Жуырда Алматы қаласындағы «ӘлНаир» баспасынан орта мектептердегі 8-9 сыныптарға арналған «Абайтану» факультативтік курсы бойынша пән аттас арнайы оқулық жарық көрді. Құрастырушылар ф.ғ.к., доцент, Абайдың мемлекеттік тарихи—мәдени және әдеби—мемориалдық қорық мұражайының директоры Жандос Әубәкір мен қаламыздағы №16 мектептің қазақ тілі мен әдебиеті пәнінің мұғалімі Гүлнар Құнафина. Әдебиетші ғалым мен тәжірибелі педагогтың бұл жемісті еңбегін ҚР Білім және ғылым министрлігі республикамыздағы орта білім беретін мекемелер үшін ұсыныпты.
Алдымен еліміздегі білім кеңістігіне енген «Абайтану» курсы жөнінде айта кетейік. Бұл пәнді факультативті түрде оқытудағы түпкілікті мақсат – мектеп оқушыларына қазақтың бас ақынының өмірі мен шығармашылық жолы, философиясы, қоғамдық-эстетикалық көзқарастары, сондай-ақ, қазақ поэзиясына әкелген жаңалықтары мен музыкалық мұрасы жайлы мағлұмат беру. Һәм осы арқылы ақын өсиеттерін өскелең буын арасында насихаттау де көзделген болатын. Жалпы, бұл орайда Абайтану курсының мақсаттарын жүзеге асыруға бағыттал-ған бағдарлама жасалғанмен, бұл тараптағы оқулықтар мен әдістемелік құралдар там-тұм ғана кездеседі. Ал аталмыш кітап еліміздің білім кеңістігіндегі осы олқылықты толтыруда айтарлықтай үлес қоспақ.
Жалпы, аталмыш Абайтану оқулығы Абай Құнанбаевтың әдеби мұралары жайлы жүйелі түсінік беріп қана қоймай, ақынның өскен ортасы, арман-мұраттарымен таныстырады. Сондай-ақ, ақынның шәкірттері жайлы тұщымды мәліметтер беріп, Абай мектебі мен ол қалыптастырған поэтикалық әлем жайлы да мол мағлұматқа қанықтырады.
Бір ерекшелік, аталмыш оқулық жалпы орта білім беретін мектептердің 5-7 сыныптарында оқытылатын «Абайтану» курсының жалғасы болып табылады екен. Сондай-ақ, ақын шығармашылығы талданған әр тараудың соңында оқушылар үшін қосымша тапсырмалар да берілген. Бұл — пән мұғалімі үшін де бағыт-бағдар беретіні анық. Ал сыныптан тыс уақытта ізденуге жетелейтін жүктемелер баланың шығармашылық қабілетін дамытып, әдебиетке деген құлшынысын оятады. Ең бастысы, аталмыш факультативтік пәннің басты міндеті — жас буынның әдеби қорын кеңейтеді.
Сонымен қатар, бірнеше тараудан тұратын кітапта ойшыл өмірі жайлы қызықты деректер мен шежіресі де енгізілген. Мұнымен қоса, ақын еңбектерінің басылуы, зерттелуі мен халыққа танылуы жайлы да деректер бар. Қорыта айтсақ, тың тәсілдерге сүйенетін аталмыш оқулықта ақын әлемі жайлы ақпараттар мол. Бұл кітаптың бүгінгі буынды биік парасат пен телегей таным иесінің ақыл дариясынан сусындатуда берері мол деп білеміз.
Қуаныш ЖОЛЫМБЕТ ,
«Семей таңы»{jcomments on}
