Қала тұрғындары мен заңды тұлғалар мәселелерінің оңды шешімін табуына көмектесу мақсатында сәрсенбі күні «Нұр Отан» партиясының Семей қалалық филиалының қоғамдық қабылдау бөлімінде Семей қаласының прокуроры Тәжиден Найманов азаматтарды жеке сұрақтары бойынша қабылдау жүргізді.
Қабылдау барысында азаматтар прокурор алдында түрлі мәселелерін ортаға салды. ІІІ топ мүгедегі Юрий Герасимов өзі қызмет атқарған кәсіпорын 6 мың теңге моральдық шығынын өтемей жүргенін айтып шағымданса, Раиса Үйсімбаева өзі басқарып отырған балалар шағын орталығының «Балапан» мемлекеттік бағдарламасы аясында жұмыс жасап отырғандығын, жалпы, мекеменің тыныс-тіршілігі жайлы айта келіп, шағын орталық былтырғы жылы ғана толықтай тексерістен өтсе де қалалық прокуратура тарапынан тоқтаусыз тексерістердің әлі де жүргізіліп келе жат-қандығын сөз етті. Мекеме басшысы шағын орталық ұжымы бұл тексеріс-терге қарсылық танытып отырғандығын жеткізіп, прокурордан алдағы уақытта осындай тексерістерге тосқауыл қоюын сұрады. Мән-жайды тыңдаған соң Тәжиден Жүкенұлы бұл істі өз назарына алатындығын айтты.
Тұрғындарды жеке сұрақтары бойынша қабылдау барысында жалақысын уақытылы ала алмаған еңбек адамдарының да мәселесі сөз болды. Тыныштықбай Махмұтов есімді азамат біраз жыл бұрын қаладағы бір кәсіпорында күзетшілердің бастығы болып еңбек еткен. Оның айтуынша, кәсіпорынның бұрынғы басшысы өмірден өткен уақытта мекемеде қысқарту жүргізіліп, біршама жұмысшылармен бірге өзі де босатылған. Алайда, сол кездегі соңғы айлардың еңбекақысы қолына тимеген көрінеді. Ал, кәсіпорынға жаңадан келген басшы бұл іске өзінің қатысы жоқ екенін айтқан. Содан бері жалақының дауымен талай құзырлы мекеменің табалдырығын тоздырғанын айтқан Т.Махмұтов прокурордан осы мәселені шешіп беруді сұрады. Одан кейін қабылдауда болған Сейсенғазы Саханов та біршама уақыттан бері жалақы мәселесін шеше алмай жүргенін айтады. С.Саханов «Эскор» ЖШС-де күзетші болып жұмыс істеген. Айтуынша, бұл кәсіпорын қызыл кірпіш шығарумен айналысқан. Қазіргі уақытта жұмысы тоқтап тұрған көрінеді.
{jcomments on}- Алты ай жалақымды сол күйі бермеді. Есептесем, 300 мың теңгені құрап отыр. Онымен қоса, зейнетақыға аудару үшін жалақымнан ақша ұстап отырғанымен, зейнетақы қорына қаржы соңғы төрт жыл бойы мүлдем аударылмаған, — деп мұңын айтқан С.Саханов Тәжиден Наймановтан осы мәселені бір жақты етіп беруін өтінді.
Сонымен қатар, тұрғындар тарапынан құқық қорғау органдарының жұмысына көңілдері толмайтындар да болды. Мысалы, 240 мың теңгені құрайтын несиеге сатып алынған планшет пен ноутбуктың қолды болғанын айтқан Гүлжан Шаналиева заттарды ұрлаған адамның кім екені белгілі болса да тәртіп сақшыларының ешқандай әрекетсіз, бей-қам отырғандығын айтып шағымданды. Ал, жұбайы қайтыс болған уақытта мәйітханада оның киімдерін заң саласының қызметкерлері өртеп жібергендігін айтқан Оразбибі Қайгелдинова: «Марқұм жұбайым қаңғыбас емес, отбасы бар адам. Оның киімін өртеп жіберуге ешкімнің қақысы жоқ еді», — дей келе, киімді өртеген адамның Заң алдында жауап беруге тиіс екендігін жеткізді.
Семей қаласының прокуроры Тәжиден Найманов жеке сұрақтары бойынша қабылдауында болған жиыны 15-ке жуық азаматтың әрқайсысының өтініш-тілектері жауапсыз қалмайтындығын, аталған мәселелер бойынша жүйелі тексерістер жүргізіліп, Заң шеңберінде тиісті шаралардың қолданылатындығын жеткізді. Тұрғындардың көпшілігі өтініш-арыздарын прокурордың өз қолына табыс етті. Олардың кейбірін өзінің жұмыс орынында қай күні, қай уақытта қабылдайтынына дейін келісіп, барлық істі өз назарында ұстайтынын айтып, әр азаматтың сұрақтарына байыппен жауап берген прокурорға тұрғындар ризашылықтарын білдіріп жатты.
Нұрдәулет КӘКІШЕВ,
«Семей таңы»
