Сауықшыл Семей халқы өткен жексенбі күні, жылдағы дәстүрге сай, татар халқының сабантой мейрамын атап өтті. Ертістің оң жағалауы мен Бейбітшілік аралындағы думанды шараға қалалықтар бұл жолы да көп жиналды.
Көктемнің, көтеріңкі көңіл-күйдің мейрамы саналатын сабантой — татар халқының егін бітік шықсын деген тілекпен тойлайтын айрықша мерекесі. Бүгінде қаламызда 15 мыңның үстінде татар ұлтының өкілдері тұрады десек, оны мерекелеудің мәні айшықтала түседі. Жалпы, аталмыш мейрам соңғы жылдарда түбі бір халықтардың достығын, береке-бірлігін, ұлтаралық келісімді паш ететін ортақ мерекеге айналып келеді. Бұл жолғы думанды шарадан да осыны аңғардық.
Семей төрінде тойланған татар халқының ұлттық мерекесіне облыс әкімінің орынбасары Әсем Нүсіпова, Семей қаласының әкімі Ермак Сәлімов, Достық үйі, Қоғамдық келісім орталығының директоры Эльдар Төлеубеков арнайы келіп қатысып, мерекелеуші қауымға құттықтау тілектерін білдірді.
Аталмыш шараға толық құраммен келген қалалық Достық үйіндегі этномәдени бірлестіктер мүшелері халықтар достығының жарқын үлгісін паш етіп тұрғандай еді. Мерекеде татар қоғамдық орталығы мүшелері де айрықша белсенділік таныта білді.
Жалпы, татар халқының ұлттық мерекесі биыл кең ауқымда, облыстық деңгейде өткізілді десек қателеспейміз. Себебі осы жылғы сабантойға іргелес орналасқан Бесқарағай, Бородулиха аудандарымен қатар, Ресейдің Қазан қаласынан да татар ағайындар келіп қатысты.
Сабантой — өте көңілді әрі қызықты өтетін көпшілік мерекесі. Осы күнгі мерекелік шаралар барысында татар халқының ұлттық ән-жырлары шырқалып, ұлттық ойындарынан түрлі сайыстар ұйымдастырылды. Мұндай жарыстардан балалар да шет қолған жоқ.
Татарстанның еңбек сіңірген мәдениет қызметкері, даңқты спортшы Ром Ильматовтың, еңбек ардагері Рашида Ашрафқызының айтуынша, «Татарча курәс» бабадан балаға мұра болып келе жатқан ойындар саналады.
— Осындай ұлтаралық келісім мен бейбітшіліктің алтын ұясына айналған қазақ елінде өмір сүріп жатқанымыз біз үшін зор қуаныш. Қазіргі таңда біздің тіліміз бен мәдениетімізді, салт-дәстүрімізді дамытуға да үлкен көңіл бөлінуде. Облыс орталығында Мұса Жәлелге ескерткіш қойылса, Семей қаласында Ғабдолла Тоқайдың ескерткіші бар. Татар өнер мектебі мен татар мәдениеті музейі де жүйелі жұмыс істеп тұр. Мұның барлығы да біз үшін өте қымбат әрі бағалы, — деді өз сөзінде татар қоғамдық орталығының мүшесі, еңбек ардагері жерлесіміз Рашида Ашрафқызы.
Сонымен қатар ұлттық ойындар — бағанға өрмелеп, оның басындағы сый-сияпатты алу сынды көптеген халықтарға ортақ ойындар да ұйымдастырылды.
Қонақжай татар халқының мол дастарқанынсыз сабантой мейрамын елестету мүмкін емес. Бұл ретте мереке демеушісі Рафаил Хазиповтың ұйымдастыруымен татар палауы фестивалі ұйымдастырылып, думанды шараға жиналған семейліктердің барлығы да ортақ дастарқан басынан дәм татты. Сол тәрізді мерекелеуші қонақтар мен мәртебелі меймандарға татар халқының ұлттық тағамы чак-чак дәмі ұсынылды. Бір бұл емес, сан алуандығымен, қайталанбас дәмімен ерекшеленетін татар тағамдарын дайындаудан сайыс ұйымдастырылып, жеңімпаздар анықталды.
Сондай-ақ жұртшылықты 1990 жылы құрылған, татар өнері мен мәдениетін паш етіп жүрген «Илһам» ансамблінің өнері де тамсандырды.
Түрлі спорттық шаралар орын алып, ән мен жыр әуелеген еңбек пен достықтың мерекесі тек татар халқының бай рухани мұраларын жаңғыртып, жұртшылық назарына ұсынып қана қойған жоқ, барша қалалықтарға жексенбілік көтеріңкі көңіл-күй сыйлады.
Азамат ЕРСАЙЫН, «Семей таңы»{jcomments off}
