Семейде жыл сайын республикалық «Мектепке жол» қайырымдылық акциясы өткізіледі. Мақсаты – аз қамтылған және көпбалалы отбасылардан шыққан оқушыларды жаңа оқу жылына дайындау және баланың әлеуметтік себептермен мектепке келмей қалу жағдайларының алдын алу.
Осы орайда «Nur Otan» партиясының филиалында баспасөз мәслихаты өтті. Басқосу барысында қайырымдылық акциясының міндеттері белгіленді. Биыл аталған акция жылдағы жоспардан бір ай бұрын, яғни 1 шілдеден басталды, шара жыл бойы жалғасатын болады. Қайырымдылық шарасы 2008 жылдан бастап «Nur Otan» партиясының ұйымдастыруымен үздіксіз өткізіліп келеді. Бұл шараға мәслихат депутаттары, партия белсенділері, жеке кәсіпкерлер, Семей қаласының білім бөлімі және іскер әйелдер ассоциациясы қолдау білдіріп, белсенділік танытуда. Жыл сайын акцияға қатысуға ниет білдірушілер саны да артып келеді.
— Өткен жылы акция 4000 баланы қамтып, 11 млн. теңге қаражат жұмсалды. Ал биылғы жылғы акция аясында 507 балаға көмек көрсетілген. Қаламыз бойынша 7062 аз қамтылған отбасы мен 2162 көпбалалы отбасыдан шыққан балалар бар. Мемлекет тарапынан қолдау көрсетіліп, 7062 баланың барлығына мектеп формасы беріледі. Сонымен қатар ағымдағы жылдың мамыр айынан, облыс әкімі Даниал Ахметовтің тапсырмасына сәйкес, 300-ден астам бүлдіршін балабақшада тегін тамақтануда. Акция негізінде әр мектепте құрылған қоғамдық кеңес жеке жұмыс жүргізуде. Олар демеушілер іздеп, балалардың оқуға қажетті заттарын, құрал-жабдықтарын, киімін, сөмкесін алып беруге жұмыла кірісуде. Акцияға тек кәсіпкерлер ғана емес, көмек білдіруге ниетті әр жан қатыса алады. «Nur Otan» партиясының филиалында мектепке қажетті құрал-жабдықтармен қамтамасыз етілетін балалар тізімі бар. Әр адам партия филиалына келіп, тізімде көрсетілген балаларға көмегін көрсете алады. Яғни жоғарыда аталған мектеп сөмкесін, оқу құралдары мен мектеп формасын алуға жәрдемдесе алады. Акция балалар үшін ұйымдастырылғандықтан, әр балаға көңіл бөлу өте маңызды. Сондықтан баршаларыңызды акцияға атсалысып, белсенділік танытуларыңызды сұраймын, — деді Семей қаласы білім бөлімінің басшысы Наталия Фесенко.
{jcomments off}
Семей қаласының ақпараттық орталығы.
