Елбасының Қазақстан 2050 стратегиясында және 5 институционалдық реформаны жүзеге асыруға арналған – 100 нақты қадамда айтылған жоғарғы білім беру бағыттарын дамыту, сонымен қоса ҚР Денсаулық сақтау министрлігінің 2016-2019 жылдарға арналған «Денсаулық» мемлекеттік бағдарламасын жүзеге асыру аясында елімізде медициналық жоғарғы білім беру саласын модернизациялау қарқынды жүріп жатыр. Атап айтсақ, 2019-2020 оқу жылынан бастап Қазақстандағы алты медициналық жоғарғы оқу орны 6 жылдық оқу бағдарламасына көшеді. Осы жоба аясында Семей медицина университеті Анкара қаласындағы Башкент университетінің профессорларымен бірге жалпы медицина мамандықтарына арналған жаңа оқу бағдарламасын әзірлеуде.
— Біздің университетке жалпы медицина мамандығы бойынша жаңа бағдарламаны даярлау тапсырылған болатын. Анкарадағы Башкент университетімен біріге отырып, жаңа бағдарламаны әзірледік. 2019-2020 оқу жылында қолданысқа енеді. Сонымен қатар С. Ж. Асфендияров атындағы Қазақ ұлттық медицина университеті фармация саласы, Қарағанды медицина университеті қоғамдық денсаулық сақтау, Астана медицина университеті медбике ісі, М.Оспанов атындағы Батыс Қазақстан мемлекеттік медицина университеті стоматология салаларында жаңа оқу бағдарламаларын әзірлейді. Жобаны Дүниежүзілік банк қаржыландырады, — дейді Ерсін Тұрсынханұлы.
Тағы бір ерекшелік — биылғы жылдан бастап медицина университетіне тапсырушылар психометриялық тест тапсырады. Бұл талапкердің медицина саласында қызмет етуге психологиялық даярлығын анықтауға мүмкіндік береді.
— Өздеріңің білетіндей медициналық оқу орнында білім алу қиын әрі ұзақ. Сондықтан ҚР Білім және ғылым министрлігінің жаңа бұйрығына сәйкес, биылғы жылдан бастап талапкерлер алдымен психометриялық емтихан тапсырады. Сонымен қатар арнаулы мамандар жетіспеушілігін толтыру, ауылдық жерлердегі кадр жетіспеушілігін жою мәселелеріне де баса көңіл бөлінуде. Осы бағыттарда жұмыс істеп жатырмыз. Жалпы медицина саласына енгізілген бұл өзгерістер біздің түлектердің халықаралық деңгейде жұмыс істеулеріне мүмкіндік береді, — дейді Ерсін Тұрсынханұлы.
Айта кетейік, егер талапкер ҰБТ-дан жеткілікті балл жинап, бірақ психометриялық тесттен өте алмаса, медициналық оқу орнында оқи алмайды. Талапкерлер психометрялық тестті 8-13 шілде аралығында, ақылы негізде оқитындар 15-25 тамыз аралығында компьютер арқылы тапсырады. Тест нәтижесін психолог шығарады. Психометриялық тесттен шетелден келіп білім алушылар ғана босатылған.
Сонымен қатар биыл Семей медицина университеті мен Семей қаласы әкімдігі арасында әріптестік туралы Меморандумға қол қойылған. Осы меморандум аясында аталған оқу орны мен Семей қаласы әкімдігінің бірқатар жұмыстарды бірігіп жүзеге асырмақ.
— Биылғы жылы Семей медицина университетінде жаңалықтар көп. Оқу бағдарламасындағы өзгерістермен қатар Жастар жылы аясында жастар саясаты және сыртқы байланыстар департаменті құрылды. Бұл бағытта университет ұжымымен бірігіп жұмыс істейміз, — дейді Жастар ресурстық орталығының директоры Олжас Соғымбай.
Баспасөз мәжілісі соңында университет ректоры жергілікті БАҚ өкілдерін мерекелерімен құттықтап, алғыс хат тапсырды.
Жадыра ТӨЛЕГЕНҚЫЗЫ, {jcomments off}«Семей таңы»
