Семей қаласы әкімінің шаһар іргесіндегі шағын елді мекендер мен жекелеген аудандар тұрғындарымен кездесулері жалғасып жатыр. Өткен апта соңында қала басшысы Ермак Сәлімов Степной кентінде болып, тұрғындардың өтініш-тілектеріне құлақ түрді.
Аталмыш жиынға Ермак Бидахметұлы қалалық бөлімдер басшыларымен бірге келген болатын. Жергілікті атқарушы билік тарапынан дәл мұндай үлкен делегация бұрын-соңды мұнда келмепті. Сондықтан степнойлықтар таңданыстарын да жасырмады.
Кент тұрғындары бірінші кезекте көлік қатынасына қатысты машақатты қала әкіміне жеткізді. Айта кетсек, елді мекенге тек екі бағыттағы көлік – №6 мен №14 автобустар ғана келеді екен. Соның өзінде көлік қозғалысы мен қызметтер көрсетуде тұрғындарға қолайсыздық тудыратын жағдай-лар орын алатынын айтады кездесуге келген степнойлықтар.
– Автобустар өте шағын. Таңертеңгі және кешкі мезгілде қиындық туындайды. Қыстың күндері көлік салоны өте суық. Жолаушылар арасында реніш, жанжал да орын алып жатады. Түскі кезде бірнеше сағатқа аялдайтындары тағы бар. Сондай-ақ, кешкі мезгілдерде ертерек тоқтап қалатындықтан, қаладан қайтудың өзі мұңға айналады,- дейді кент тұрғыны Светлана Черникова.
Тұрғындар тарапынан айтылған тағы бір мәселе – аумақтың үшінші Степной бөлігіне автобустар мүлдем бармайды десе де болғандай. Сол себептен де тұрғындар мен балалар аялдамаға жету үшін бір шақырымнан астам жол жүруге мәжбүр. Сондай-ақ, автобустар қалаға тек сағат 7 жарымнан бастап жүретіндіктен, көптеген азаматтар жұмыстарына кешігіп қалып жатады. Оның үстіне мұндай жайт жыл сайын қайталанады екен.
Тұрғындар сауалына жауап қайырған Ермак Сәлімов қазіргі күні көлік қозғалысын реттеу бойынша байқау шаралары өтіп жатқанын айта келіп, алдағы уақытта жаңа автобустармен жаңа тасымалдаушылар бағыт бойына шығатынын жеткізді. Яғни, Степнойға шаһар әкімдігі сатып алған жаңа автобустар жүретін болады. Тек шамалы сабыр ету қажет.
Осыдан соң тұрғындар тағы бір өзекті мәселенің шетін шығарды. Бұл кентте мектеп жоқ. Ал тұрғындар саны жыл өткен сайын өсе түсуде. Нәтижесінде мектеп жасындағы балалардың да қатары артып келе жатыр. Бұл ретте қалалық білім бөлімінің басшысы Наталия Фесенко аталмыш мәселе шешімін тапты деп санауға болатынын айтты. Аталмыш елді мекенде жақын арада мектеп салынады. Тек біраз күтуге тура келеді.
– Бұл бір аптаның ішінде бітетін шаруа емес. Иә, мектепті неғұрлым жылдамырақ салуға болады. Мысалы, Ұшақтар кентіндегі мектеп бар болғаны бір жыл ішінде тұрғызылды. Бобровкадағы мектептің құрылысы да шамамен сондай уақыттың ішінде толық аяқталды. Бүгінгі күндері мектептің жобалық-сметалық құжаттары толығымен дайын тұр. Қазіргі уақытта бой көтеретін жаңа нысанды жылу көзіне қосу үшін құжаттамалық жұмыстар жүргізілуде. Шамамен 2021 жылы мектеп толығымен салынып бітіп, оқушыларды қабылдай бастайды,- деді Наталия Фесенко.
Сонымен қатар аумақта медициналық қызмет көрсетуге қатысты жағдай да мәз емес екен. Мұнда тек бір ғана жекеменшік амбулатория бар. Ал дәріхана мүлде жоқ. Бір сөзбен айтқанда, шешімін күткен мәселелер жеткілікті. Сондықтан да кент тұрғындары қала әкіміне хат жазып, көмек беруін сұрапты.
– Мен осы мәселелердің барлығын талқылап, оның шешім табуы жолында күш салуға әзірмін. Ынталы топ құрыңыздар. Барлық өзекті проблемаларды сараптап, нақтылап алыңыздар. Бұл аумақта қазандық салуды жоспарлап отырмыз. Сол арқылы жылу мәселесін шешу көзделуде. Мектеп тұрғызылады. Көлік қатынасы мәселесімен де айналысатын боламыз. Бұл талап-тілектеріңіздің барлығы да орынды, олар баяғыда-ақ шешімін табуы тиіс болатын. Біз бұл бағытта жұмыс жүргіземіз,- деді өз сөзінде қала әкімі Ермак Бидахметұлы.
Қала басшысы тұрғындармен кездесу өткізген соң кенттің шеткері орналасқан көшелерін көріп шықты. Су құбырларының, жолдың жоқтығы, жарықпен қамтылмауы әкімнің назарынан тыс қалмады.
Осы жайттармен танысқан қала әкімі Ермак Бидахметұлы Степной кентіндегі мәселелердің барлығы кезең-кезеңімен шешімін табатынын жеткізді.
Әлібек КЕМЕЛХАН, «Семей таңы»{jcomments off}
