Үржар спорт пен мәдени шараларда үнемі белсенділердің қатарынан көрініп жүрген аудан. Спортшыларымен мақтанып, өнерпаздарымен танылған ауданның мәдени шаралары жаз бастала айдынды Алакөл жағасында жалғасады. Сондай іс шаралардың бірі өткен аптада болып өтті. «Жастар жылы» аясында Алакөл жағалауында ІІ Республикалық бұқаралық-спорттық веложарыстан ҚР Мәдениет және спорт министрлігінің ұйымдастыруымен өткен бұл турнир бұқаралық спортты дамытуды, салауатты өмір салтын насихаттауды көздейді.
Аталған жарысқа түрлі жас мөлшеріндегі қырықтан аса адам қатысты. Салауатты өмір салты мен туризмді дамытуды мақсат еткен шараға ҚР Мәдениет және Спорт министрлігінің өкілі А.Кручков арнайы келіп, сөз кезегінде барлық қатысушыларға сәттілік тілеп, жастардың осындай сайыстарға ат салысып жатқанына ризашылығын білдірді. Аудан әкімінің орынбасары Б.Тұрлыбеков жарысқа қатысушыларға Үржар ауданының әкімі С.Зайнулдиннің сәлемін жеткізіп, сәттілік тіледі.
Жарыс ережесі бойынша әр қатысушы 16 км қашықтықты бағындырып өтуі керек. Бұл, әрине, үлкен күш-жігерді қажет ететіні сөзсіз. Сайысқа жиналған қауым спортшылардың өнері мен аудандық мәдениет үйінің «Наз» би ансамблінің өнерін қатар тамашалап, айдын көлдің жағалауы мерекелік көңіл күйге бөленді.
Бұл жарыстан ауданның еңбектеген баласынан еңкейген қартына дейін шет қалмады деп айтуымызға болады. Төрт жастағы бүлдіршін жасының кішілігіне қарамастан жақсы нәтиже көрсетті. 80 жасқа келіп қалған аудандық ардагерлер кеңесінің төрағасы Н.Сандыбаев та сайысқа қатысып, жастарға үлгі болды.
Әділқазылар алқасының шешімі бойынша бірнеше номинация белгіленген еді. Сол номинация талаптарына орай ең жас қатысушы 14 жастағы Ә.Мұратбеков аға буын өкілінен қалыспай алдыңғы орындардан көрінді. Абсолюттік жеңімпаз ретінде ұлдар арасында Н.Байтиков, қыздар арасында А. Кимадиева жүлделі болды. Ал 10 немеренің әжесі З.Жақыпбекова да қалыс қалмай, жеңіске деген ұмтылысы үшін сыйлыққа лайық деп танылса, бас жүлдеге велосипед беріліп, қалған жүлдегерлер тұрмыстық техникалармен, сондай-ақ, ҚР Мәдениет және Спорт министрлігі, спорт және денешынықтыру істері комитетінің диплом, медальдарымен марапатталды.
-Өздеріңіз білесіздер, бұқаралық спорт пен ішкі туризмді дамыту мемлекеттің басты тапсырмаларының бірі. Аталған міндеттің орындалуының көрінісі – осы Республикалық турнир деп айтар едім. Ашық чемпионатқа белсенді әрі салауатты өмір салтын серік еткен жандар қатысты. Турнирді жоғары деңгейде ұйымдастырушыларға алғысымды білдіремін,- деді ҚР Мәдениет және Спорт министрлігінің спорт және денешынықтыру істері комитетінің бас сарапшысы М.Әлібекова.
Веложарыстың жоғары деңгейде өтуіне өзіндік үлесін қосқан аудандық жастар ресурстық орталығы, Мәдениет үйінің ұжымы, Спорт және Денешынықтыру бөлімі, аудандық спорт мектебі де марапаттан тыс қалмады.
Алакөл – ырысы тасыған, берекесі артқан арайлы да мерейлі мекен. Дәл осындай бәсекелі жарыстың көл жағалауында өтуі бекер емес. Қазіргі таңда облыс әкімі Д.Ахметовтың басшылығымен ірі жобалар іске асырылып, абаттандыру жұмыстары жүргізіліп қана қоймай, ел мақтанатын туристік мекенге айналып отыр.
Тұнықта тұнық бар ма екен тұнығыңдай,
Шарқ ұрған шағалаң да бір ұлыңдай.
Бір сілкіп бұрқыратып Аралтөбе,
Арқаңа тастай салған бұрымыңдай, – деп жергілікті ақын Айжарық Абылқасымов жырға қосқан Алакөлді бүгінде көпшіліктің нағыз демалыс, көңілін сергітер орнына айналдыру зор міндет.
Бұл орайда аудандық әкімдіктің қосып отырған үлесі ерекше. Тек өз жерлестеріміздің ғана емес шетелдіктердің де сүйікті демалыс орынына айналған айдынды Алакөлдің жағасында талай адам ұмытылмастай қызықты күндерін өткізетініне күмән жоқ.
Ақерке АЛТЫНБЕКОВА, «Семей таңы».{jcomments off}
