Абай Құнанбаевтың 175 жылдығына орай, Семейдегі Абай алаңы түбегейлі өзгереді. Алаңның жаңа дизайнын әзірлеу үшін Семейге Нұр-Сұлтан қаласынан жобалау компаниясы келді.
Өткен апта, 20 маусым күні Семей қаласының әкімі Ермак Сәлімов Семей медицина университетінің ректоры Ерсін Жүнісовпен және елордалық дизайнерлермен бірге Абай алаңына барды. Мамандар алаңды көріп шыққан соң, жаңа дизайнын жобалау қажет деп қорытындылады.
— Университет астаналық мамандарды шақырды. Олар алаңның жаңа жобасын дайындайды. Содан соң сарапшылар мұнда қандай өзгерістер болатынын түсіндіріп береді. Қаржыландыру мәселесін содан кейін шешеміз,- деді Ермак Бидахметұлы.
Өз кезегінде Ерсін Жүнісов күзде алаңға 40 түп шырша отырғызылатынын айтты. Қылқан жапырақты ағаштар Риддер тәлімбағынан әкелінеді.
— Біз барлық орындықтарды жаңасына ауыстырамыз. Мұндағы жасыл желек күтімімен жыл бойы бағбан айналысатын болады. Абай ескерткішін де жаңартамыз,- деді Ерсін Жүнісов.
Айта кетейік, жуырда қала әкімдігі мен Семей медицина университеті арасындағы өзара ынтымақтастық туралы меморандумға қол қойылды. Бұл құжатта Абай алаңы аталмыш жоғары оқу орнының иелігіне берілгендігі туралы айтылған.
Семей қаласы Ақпараттық орталығы.{jcomments off}
