кеңес беру-диагностикалық орталығы) ҚР Денсаулық сақтау министрінің алғыс хаттарын алды.
«Денсаулық сақтау ісінің үздігі» төсбелгісімен туберкулезге қарсы диспансердің дәрігері Мейрамгүл Байжұманова мен Ядролық медицина және онкология орталығының қызметкері Салтанат Болсынбекова марапатталды.
Айтолқын САМАТОВА, «Семей таңы»{jcomments off}
