Семейдегі тағы бір тарихи-мәдени нысан Шығыс Қазақстан облысы әкімі Даниал Ахметовтің тікелей тапсырмасына орай күрделі жөндеуден өткізілетін болды. Атап айтсақ, шаһар төрінде орын тепкен Ф.Достоевский музейінің аумағына жөндеу жұмыстары жүргізілмек.
Айта кетсек, Ф.Достоевский музейі Қазақстанның киелі 100 нысаны тізіміне енгізілген болатын. Осыдан бір ай бұрын облыс әкімі Даниал Ахметов Семей қаласына жасаған арнайы іссапары барысында аталмыш музейге келіп, оның материалдық тұрғыдан жабдықталуына да көңіл аударған болатын. Міне, сол кезде облыс басшысы қаладағы рухани орындарды басты назарда ұстауды ескерте келіп, аталмыш нысанға жөндеу жүргізу қажеттігін айтқан еді.
— Мұнда жөндеу жұмыстары жүргізілмегеніне жарты ғасырдан асатындай уақыт болған шығар. Бүгінде музейде жөндеу жұмыстары жүргізіліп жатқанына біз, әрине, ерекше қуаныштымыз. Ендігі аралықта музейдің аумағы жаңарып, жаңадан газондар мен гүлзарлар пайда болады. Музейдің сыртқы көрінісінен бөлек, ішіне және ескерткіштің өзіне де біршама жөндеу жұмыстары жүргізіледі. Жалпы, біздің музейдің жәдігерлерін тамашалауға өте көп адам келеді, қазірдің өзінде де ағылып келіп жатыр. Мәселен, жыл сайын еліміздің әр түкпірінен 15 мыңға жуық туристер музейді арнайы келіп тамашалайды, — дейді аталмыш әдеби-мемориалды музейдің директоры Ирина Соловьева.
Қазіргі таңда осынау музейді жөндеу үшін алты миллионнан астам қаражат бөлінген.
Жалпы, бүгінде әлемде жазушы Федор Достоевскийдің өмірі мен шығармашылығына арналған жеті музей бар екен. Семейдегі музей соның бірегейі саналады. Бүгінгі күні мұнда тіпті шетелдерден де келетін қонақтар көп. Бұл орында Достоевскийдің өмір сүрген кезеңін сезінуге зор мүмкіндік бар.
Айта кетсек, Федор Достоевский Семейге 1854 жылы көктемде әскери қызметін атқару үшін келген. Сібірлік жетінші жүйелік бөлім батальонында жеке қызметкер лауазымына көтеріледі. Бірақ ауруына байланысты қызметінен кетеді. Қазіргі музей ғимаратын 1857-1859 жылдары пәтер үшін жалдап тұрған екен. Алғашында казармада, кейінірек басқа пәтерлерді де жалдап тұрған. Бірақ пошташы Лепухиннің осы үйі ғана бертінге дейін сақталып қалған. Осында жазушы өзінің бірінші жұбайы Мария Исаеваны жолықтырады. Кузнецк қаласында некеге тұрғаннан кейін, Достоевский қызметтен босатылып, қаладан кетуіне рұқсат алғанға дейін Семейге қайта оралып, екі жарым жыл осы үйде тұрады. Сол жылдары ғалым-саяхатшы Шоқан Уәлихановпен танысып, достық қарым-қатынастары нығаяды.
Ал Семей қаласының тұрғындары мен қала қонақтары музейдің жаңарған бейнесін алдағы шілде айында көре алатын болады. Музей қызметкерлері мен қаладағы тарихи нысандардың жанашырлары осындай үлкен қамқорлық көрсеткені үшін облыс басшылығына ризашылық білдіруде.
Өз тілшіміз.{jcomments off}
