Бүгінде тек елімізде ғана емес, әлем бойынша да Абай өлеңдерін оқудан дәстүрлі челлендж өтіп жатыр. Дана хакімнің хикметке толы шығармаларын нақышына келтіре жатқа айту әсіресе әлеуметтік желілерде айрықша орын алып, оқушылар ақын шығармаларын еліміздің һәм жаһанның түкпір-түкпіріндегі желі қолданушыларына, ұйымдар мен іргелі оқу орындарына, мәдени мекемелер басшыларына жолдауда. Бұл айрықша шарадан қала әкімдері мен министрлер де шет қалмағаны белгілі. Осы орайда кеше қаламыздағы Достық үйінде Абай Құнанбайұлының 175 жылдығына арналып «Өз халқының ұлы — бүкіл адамзаттың ұлы» тақырыбымен поэзия сағаты болып өтті.
Достық үйінде өткен бұл шараға этномәдени орталықтар мен қоғамдық бірлестіктер өкілдері, ардагерлер, журналистер қауымы қатысты. Абай әндерін орындау мақсатында қолға алынған әдеби-музыкалық поэзия сағаты ашық аспан астында ұйымдастырылғандықтан, кез келген қала тұрғыны келіп қатысуға, ақын өлеңдерін тыңдауға мүмкіндік алды.
— Қазіргі таңда еліміз бойынша, ұлы ақынның 175 жылдық мерейтойы қарсаңында, Абай өлеңдерін оқудан челлендж өтіп жатыр. Осы орайда Достық үйіндегі «Ахау, Семей!» орталығының әжелері Абайдың әндерін оқудан поэзия сағатын өткізуді қолға алып отыр. Басты мақсат — ақын шығармашылығын, соның ішінде оның музыкалық мұраларын насихаттау, кейінгі буынға аманаттау, — дейді Достық үйінің директоры Надежда Шарова.
Абай әндерін арқау еткен поэзия кешінде Достық үйінің мүшелері Абайдың сирек орындалатын «Өзгеге көңілім тоярсың», «Сегізаяқ» сынды көркемдік-идеялық мәні аса жоғары, сонымен қатар тағылымдық-тәрбиелік мәні зор туындыларын да жекелей және хормен шырқады.
— Расында, Абайдың музыкалық мұрасы қазақтың ұлттық өнері тарихында ерекше орын алады. Абайдың әуендік таланты халықтық негізде дамып, ақынның рухани жан дүниесі, әлемге көзқарасы оның лирикалық әндерінен айрықша байқалады. Абай әндерінің бізге толықтай жеткен себебі — олардың халықтың жүрегіне сақталуға сапасы жағынан сай келетін шығармалар болғандығында, халық санасынан өшпес орын алғандығында деп білеміз. Айта кетер тағы бір жайт, Абай әндерінің өзгешелігі мелодиялық, ырғақтық жаңалықтарында, идеялық мазмұнының ашықтығында. Оның тақырып ерекшеліктері де аса зор, — деді өз сөзінде аталмыш шараны ұйымдастырушылардың бірі, «Айша бибі» қоғамдық бірлестігінің төрайымы Айман Боқпасарова.
Әжелер қауымының Абай әндерін таңдауы да ерекше екен. Көпшілік арасында жиі айтылып жүрген әндер емес, ерекше шеберлікті, музыкалық тұрғыдан қабілеттілікті талап ететін терең сырлы, лирикалық әндерді орындауға ден қойыпты.
Ашық аспан астында өткен әдеби-музыкалық кештен қалалықтар ерекше сезіммен, айрықша әсермен қайтқаны анық.
Азамат ЕРСАЙЫН, «Семей таңы»{jcomments off}
